E 40 masina lea ua faasala ai e le Faamasinoga Maualuga le alii o Sitau Ofoia Jr e taofia ai i le toese i Tafuna, ina ua faamaonia e se vaega iloilo iuga i le aso 12 o Mati moliaga mamafa e tolu sa tuuaia ai o ia e le malo, ona o le faalavelave lea na ia so’aina ai le tuagane o lona to’alua i lana taavale, ma ona faaogaina se pate kirikiti sa i tua o lana pikiapu e sasa ai le ulu o lea alii, e pei ona taua e molimau i luma o le faamasinoga.

Na molia Ofoia i moliaga e lua o le faaoolima i le tulaga muamua ma le moliaga o lona taumafai e fasioti se tagata.

E 10 tausaga i le moliaga e tasi na manatu le faamasinoga e loka ai Ofoia, peitai ua finagalo alii faamasino o le a faamalumalu lea faasalaga, ae nofovaavaaia i lalo o ni poloaiga e ao ona usita’i i ai e aofia ai le faasa ona ia toe tagofia le ava malosi, ma ia auai i ni aoaoga e fesoasoani ai i aafiaga o le ‘ava malosi ma le ita.

E ui na taua e le faamasinoga lo latou talitonuina o le toatele o aiga ma le nuu o lo o lagolagoina lenei alii, peitai ua faia le latou faaiuga ina ia mafai ona latou pulea le ua molia mo se taimi umi, ona o solitulafono ua ta’usala ai o ia e matuia, e faigata foi i le faamasinoga ona faamagalo.

E fa molimau na valaau e le itu tete’e i le taeao ananafi, na aofia ai le tama o le toalua a Ofoia, le Sa’o o le aiga, le afioga Ufuti Faafetai Ieremia, o lona “aunty” o Sa Ulugaono Tinitali, o lona ‘uncle’ le afioga ia Faamausili Mau Mau Jr, ma le sui o le afioaga i Vaitogi, le tofa a Mase Akapo.

Na taua e Ufuti ma Sa i a la molimau e faapea, o Ofoia, o se alii e tautua nuu, ekalesia aemaise ai le aiga, o se alii foi e faamaoni ma loto maualalo, ae o ia foi o se tasi o lo o fai ma faataitaiga lelei i tupulaga o le aiga, nuu ma le ekalesia.

Na molimau Ufuti e faapea, talu mai le taimi na faaipoipo ai Ofoia ma lona afafine i le tausaga na tea nei, sa avea o ia ma taule’ale’a tautua i totonu o lona aiga, ao ia foi o se tasi e faauluulu i ai le aumaga a le afioaga o Vaitogi, ma o ia o se tagata e faatuatuaina i soo se mea fai a lona aiga, nuu ma le ekalesia.

Sa lagolago foi i ai ma molimau a Faamausili ma Mase i molimau muamua.  Fai mai Mase, ina ua toe tatala atu i tua Ofoia, na alu atu ma toe faatoese i le nuu ma le aumaga e tusa ai o le faalavelave na aafia ai, ma o iina na iloa ai e le nuu le tagata ua salamo moni.

Na umi se taimi o faasolo le faatoesega a le ua molia, i le faamasinoga ma loia, i lona nuu, ekalesia, o aiganalua aemaise ai le alii na aafia ona o le solitulafono sa ia faia, ma faaiu ai lana faatoesega i lona talosagaina o se isi avanoa.

Ae i le faafinauga a le loia o lo o tulai mo le malo ia Julie Pasquale, sa ia taua ai e faapea, e ui o lea ua tele faamatalaga e faatatau i itu lelei o Ofoia ae tatau ona silafia e le alii faamasino e i ai foi itu leaga o lenei alii, e pei ona sa ta’usala ai o ia i le 2009 i le faaoolima i le tulaga lua ma loka ai foi i le 20 masina, o tuutuuga ia o lona nofovaavaaia mo le lima tausaga, i lea faasalaga.

Na ta’ua e Pasquale, o lea na nofovaavaaia Ofoia,ae o lea foi ua toe molia mai i lenei solitulafono.