Ads by Google Ads by Google

TELE FOLAFOLAGA FONO MO TAGATA MATUTUA AE LE’I TAUNUU LAVA

“E LE O TOE MANA’OMIA E TAGATA MATUTUA NI ALOFAAGA TUSI PEPA”

 

E foliga mai ua tele folafoalga ma polomisi ua tuuina atu e le Fono Faitulafono i le Ofisa o Tagata Matutua, le TAOA ae leai lava ma se folafolaga ua taunuu.

 

O nei folafolaga e aofia ai le sauni o le Fono Faitulafono e tuu atu lona tauau e fesoasoani ai i le TAOA i le itu tau tupe, ae oo mai lava i le taimi nei e augapiu ma se mea ua faia.

 

Ae na taua e ni isi o tagata matutua na mafai one fesiligia e le Samoa News i le vaiaso nei, “ua oo i le taimi ua le toe manaomia ai ni folafolaga ma ni alofaaga tusi pepa e pei ona faia i sailiga tupe a nuu ma afioaga, ae ua tatau ona faatino le alofa.”

 

O lo o manino i se vaega o le Ripoti mo le Kuata Lua o le Tausaga Tupe lenei a le Ofisa o Tagata matutua i Pago Pago e faapea, ua tele folafolaga a le Fono Faitulafono sa tuuina atu i le TAOA i fesoasoani tau tupe o le a latou tuuina atu, peitai e oo mai lava i le taimi nei e leai ma se folafolaga ua faia.

 

O le ripoti a le TAOA na saunia lea e le susuga Kuresa Paopao o lo o pulea le vaega o tupe ae faamaonia e le afioga i le Faatonusili, le tofa Ale Tifimalae a’o le’i tuuina atu i le afioga i le kovana sili ia Lolo Matalasi Moliga.

 

O le agaga o le ripoti, o le fia faailoa lea o alagatupe mai le feterale o lo o faatupe ai polokalame o lo o agavaa ai tina ma tama matutua e pei o ‘Food Voucher’ atoa ai ma polokalame o lo o maua ai e tama ma tina matutua avanoa faigaluega.

 

O lo o taua i le ripoti e faapea, e toa 149 tama ma tina o lo o galulue i lalo o polokalame le tumau o lo o faatupe mai e le feterale, ma le silia i le toa 200 o lo o i ai o latou suafa i le lisi faatalitali.

 

O le isi tautua foi lea e le’i leva ona amata e le TAOA mo tagata matutua e le atoatoa le malosi o le tino, o le faaaoga lea o taavale e momoli ai i latou mo a latou talavai i le falema’i, po o taimi fo’i o a latou mataupu i Ofisa o le malo, pau le talosaga a le Ofisa o lo o manaomia ni isi taavale e fesoasoani i le latou taavale e tasi o lo o faaaoga i le taimi nei.

 

Na faalauiloa e le Kovana Sili ia Lolo Matalasi Moliga i le faamanatuina o le aso mo Tagata Matutua i le vaiaso nei e faapea, ua mafua ona manatu le malo e ave lana lagolago i le aso o tagata matutua, ia aloaia ai la latou tautua i tausaga ua mavae, lea ua mafua ai ona a’e malo le sailiga manuia a Tutuila ma Manu’a e oo mai i ona aso nei.

 

Ua tele talosaga ua maea ona tuuina atu e ni isi sa avea ma Faatonusili o le TAOA i le Fono mo se tupe mai le malo e fesoasoani ai i le faatupeina o polokalame mo tagata matutua, peita’i e oo mai lava i le taimi nei, e leai ma se tupe ua tuuina atu e le malo sei vagana ai lava tupe mai le feterale lea o lo o faatupe ai polokalame a tagata matutua.