Na faailoa e le tasi o ali’i talavou e to’alua iai i laua ua ta’usala i le osofaia o se faleoloa i Nuuuli ma gaoi le $1,600, i luma o le Faamasinoga Maualuga i le vaiaso nei, e faapea, e o’o mai lona oti na te le toe faia le solitulafono o le gaoi, e le toe tula’i fo’i i luma o le fa’amasinoga i se isi lava solitulafono.

O se vaega lea o le faatoesega a le ali’i o Cameron Ieremia i luma o le faamasinoga ona ua molia faatasi i la’ua ma Wayne Peleiupu i lo la osofaia o se faleoloa i Nuuuli i le masina o Ianuari 2013, i le mae’a ai o se la inugapia sa faia i le po atoa.

Na ulua’i tuuaia nei alii i le moliaga mamafa o le talepe fale i le tulaga muamua, gaoi atoa ai ma le faatupu vevesi i nofoaga faitele, ae i lalo o le maliliega na sainia e i laua nei ma le malo, na la tali ioe ai i le solitulafono o le gaoi ae solofua isi moliaga e lua.

Na le’i gata ina faatoese Ieremia ma Peleiupu i le faamasinoga, ae faapea foi o la aiga, nuu, ekalesia ma le ulugalii e ana le faleoloa lea na la osofaia. 

Na taua e Ieremia i le faamasinoga e faapea, ua ia lagona le pologa ao nofo ai i le toese mo le lata i le 5 masina, ma e ui e faatolu ona ‘ai i le aso e tasi i totonu o le toese, ae o le itu pito sili ona faigata o le maimau lea o aso o le olaga i lenei nofoaga ae le tausia ai matua ma le aiga.

“Ou te tautino atu ou te le toe gaoi lava, ae o le a saili sa’u galuega e tausi ai lo’u aiga ma saili se lumana’i lelei mo a’u,” o le tautinoga lea a Ieremia.

Ae mo Peleiupu, sa ia folafola i le faamasinoga, o le taimi mulimuli lenei o le a tula’i ai i luma o le faamasinoga i soo se solitulafono, ma ua ia manaomia se avanoa e toe fo’i atu ai i lona aiga.

Na molimau ma loimata le tina o le alii o Peleiupu i le faamasinoga i le la mafutaga ma lana tama, ma ia talosagaina ai se isi avanoa ina ia tatala i tua lana tama sei toe faaauau le la mafutaga i totonu o le latou aiga.

Na fesili le alii faamasino sili ia Michael Kruse i le tina pe faamaonia le ripoti a le Ofisa Nofovaavaaia, o le isi vaega o le tupe na gaoi e Peleiupu na faatau ai le fagu kesi mo le latou aiga, na tali le tina ioe, o le latou fagu kesi ogaumu na faatau i le tupe na alu atu ma Peleiupu.

E ui e le’i faatuiese le loia a le malo o Julie Pasquale ina ia nofovaavaaia i laua nei ua molia, peitai sa ia talosagaina i le faamasinoga ina ia i ai sina faasalaga faafalepuipui e a’oa’oina ai olaga o i laua sa faia lenei solitulafono.

E 5 tausaga na manatu le faamasinoga e faasala ai Ieremia ma Peleiupu i le toese i Tafuna, peitai o le a faamalumalu lea faasalaga, ae o le a nofovaavaaia i laua mo le 5 tausaga i lalo o poloaiga a le faamasinoga, e aofia ai lo la tuli o masina e 20 i le toese i Tafuna, ma totogi le salatupe e $2,000 a le tagata e toatasi. Afai ae maea ona la tuli le ta’i iva masina i le falepuipui, ona tatala lea i tua, ae tuu atu aso e 60 e saili ai ni a laua galuega po o le lesitala fo’i o la igoa i le polokalame a le Kolisi Tuufaatasi mo le sailia o a la tusi pasi faaleaoaoga (GED), ae afai e maea le 60 aso ae le’i maua ni la galuega pe lesitala foi i le aoga, o le a toe taofia i laua e tuli faamaea o le la faasalaga i le toese.

Ua poloaina foi i laua la te toe totogia le ta’i $150 i le faleoloa na aafia, mo le $300 sa la faaaogaina. O le isi vaega o le tupe na gaoi e i laua nei na toe maua e leoleo, se’i vagana ai le $300 na la faaaogaina.