O LE PAEPAE MA’A A APAULA I TUFUTAFOEO se tasi lenei o Vavau e uiga ese fo’i lona faamatalaina, ona o loo maua ai nisi o Vavau iloga o le atunuu e pei o le paepae ma’a o loo i Tufutafoe i Savai’i, lea o loo faaigoaina o le paepae ma’a a Apaula, faatasi ai ma le ‘ana ua taua o le ‘ana o Vaatausili. O le talatuu ma le mau a tagata Tufutafoe e faapea, o Apaula, o le tamaitai Fiti ae sa nonofo ma le tagata e igoa ia Vaea. Na malaga Sina e asiasi i lona aiga i Fiti, ao mamafa i lana tama ulumatua. Fai mai ao alu le vaa lea o loo malaga ai Sina i Fiti, sa ia iloa mai lona toalua o Vaea, o loo tu tu atu pea i le vaega e taua i Savalalo i Apia, o loo talotalo atu lona lima ia te ia, ma ina ua fanau le lana tama, ona ia faaigoaina lea ia Tuisavalalo, e faamanatu ai le taimi lea na tu mai ai Vaea i Savalalo ma talotalo mai lona lima ia te ia. Ua tupu tupu ae le tamaititi o Tuisavalalo i Fiti i le aiga o lona tina, ma sa itagia o ia e tuagane o lona tina, ona o ia o le Samoa, ma iu ina pu’e ai e tuagane o Apaula le tama o le a fai ai la latou alofisa i se tasi aso, ona sola mai ai loa lea o Apaula e tau mai ia Vaea i Samoa, le tala faanoanoa ua oo i lona atalii, peitai fai mai le tala, e taunuu mai Apaula, ua toeititi lava uma le tino o Vaea ona liu mauga, ma ua le toe mafai foi e Vaea ona toe fai se isi gaioiga e fesoasoani atu ai ia te ia, ma fai mai le mau a Samoa, o iina lea na mafua ai le upu faamuagagana e faapea, “ua taunuu mai Apaula ua tautua.”O lona uiga, ua taunuu mai Apaula ua tuai, ua leai se aoga ona ua liu mauga Vaea. Sa faailoa e Apaula ia Vaea tulaga uma o lona sola ese mai i Fiti, faapea ai ma le agaleagaina o ia e ona tuagane faapea ai ma le taumafai o ona tuagane e fasioti lona atalii, ona ita ai lea o Vaea ona o le alofa i lona atalii, peitai ua faigata ia te ia ona toe fai se isi gaioiga e tali atu ai i le mafatia o Apaula. Sa faapea atu loa Vaea ia Apaula, “Sau ina e alu i Savaii, e te maua i ai lo’u uso o Vaatausili, o ia lena o le tali i ou mafatiaga.” Sa fai atu Vaea, “Afai e te taunuu i Savaii, ona e agai lea i le nuu o Amoa i le Faasaleleaga, e te maua ai se tamaititi o ta pepe ai i le ala, ona e fesili lea i ai poo fea e te maua i ai Vaatausili, ona e alu lea i ai e faailoa i ai tulaga uma o lou oo mai, o le ia fesoasoani foi ia te oe.”Fai mai le tala, ona malaga ai lea o Apaula i Savaii, ma ui atu i le nuu o Amoa, ma ia tau atu ai i se tamaititi o loo ta pepe i le alatele, ona fesili lea i ai o Apaula, pe na te iloa se mea e maua i ai le tagata e igoa ia Vaatausili, peitai sa tali ane le tamaititi ia Apaula, o ia tonu lea o Vaatausili, peitai sa le talitonu Apaula ona afai o le tino lea o le tamaititi lea, e faapefea ona ia tali i lona mafatiaga o loo i ai, peitai sa toe fai atu le tamaititi ia Apaula, o ia moni lava lea o Vaatausili, ma e ui i se le talitonu o Apaula sa i ai, ae ua ioe lona loto, o Vaatausili moni lava lea ua la feiloai.