IOE KAIO LEVAO I TUUAIGA A LE MALO

O le taeao ananafi na ioe ai i luma o le Faamasinoga Maualuga ia le alii 45 tausaga o Kaio Levao, i moliaga mamafa o le tago i itutino sa o se tamaitai.  Na ulua’i tuuaia lenei alii i moliaga o le tago i itutino sa o se tamaitai i le tulaga lua, ae i lalo o se maliliega sa latou sainia ma le malo ma ua talia fo’i e le faamasinoga, ua ia tali ioe ai i le moliaga muamua lea ua toe teuteu e le malo ina ia faailoa ai le solitulafono o le taumafai lea e tagofia itutinosa o se tama’ita’i e le’i faaipoipo i ai, o se solitulafono e mafai ona faasala ai o ia i le toese mo le umi e le silia i le tausaga pe o se salatupe e le silia i le $1,000.

Ua ta’utino Levao i lona taumafai e tago i itutino sa o se tamaitai sa alu e faafoi ana ata tifaga i le Talofa Video i Fagatogo ma sa ia faia lea tulaga, ona o sona manatu, ua talafeagai ona o le tamaitai na aafia, fa’atoa mae’a ona fanau sana pepe.

O le aso 28 o Iuni lea ua faatulaga e lau ai le faasalaga a Kaio, ma o lo o taofia pea o ia i le toese i Tafuna i le taimi nei.

TETE’E NOFO UTU I TUUAIGA A LE MALO

Ua teena e le tama’ita’i faipisinisi o Nofo Utu tuuaiga a le malo faasaga ia te ia, ina ua tula’i i luma o le faamasinoga maualuga i le vaiaso na te’a nei.

O Utu o lo o tuuaia e le malo i moliaga mamafa e lua o le gaoi, ona o le mataupu e pei ona tuuaia ai o ia e ni tagatanuu se toalua, i la totogiina atu lea o tupe ia te ia i le masina o Mati 2013 mo le talosagaina o la visa e malaga ai i Amerika, peitai e oo mai lava i le masina o Aperila e le’i maua lava se tali maoti o a la talosaga.

Ua tatalaina nei i tua mai le toese i Tafuna le tamaitai o Nofo e faatali ai le taimi ma le aso lea ua faatulaga e toe valaau ai lana mataupu i luma o le faamasinoga maualuga.

IOE DAVID BROWN I LONA MOLIAGA

O le aso 23 Aokuso lea ua faatulaga e lau ai le faasalaga a le alii o David Brown i luma o le faamasinoga maualuga, ina ua talia e le faamasinoga lana tali ioe i le moliaga muamua lea ua toe suia e le malo, e faailoa ai le solitualfono o lona fesoasoani lea i se isi tagata e faatino le solitulafono o le talepe fale i le tulaga muamua.

I le tali ioe ai o Brown, 20 tausaga le matua i le solitulafono lea i lalo o se maliliega na latou sainia ma le malo, sa ia tautino ai i le faamasinoga e faapea, i se taimi o le po o le aso 9 Fepuari 2013 i Iliili, na la taupulepule ai ma le Joseph Iakopo e osofa’i se faleoloa i Iliili i le leva o le po ma le faamoemoe e faatino ai le solitulafono o le gaoi.

Na tautino Brown e faapea, na la tatala laupapa i le pito i tua o le faleoloa sosoo ai loa ma le la kikina o le faitoto’a o le umukuka, ma mafai ai loa ona la ulufale i totonu o le faleoloa.

Ina ua fesiligia e le faamasino sili ia Michael Kruse ia Brown pe aisea na la o ai ma Iakopo i totonu o le faleoloa, na tali le ua molia, na la ona o le faamoemoe e gaoi ni oloa mai totonu o le faleoloa.

I se tasi o vaega o le maliliega a Brown ma le malo ua maea ona sainia, e aofia ai le malie o le ua molia e galulue faatasi ma le malo i le faamasinoina o le alii o lo o tuuaia faatasi i laua i lenei mataupu, e ala i lona molimau lea ma le faamaoni i le faamasinoga o Iakopo pe afai ae manaomia ai o ia.

O lo o taofia pea le ua molia i le toese i Tafuna e faatali ai le aso lea ua faatulaga e lau ai lona faasalaga.