Ads by Google Ads by Google

Toe filifilia Faletagoa’i avea ma senatoa itumalo Alataua

O le fonotaga a le Itumalo o Alataua lea na usuia i le afiafi o le aso Tofi na te’a nei i Seetaga, na toe tasi ai le filiga ina ia avea pea le afioga ia Faletagoa’i Iati Tuiolemotu, e fai ma sui o le Itumalo i le maota maualuga o le Senate.E ui o le faaiuga lava lea na mua’i tasi i ai le Itumalo i lana fonotaga i le masina o Tesema 2012, peitai na toe faamautuina i le vaiaso nei ina ua tuuina mai le faaiuga a le Vaega Iloilo o le Faamasinoga Maualuga ma taua ai le avanoa pea lea o le nofoa o le itumalo, ona e le’i tausisia aiaiga o lo o faataoto i le Faavae i le tofiaina o senatoa a itumalo.Na taua e ni molimau mai le itumalo i le Samoa News e faapea, e lei umi se taimi na usuia ai le fono a le itumalo ae maua le faaiuga, o Faletagoa’i lava na te toe faaauauina le tofi.Na taua e le molimau e faapea, ina ua maua le avanoa e tulei saunoa ai ni isi o faauluuluga o le itumalo i lea fonotaga, na toe faaleleia ai ni isi o tulaga lavelave na tulai mai, ona o le mataupu e pei ona tuuina atu i luma o le Faamasinoga.Na taua e molimau e faapea, sa auai uma itu e lua o le Itumalo, le Tapuaiga ma Samatua i lea fonotaga, ma sa maua foi le avanoa e fetalai ai le tofa i le tau tootoo ia Faletogo Taliloa e tusa ai o fatia ua sola, ma faaiu ai lana saunoaga i lona tuuina atu o faamanuiaga i le afioga a Faletagoa’i mo le tauaveina o le nofoa o le itumalo.O le taimi nei,o loo avanoa pea le nofoa o le itumalo o Alataua i luma o le Senate, ma e ao ona toe uia tu laga uma e pei ona masani ai, o le faamaonia mai lea e le Ofisa o Mataupu Tau Samoa o le faaiuga a le itumalo, ma tuuina atu ai loa se tusi i le Peresetene o le Senate e faailoa i ai le faaiuga, ao le’i oo i le aso e toe faatautoina ai le afioaga a Faletagoa’i.