Vaega: 53

Taeao manuia, i le mamalu o le atunu’u ae maise o le au faitau, e i ai pea le fa’amoemoe, o lo’o manuia tutusa pea i tatou i le tausiga alofa a lo tatou Matai i le lagi. Ae alo maia, o le a toe fa’aauau atu la tatou tala fa’asolo, Alofa, se ia tiga e pei ona i ai nei, ae ia manuia lava faiva ma tiute o le a feagai ai i lenei aso.

Ua fa’aauau pea la ma talatalanoaga ma lo’u tuagane o Ioane, ua fofola i lumamea mea uma. i lo’u fa’alogologo atu i le talanoa mai ai lo’u tuagane la’ititi, ua pulea uma e Makerita ma Peteru mea uma, o lona uiga, ua le iloa e lo’u tama le mea o le a fai. O le isi fo’i fa’amatalaga a ioane, ua fa’apea mai, o mea uma o le pisinisi ma kamupani a lo’u tama, ua o’o i ai le a’ao malosi o Peteru ma Makerita.

Ua ou nofo nei ma le mamafa o lo’u loto, o lea ua ou iloa mea uma, ma e foliga mai pe a ou manatua le tala a Ioane, ua leai se mea e maua e si o’u tuagane la’ititi, ona o lea ua pulea uma e Peteru mea uma. O le isi tala a lo’u tuagane ia te a’u, o mea uma lava i fa’atoaga ma tagata faigaluega a lo’u tama, ua o’o i ai le pule a Peteru.

O lona uiga, o lo’o faufau e Peteru ma Makerita mea leaga e fa’asaga ai i lo’u tama, ae maise lava ia te a’u, ona o lea ua iloa nei, ma ua leva fo’i ona iloa e Makerita, o a’u e le o sana tama moni na fanau mai i lona manava. O a’u o le tama a le fafine ‘ese ma sa le i mamafa ia te a’u lea tulaga, ae pau lava le mea ua ou lagona ai lo’u fa’anoanoa, ona o lo’u manatu alofa i si o’u tama e pele i lo’u loto.

Ina ua ma’ea le ma talatalanoaga ma si o’u tuagane, na maua ai loa ma le tonu, o le a matou nonofo pea se ia ma’ea lo’u fa’au’uga ona matou toe fo’i loa lea i lo matou aiga. Ua lagona fo’i le fiafia o ioane, ina ua ia maua sana uo la te talatalanoa ae maisea ai o lona fiafia e mafuta ia Tino.

Na tu’u mai nei e lo’u tuagane ia te a’u le tusi mai i lo’u tama ina ua alu ane e asi a’u. O le tusi fo’i la lea, sa ou mautino ai ma fa’amaonia ai le sa’o ma le moni o fa’amatalaga a lo’u tuagane lea na fai mai ia te a’u e uiga i lo matou aiga, ma le tulaga ua o’o i ai.

O upu nei o le tusi a lo’u tama, “Averia lo’u afafine pele, o si ou tuagane lena ua alu atu e asi atu oe, sa muamua lava fesili mai ia te a’u, ma na tali i ai, ioe, e alu atu se i lua feiloa’i. O le tulaga ua o’o i ai lo tatou aiga Averia, ua o’o i se tulaga pagatia, ona ua ou iloa lelei lava le mea o lo’o fafau e Makerita ma Peteru e fa’asaga mai ai ia te a’u. Atonu fo’i o le a e maua se tala i si ou tuagane lena ua alu atu e asi atu oe.

“Averia, lo’u afafine pele, ‘aua ne i e popole mai ia te a’u, o lo’o pule alofa le Atua o lo’o maua pea lo’u malosi, ae o la’u talosaga ia te oe si o’u afafine, ia e onosa’i ma e loto tele ua toetiti ona ma’ea lea o lau a’oga. Ae ou te o’o atu mo lou fa’au’uga, ou te le o iloa ia Makerita ma Peteru pe o atu, a’o a’u, e le mafai ona ou misia lou fa’au’uga, atonu o le avanoa lelei lena ta te talatalanoa ai. O lo’o ia te a’u au ripoti uma lava, ma ou te momoli atu ai la’u fa’amalo ia te oe lo’u afafine pele, malo le finau, malo le tauivi, ia e manatua pea, o le poto ma le atamai, o meaalofa mai le Atua, ae a leai se fa’autauta o le tagata ma leai sona alofa, e leai se aoga o mea uma.

“Averia, o la’u tusi atu lena ia te oe, ae fai lelei si ou tuagane lena ua alu atu, ou te alofa tele mo oe si o’u afafine pele, o lou tama.”