Polokalama U’una’ia Taleni - Autalavou Metotisi Futiga

O le afiafi o le Aso Sa na te’a nei, itula e 6:00 i le afiafi na tatalaina aloa’ia ai le Polokalama: Fa’aleleia ma Fefa’asoaa’i Taleni - Manulauti Fa’a- Kerisiano a le Autalavou Metotisi i Futiga. O lea tatalaga aloa’ia na i ai latou autalavou sa vala’aulia fa’apitoa, ina ia mautinoa o fa’asoa atu se lagona, ia maua fo’i lea so’otaga ma isi uso autalavou, ma ia saga fa’ateleina ona fa’alauiloa taleni ua foa’iina mai e le Atua i tagata talavou ta’ito’atasi.

“Ia le gata i lou iloa o se mea e fai, ae ia taumafai atili e fa’aleleia lou tomai, o lau taleni lava lea, ma ia taumafai loa e fa’asoa ai, aua o la le Tusi Pa’ia, “O le uta a le poto e fetala’i, ae o le uta a le vale e taofiofi mamau.” O se isi lea lauga fa’amalosi a le ali’i peresetene mo le mamalu na sasao i lea afiafi a tamali’i i le malu o le Atua “O le Papa Oe!”

E ese mai sui Autalavou sa vala’aulia, ae sa vala’aulia fo’i le Ta’ita’i o Autalavou a le Matagaluega Susuga Sote, ae maise fo’i sui iloga o le Komiti Fa’afoe o le Humanities Council ma le Fa’atonu ia Taua Niualama Taifane.

I le tatalaga o le polokalama lea, sa fa’ailoa mai ai e afua mai le fa’atulagaina ma le gaosia o teufugala’au matagofie mo malumalu ma teuga o fale fa’apitoa mo fonotaga ma isi tu’ufa’atasiga tetele fa’apena, se’ia o’o i le su’iga o ula e fa’aaoga ai le vulu, ie ma fugala’au, o isi ia taleni o le a fefa’asoa’i ai le fanau talavou, ma isi fanau talavou ua latou iloa ona faia nei oloa taulima fa’asamoa.

“O galuega nei e fa’aigoaina o taleni, o lou silafia lea ona gaosi so’o se galuega alofilima lava fa’asamoa pe o se isi lava atunu’u, e fa’aaogaina i ai mea ua maua i lou si’omaga. Afai ua e iloa ona lalaga pe gaosia nei galuega alofilima, ona e faliu lea ma fa’asoa i lou uso a talavou, ma fa’alautele atili ai lo outou tomai e o’o lava ina maua ai ma le tinoitupe mai au galuega ia, aua ua fa’amanuia mai i ai le Atua ia te oe!”

“Ua fafati mai galu o suiga tetele i le olaga o talavou i lenei vaitau, ae tatau ona nofouta ai matua, faia’oga ae maise o Ekalesia eseese i nei suiga ma o latou a’afiaga i soifua ma’ale’ale o le fanau talavou, ia vave ona faia ni a’oa’oga taua, e mafai ona auai i ai fanau, ia le fa’apotopoto atu e le fili ma ana mailei eseese!” O se tasi lea o vaega o le tautalaga fa’apitoa a Rev Samuelu Areta, i lea lava sauniga.

Na  i ai le avanoa fa’apitoa mo le ASHC e saunoa ai so latou sui na auai, ma sa tula’i ai le Sui Taitaifono Dr Toafa Vaiaga’e, ma sa ia fa’apea ai, “Ua le aoga le tupe pe a le fa’aaogaina tatau i ni polokalama fa’apenei, e fa’aleleia atili ai tomai o tupulaga talavou o le atunu’u i le aso, ae a so latou sao aoga mo tagata o a taeao! Ia fa’aauau galuega lelei, ma taleni lelei e atina’e ai le lumana’i.”