Ads by Google Ads by Google

Fagogo: Alofa, se ia tiga

Vaega: 73

 

Malo le soifua, taeao manuia i le alafa’i mai o le mamalu o le atunu’u i fanuga lelei o lenei aso fou, ma e i ai le fa’amoemoe maualuga, o lo’o fa’apena ona maua e le atunu’u le manuia mai le Atua, e ala lea i fa’amanuiaga ua o tatou maua i lea aso ma lea aso o le soifuaga.

 

Ae alo maia, o le a toe fa’auaua atu la tatou tala fa’asolo e pei ona masani ai, Alofa, se ia tiga, i lona vaega lona fitu sefulu ma le fa lenei o la tatou tala fa’asolo.

 

O le alofa o se mea lelei, ma tele lava ituaiga alofa ua o tatou va’ai i ai i nei vaitau o le soifuaga, o le alofa atu, ae toe mana’o ia toe maua mai sona taui, o le alofa atu nei, ae toe mana’o ia toe totogi mai taeao, o le alofa atu ae toe mana’o ia toe taui mai i se isi mea. A’o le alofa o le Atua mo i tatou e leai sona taui, a’o Lona finagalo ia o tatou maua le alofa atu i o tatou uso a tuaoi e pei o oe lava ia te oe ia fa’asalafa lo tatou alofa i so’o se tasi.

 

O se mea ua sili ona matagofie i le fuafuaga a le tagata pe afai, ua o tatou maua le alofa moni e pei ona fetalai mai ai lo tatou Ali’i Fa’aola. Aua o a lava mea e tele e te maua, ae a aunoa i tatou ma le alofa, ua leai se aoga o mea uma. ia o tatou tumau i lea alofa, ona alofaina mai lea o i tatou e le Atua Soifua.

 

Ua fa’aauau pea la’u maimoaga i totonu o lenei fale mata’aga ua sili ona matagofie i le va’ai, ma e leai se mea e tasi e fa’aletonu, ona e fai o le to’atele o le au faigaluega i totonu o le ofisa, ae ua fa’apena fo’i le to’a tele o tagata o lo’o galulue e tapena le lapisi, ma teutue le toga la’au lea o lo’o si’omia ai le fale atoa. E ofo le loto ma le mafaufau i le lava saunia lelei o lenei fale ua sili ona matagofie i totonu o le a’ai tele i Peretania, a’o le mea ua sili ona faitaga ona talia e lo’u mafaufau, ona o lenei fale tele, o lo’o pulea e lo’u tama.

 

O le itu lea sa ou le mautonu ai, ona o lea fo’i ua fa’ailoa mai e lo’u tama i a te a’u lenei mea, ae ou te le i iloaina. Ua ma saofafa’i ifo nei ma lo’u tama i le potu lea o lo’o i ai le ata o lo’u tina moni o Elisapeta. Na ou tu nei ma ou tilotilo atu i si o’u tina ma fa’apea ifo lo’u mafaufau, talofa e, i si o’u tama, o lona uiga e le mafai ona ave’esea lona loto ma lona mafaufau mai i lo’u tina moni. O o’u mafaufauga ia na maligi ifo ai o’u loimata i lea taimi, aua ua ou tilotilo atu nei i le ata, e ‘ese le lalelei o lo’u tina. Na ou musumusu atu nei ma ou a’apa atu i le ata ma ou tagotago i ai, “Mom, ua ou fia va’ai lava ia te oe lo’u tina, ta fia a’apa atu e fusi mai oe se i fa’amafanafana mai ia te a’u ma nei mau puapuaga ua ou o’o i ai.”

 

Na fa’ate’ia ou manatu ia ma ou a’apa a’e nei ua tau soloi o’u loimata i lea taimi, ina ua fa’apea mai le tala a lo’u tama, “Averia, sau sa talatalanoa, e tele lava mea ou te fia fa’ailoa atu ia te oe.” Na iloa mai nei e si o’u tama le tau soloiina o o’u mata i lea taimi, ma na a’apa mai nei ua fusi atu a’u, na avea lea ma ala ua le mafai ai ona taofiofi le maligi ifo o o’u loimata.

 

“Dad, ua ou fia va’ai lava ia Mom, ua ou fia pa’i atu i si o’u tina, po’o fea o i ai, Dad, ou te le i ta’uina atu ia te oe lo’u mana’oga, e tasi lava lo’u mana’oga, ou te fia va’ai i lo’u tina o Elisapeta, fa’amolemole ta’u mai ia te a’u, mea uma, ona o lea ua ou iloa o lo’o i Amerika, ae e le o manino ia te a’u le tele o isi mea, fa’amolemole Dad, fa’amatala mai ia te a’u, ona ou iloa ai lea ma ou malamalama i le tulaga o lo’o i ai nei si o’u tina.”

 

Na ou fa’alogoina le malosi o le fusi mai e lo’u tama o a’u i lea taimi, ma sa ou lagona ai le mafanafana o le alofa moni fa’aletama. Ua ma savavali ane nei ma ma nonofo i luga o nofoa ua sili ona matagofie i le va’ai, e foliga mai o ni nofoa sa fau fa’apitoa lava mo le fale mata’aga lenei.

 

“Averia, fa’alogo lelei mai lava i la’u tala o le a fai atu ia te oe, e moni lava oe, ma o le taimi lenei, ua tatau ai loa ona ou fa’ailoa atu mea uma e uiga i lou tina. Ua ma’ea lau a’oga, ou te fa’amalo ma ou fa’afetai atu ia te oe lo’u afafine e pele i lo’u loto ona o lou naunau ina ia fa’ataunu’u le mea sa ou mana’o i ai.”

 

Ua fa’alologo o’u taliga i lea taimi, ai ona o lo’u fia maua uma o fa’amatalaga e uiga i si o’u tina o le mea lea sa naunau i ai lo’u loto ina ia ou mauaina, a’o lea o le a ta’u mai uma e lo’u tama ia te a’u.

 

“Averia, o lou tina o Elisapeta, e sau mai se aiga lauiloa ma se aiga e mauoloa i totonu o le Malo o Amerika. O se aiga fo’i e faia fa’ai’uga e fa’agasolo ai le fa’atautaia o le Malo o Amerika. O se aiga, ua lauiloa i le lalolagi atoa, ona o le atamama’i o ona tagata, ma na o’o lava i luga o le tulaga ua sili ona ta’uta’ua i le lalolagi atoa. O le tofi  Peresitene o le Malo o Amerika”.

 

E faia pea