Ads by Google Ads by Google

SAUNI STARKIST MO LE TOE AMATAINA O GALUEGA 2013

Ua sauni le pulega o le kamupani i’a o le StarKist Samoa mo le toe foi atu i ana galuega masani i le tausaga fou, e aofia ai ma le faa faigaluegaina lea o ni isi mai Amerika Samoa nei latou te faatumuina avanoa o i latou ua malaga atu i Upolu ma Savaii ma le toe fo’i mai.

O lea fuafuaga na mafai ona faamaonia mai e le pulesili a le kamupani ia Brett Butler ma le Pule Lagolago ia Taeaoafua Meki Solomona, ina ua faalauiloa la latou fesoasoani mo aiga Samoa sa pagatia i le afa o Evan i le vaiaso na te’a nei.

O le aso Faraile na sosoo ma le aso Kerisimasi na te’a nei na malolo ai le kamupani mai ana galuega masani mo le umi e 2 vaiaso, ma le faamoemoe o le aso Gafua, Ianuari 3 2013 o le a toe amatalia ai galuega a le kamupani.

O le taimi nei, o le silia i le toa 2,000 tagata faigaluega a le kamupani sa masani ona galulue i le faamamaina lea o le i’a atoa ai ma le tuuapaina, ua malolo mai galuega, ma o le toatele o i latou ua malaga asiasi atu i aiga i Samoa ma le faamoemoe, o le toatele lava o le a toe foi mai ae o ni isi o le a le toe foi mai.

Ae tusa ai ma gaioiga masani a le kamupani i ana malologa uumi o le kerisimasi ma le tausaga fou i tausaga taitasi, e tatau lava ona saili ni isi tagata faigaluega e faatutumuina avanoa o i latou o le a le toe foi mai.

O malaga a le vaa o le Lady Naomi i le vaiaso ao lumanai le kerisimasi faapea ai ma le vaiaso nei, na vaaia ai le toatele o tagata faigaluega a le kamupani o le StarKist Samoa ua malaga asiasi nei i aiga i Upolu ma Savaii.

O le toatele o i latou sa malaga ma faaoso aemaise ai o le naunau e fia fesoasoani i aiga na afaina ma mafatia, ona o le afa malosi o Evan lea na pagatia ai Samoa i le lua vaiaso talu ai, lea ua mafua ai ona leai ni fale e nonofo ai le silia i le toa 4,000, atoa ai ma le faaleagaina o le silia i le 10,000 maota ma laoa o aiga i nuu taitasi.

Ae na taua e ni isi o tagata faigaluega a le StarKist ua malaga atu nei i Samoa, e ui i le tulaga pagatia ua i ai aiga i Upolu ma Savaii, peitai o le faanaunauga e toe fia foi mai e galulue i galuega i Amerika Samoa nei, ma fesoasoani atu i aiga i Samoa.

“Ua ou fiafia ina ua ou maua lenei avanoa ou te malaga asiasi isi o’u aiga i Savaii, e asi nai o’u matua i taimi fiafia o le tausaga, peitai e ui i le lagona fiafia ua ou malaga, ae o lo o i ai foi le manatu e toe fia foi mai e faaauau lau tautua i le kamupani ua silia ma le 10 tausaga o o’u galue ai, le kamupani a le StarKist Samoa,” o le molimau lea a le alii o Fareti Uga o Faasaleleaga.

Na fesiligia le susuga Uga pe o i ai sona manatu e le toe foi mai i Amerika Samoa, na ata le alii ma fai mai, “ou te toe foi mai i la’u galuega, leaga o lo’u lumana’i lea.”

O le toatele o tagata faigaluega a le kamupani sa malaga uma ma aiga e aofia ai taitoalua ma fanau, ma ua avea ai malaga faaiu o lenei tausaga o se taimi fiafia lea mo i latou e asiasi ai i aiga.

Na taua e Malaga ma Tisa o Vailele, talu mai le 5 tausaga talu ai, o se taimi muamua lenei ua malaga faatasi ai lo la aiga e asi o la matua i Samoa.

“O le ma fanau e toatolu lea na fananau i Amerika Samoa nei, e leai ma se isi ua oo i Samoa, ma o le taimi muamua lenei ua matou malaga faatasi uma ai, o se fiafiaga foi lea i le ma fanau ina ua mafai ona matou malaga faatasi,” o le molimau fiafia lea a le ulugalii ma le faamoemoe, e toe taliu mai i le vaiaso fou ao lumanai ai le toe amataina o galuega ma aoga i le atunuu.

Ae ui o lo o toatele ni isi o tagata faigaluega a le kamupani o lo o naunau e toe fia foi mai i le atunuu ona o galuega, peitai na taua e ni isi o lo o tau saili ni a latou galuega i le taimi nei, soo se ituaiga galuega lava e maua i le tausaga fou, o le a tumau ai loa ma faamaoni ai mo le tausiga o aiga.

Ao lei malolo galuega a le kamupani i le vaiaso na tea nei, na tofu le tagata faigaluega e taotasi ma pusa apa wahoo e tolu e alu ma ia e fai aso fiafia ai i lona aiga.

Saunoa le tofa ia Taeaoafua e faapea, o meaalofa sa tufatufaina atu i tagata faigaluega, o lo o momoli faatasi atu ai ma le agaga faafetai o le pulega ma le kamupani atoa, ona o galuega sa latou faatinoina i lenei tausaga.

O le tausaga fou 2013 o le a faamanatuina ai le 50 tausaga talu ona taunuu mai le tautua a le kamupani o le StarKist Samoa i le teritori.

E ui e lei mautu mai ni fuafuaga atoa ai ma se polokalame mo lea faamoemoe, peitai na faailo mai e le tofa a Taeaoafua e faapea, o se tasi o suiga fou o le a i ai le tautua a le kamupani, o le a le toe i ai le apa wahoo lea o lo o maua i le taimi nei, ae o le a ese foi le ituaiga apa lea o le a aumai i fafo e sili atu foi lona tofo lelei i le tausami a le atunuu.