Ads by Google Ads by Google

Tala otooto o Faamasinoga

IOE RYAN PITE I TUUAIGA A LE MALO

 

O le alii pagota lea sa tuuaia i lona ta tuia o se isi alii pagota i se fasi u’amea i le masina o Ianuari 2013, ua ia tautino i le Faamasinoga Maualuga i le taeao ananafi, e faamaonia tuuaiga faasaga ia te ia.

 

O Ryan Toga Pite, 22 tausaga le matua na ulua’i tuuaia e le malo i le moliaga mamafa o le faaoolima i le tulaga muamua, ae i lalo o se maliliega sa ia sainia ma le malo ma ua talia foi e le faamasinoga ua ia tali ioe ai i le moliaga feololo lea ua toe sui e le malo i le faaoolima i le tulaga lua.

 

Ua ta’utino Pite i luma o le faamasinoga e faapea, sa o la nofonofo ma Hymie Sefo i totonu o le la sela, na ia ta tuia ai Sefo i lona manava ma taofia ai Sefo i le potu tigaina i le falema’i i Fagaalu mo ni nai aso.  Na ta’utino fo’i Pite e faapea o lana gaioiga sa faia e le tusa ai ma ala o le tulafono.

 

O lo o taofia Pite i le toese i le taimi nei e faatali ai le aso 28 o Iuni lea ua faatulaga e lau ai lona faasalaga.

 

E tupu lenei faalavelave ae o lo o tuli le faasalaga o Pite mo le 28 masina, ina ua ta’usala o ia i moliaga o le gaoi ma le talepe fale.

 

VENITILATE MOTULIKI

 

O le taeao ananafi na faatulaga e faia ai le ulua’i iloiloga o le mataupu a Venitilate Motuliki i luma o le faamasinoga maualuga, ae ina ua valaau lana mataupu, na talosaga lana loia o Mike White ina ia faatulaga se aso e faia ai le faamasinoga autu o lenei mataupu.

 

O lo o taofia pea Motuliki i le toese i Tafuna i le taimi nei ina ua le mafai ona ia totogia le $75,000 na faatulaga e tatala ai o ia, e faatali ai le aso 16 Iuni 2014 lea ua faatulaga e faia ai lana faamasinoga autu.

 

E 11 tama’i taga pepa sa i ai vaega o le aisa na maua i totonu o se afifi na faatuatusi mai i le igoa o le ua molia, i le Falemeli i Fagatogo i le masina o Mati na te’a nei.  Ina ua alu atu Motuliki e piki mai lana meli, na taofia ai loa o ia ina ua masalomia e ta’ifau a le K-9 o lo o i ai vaega o fualaau faasaina i totonu o lana afifi.

 

COLIN BODE

 

Ua talia e le Faamasinoga Maualuga le talosaga na faaulu e le alii loia o Mark Ude, ina ia toe tolopo le ulua’i iloiloga o le mataupu a Colin Bode, ae se’i faaulu sana talosaga i le faamasinoga mo se avanoa e tuu faatasi ai mataupu e lua o lo o molia ai e le malo le alii o Bode.

 

O Bode na tuuaia e le malo i le masina o Mati na te’a nei i le moliaga mamafa e tasi o lona umia faasolitulafono lea o vaega o le laau faasaina o le mariuana. O lea moliaga na afua mai i le taimi na malaga mai ai mai i Hawaii ae maua ai e sui o le Ofisa o Tiute se vaega o lau mariuana i lona tino.

 

Ae na toe molia foi o ia e le malo i le moliaga o lona umia o se vaega o le pauta faasaina o le aisa, ina ua ia faailoa i se alii pagota na loka faatasi i laua i le toese, sa sau ma aumai se tama’i taga pepa o lo o i ai vaega o le aisa, peitai sa ia tago ma tia’i i le tulimanu o le Ofisa o Tiute i le Malae Vaalele i Tafuna a’o le’i oo atu alii Ofisa e siaki lona tino.

 

Ina ua sailia e sui o le Ofisa o le Tiute vaega o le latou Ofisa i Tafuna, sa maua i ai se taga pepa iila se tasi o lo o taatia ai, o lo o i ai i totonu vaega o le pauta faaasaina o le aisa.

 

O lo o tumau pea poloaiga o lo o tatala ai Bode i tua e faatali ai le aso 12 Iuni lea ua fuafua e toe tulai ai i luma o le faamasinoga.