Ads by Google Ads by Google

Taula’i Ofisa Fefaatauaiga i le faaleleia o atina’e eseese i totonu o le atunuu

O le ripoti a le Matagaluega o Fefaatauaiga ua i luma nei o le afioga i le Kovana Sili, i le tuana’i ai lea o le ulua’i 100 aso talu ona tula’i mai le nofoaiga a Lolo ma Lemanu e taitai le malo, o lo o taua ai ni isi o atina’e tetele ua fuafua e tatau ona faataunuu i le isi 5 tausaga o lo o muamua.

 

O ni isi o ia atina’e tetele e aofia ai femalagaaiga i le va o Tutuila ma le motu o Aunu’u; polokalame e faaleleia ai tulaga tau faatoaga; suesuega i auala e gaosi mai ai le falaoa mata mai le fua o le ulu; faavaeina o se nofoaga autu mo le aufai faatoaga i Manu’a, atoa ai ma isi atina’e e pei o taaloga, faaleleia o le gataifale o Pago Pago aemaise ai o le faaleleia o fanua faasao a le malo i le Tafuna Industrial Park.

 

Ina ua faatoa tula’i mai le nofoaiga a Lolo ma Lemanu i le tausaga muamua lenei o le la nofoaiga, na poloaina ai e le alii kovana Faatonusili uma o Ofisa ma Matagaluega a le malo, ina ia saunia ni a latou ripoti i galuega ua mafai ona ausia i le tuana’i ai o le ulua’i 100 tausaga o le nofoaiga.

 

I le ripoti a le Matagaluega ua i luma o le alii kovana, o lo o taua ai Ofisa eseese o le malo o lo o latou galulue faatasi mo le faataunuuina o lana manulauti, i le fesoasoani lea i atina’e ma galuega i totonu o le atunuu.

 

O se faataitaiga o le aoaoga mo i latou e naunau e faavae ni a latou pisinisi sa faia i le aso 22 Mati 2013 e aunoa ma se totogi, sa mafai ai ona faasoa i tagata na faatasi atu i lea aoaoga auala e amata ai ona faavae ni a latou pisinisi.

 

O le ofisa o le Faletupe o Atina’e ma le Faalapotopotoga a le Aufaipisinisi i le atunuu o lo o galulue faatasi ma le Matagaluega o Fefaatauaiga mo lea polokalame.

 

O le atinaeina o le polokalame mo faatoaga fai i’a (fish farming program), o lo o galulue faatasi ai le Matagaluega o Fefaatauaiga ma le Kolisi Tuufaatasi, atoa ai ma le vaega o le Iunivesite a Hawaii o lo o faatupeina atina’e faapenei, mo le faatula’iina lea o se polokalame e 3 tausaga lona umi, mo le faia lea o aoaoga ma aoao i latou o lo o naunau e amata ni a latou pisinisi faapenei.

 

O le alii faipisinisi pa i’a ia Duke Purcell lea ua lauiloa i lana pa i’a tilapia o lo o i ai fo’i lona sao i le tuu faatasia o lenei polokalame, ina ia mafai ai ona fesoasoani i le aufai faatoaga o lo o i ai le naunau e faavae ni atina’e faapenei.

 

O le taua o le polokalame lenei o le a mafai ai ona unaia ofisa o le malo e faalauiloa penefiti e maua mai i le atina’e pa i’a, lea e tusa ma le 400 tane o le i’a e auina atu i fafo mo le gaosiina ai o taumafa i le aano o le i’a.

 

O le isi penefiti o le polokalame lenei o lo o mafai ona unaia ai tagata faipisinisi e faatau a latou pisinisi i po o aso Faraile muamua o masina taitasi i le maketi i Fagatogo, e pei ona amata mai i le tausaga na te’a nei, lea lava o lo o faaauau seia oo mai i le taimi nei.

 

O le faatupulaia o le faitau aofai o tupulaga talavou i totonu o nuu taitasi, o le a galulue faatasi ai le Matagaluega o Fefaatauaiga ma le vaega o lo o faatulagaina fuafuaga mo le teritori i le Ofisa o Aoga, Soifua Maloloina, Ofisa Loia Sili ma le Ofisa o Tupulaga Talavou & Tina ma Tamaitai, mo le faatulagaina o taiala e fesootai ma lenei mataupu.

 

O ni isi o auala o le a mafai ona faatinoina e aofia ai atina’e ma aoaoga i totonu o nuu ma itumalo, ina ia mafai ai ona auai fanau ua faauu mai aoga maualuluga ma sailia ai lumana’i mo i latou i polokalame eseese nei.

 

O le Iunivesite a Hawaii o lo o i ai foi lona sao i le tuu faatasia o lenei polokalame atoa ai ma le faatupeina.

 

I le tulaga o atina’e mo faatoaga, ua mafai ona tuu faatasia ona o le galulue faatasi a le matagaluega o Fefaatauaiga ma le Faatonusili o Faatoaga ia Leala M. Purcell, mo le faalauiloaina lea o atina’e eseese e unaia ai le aufai faatoaga e faaleleia ma faalautele a latou faatoaga mo le manuia o i latou aemaise ai o le atunuu.