Ads by Google Ads by Google

41 FANAU UA FAATAOTO I LE VAEGA ‘AU A LE MALO TELE

E toa 41 alo o le atunuu ua maea ona faatautu e avea ma su o le vaega au a le malo tele o Amerika i le vaiaso nei.

 

Na taua e le Recruiting Officer ia SSG Laban-Ilalio e faapea, e le mana’o e nofo pogisa matua o i latou nei i le tautoga ua maea ona latou osia ma vaega ‘au a le malo tele o le a galulue ai.

 

O SSG Laban- Ilalio na soifua a’e i Amerika Samoa nei, lea na faauu mai i le aoga maualuga a Fagaitua i le 1996, ma ulufale atu ai loa i vaega au a le malo tele ina ua 26 ona tausaga.

 

Sa ia taua e faapea, o le to’a 41 lea ua tauto nei, e tolu la’asaga o le a amata ai le latou tautua, o isi o le E1, o isi e E2 ma isi e E3. O le mafuaga, ona o ni isi ua mae’a umia fa’ailoga mai le Kolisi Tu’ufa’atasi po’o fafo fo’i, ae o ni isi o lo’o i ai taimi na avea ai e i latou le JROTC ma le ROTC a’o a’oga i le Kolisi, ae o nisi o lea fa’ato’a mae’a lava ona su’ea le suga a le ASVAB ma ua ausia maka e ulufale ai i le Army, ma ofo mai loa e avea ma fitafita.

 

O le fa’amanatu fo’i, “O le toniga, ua le na’o se Ofu mo oe, ae ua o atu fa’atasi ma se fa’ailo o lau Amiolelei ua e loto atoa e avea oe ma fitafita mo le Army, ae afai fo’i e ofuina, ia e mautinoa, ua e malosi a’ia’i e tusa o le Malosi o le US Army.”

 

Na fa’atula’ia i le tausaga 1775 peita’i, talu mai le tausaga 1973, o lo’o ofo mai lava tagata uma e fia tautua o ni fitafita i le Army. O lona uiga, mai le 1775 se’ia o’o mai i le 1972 sa tofia fa’amalosi mai talavou e a’otauina fa’afitafita pe Draft. O lona uiga, ua toeititi atoa le 40 tausaga o lea faiga, ma ua o’o mai ai le fuatiaifo i lou sui, e te avea ma fitafita e afua i le aso nei.

 

E fitu uiga mautu fa’apitoa ua fa’atulaga e le Army e ao ina mataituina i so’o sana Fitafita tautua: “O le Fa’amaoni, Tiute, Fa’aaloalo, Tautua A’ia’i, Lotomau, Tautua ma le loto atoa, ia Lototele!”

 

O le fa’aaloalo ia mataituina fo’i i taimi uma i e ua avea ma ta’ita’i, ia fa’apena ona e iloa patino le fa’asologa o tulaga tofi i totonu o le Vaega Au ma ia e tausisi i ai.

 

Faitau ma ia malamalama lelei i lau Konekarate ua mae’a sainia i lo oulua va ma le US Army! Afai e te tu’ua lou aiga ma fa’atasi atu mo koleniga amata o lou avea ai ma fitafita, ia e mautinoa e fa’ataua tele lou saogalemu ina ne’i e lavea, ona ono afaina ai lea o lou avanoa e te ausia ai lau sini o lou fia avea ma fitafita mo se taimi umi.

 

O le fa’alogo i fa’atonuga ma usita’i i ai, e sili ona mataituina i taimi uma, ma e teuina fo’i i lou loto i taimi uma lau tautoga o se fitafita. Mo matua ma Aiga sa matua faia lava le fetufaaiga, ina ia mautinoa ua talia fesili, ia le toe sasi se lagona o se tasi pe afai e le maua mai se telefoni mai le fanau pe’a tu’ua le atunu’u.

 

“Ia outou iloa lelei, a le maua mai se tala po’o se vala’au, aua le popole, o le tala sili lena ona lelei mo outou matua ma aiga!” Ua fautuaina fo’i e na’o tusi lava e mafai ona meli atu mai i’inei mo fanau i BT pe momono fo’i i ai se ata la’ititi mo i latou e fa’amalosi’au i taimi fita o koleniga, ae o nisi mea uma, e fa’asa, e tatala e le ta’ita’i’au meli uma i taimi o BT.