Ads by Google Ads by Google

Fautua e Savali le Loia Fono iloilo mataupu a Vui Florence Saulo

Ua tuuina atu nei se fautuaga a le afioga i le Fofoga Fetalai o le Maota o Sui a le Fono Faitulafono i le Loia Fautua a le Fono, mo se avanoa e faia ai sana suesuega faapitoa i le mataupu a Vui Florence Saulo, pe agava’a ona ia tauaveina le tofi o le Itumalo.

I se talanoaga ma le tofa Savali Talavou Ale i le amataga o le vaiaso nei i luga o le telefoni e uiga i lenei mataupu, e le gata sa ia faamaonia mai ai le tuuina atu o lana fautuaga i le alii loia e iloilo ai lenei mataupu, ae sa ia faamanino mai foi i le Samoa News ni isi o mafuaaga o lana fautuaga.

“Ua maea ona tuuina atu sa’u fautuaga i le loia a le Fono, ina ia faia sana sailiiliga e faatatau i le faaiuga a le Vaega Apili o le Faamasinoga Maualuga e faatatau i le mataupu a Vui, ma tuuina mai ai sana fautuaga e tusa ai o lea mataupu a’o le’i o’o atu i le aso e faatautoina ai Faipule ma Senatoa o le nofoaiga fou a le Fono Faitulafono,” o le saunoaga lea a Savali.

Saunoa Savali e faapea, o le faaiuga ua tuuina mai e le Faamasinoga, ua lagalaga ai ni isi o mataupu e talitonu o ia e agavaa ona vaavaai i ai le Fono.

I le avea ai o ia ma Fofoga Fetalai o le Maota o Sui mo le nofoaiga lenei, na taua ai e Savali le tatau lea ona faamanino o ni isi o mataupu o lo o tula’i mai, ina ia tali ai fesili a ni isi o lo o tuu fesili i lenei mataupu.

“E le vave se faaiuga i lenei mataupu, ae tatau lava ona tuuina mai muamua se fuatuaga a le loia o le Fono, ina ia manino tulaga e pei ona tulai mai,” o le saunoaga lea a Savali.

O Vui na manumalo i le isi nofoa o le Itumalo o Tuala-uta i le maota o sui, i le palota na mavae atu nei, peitai sa faila e ni isi se toalua sa latou tauva faatasi i le palota sa laua tagi i le Vaega Apili o le Faamasinoga Maualuga, ma la taua ai le le agavaa o Vui e tauva mo le tofi a le Itumalo, ona e le’i tuuina atu lona pepa fanau e mafai ai ona agavaa e tauva i le palota.

O i laua na tagi i le Faamasinoga o Lucia Bartley ma Esther Wall, lea sa faila le la tagi faasaga ia Vui ma le Komesina o Palota, le afioga Soliai Tuipine Fuimaono.

Ae i le faaiuga a le Vaega Apili o le Faamasinoga Maualuga sa tuuina mai e faatatau i lenei mataupu, sa le’i tuuina mai ai se faaiuga faasaga i le tagi a Wall ma Bartley, ina ia faaleaoga le avea o Vui ma sui tauva o le Itumalo i le palota ona e le’i tuuina atu lona pepa fanau e faamaonia ai le avea o ia ma sui tauva.

Fai mai le Faamasinoga, e leai sona malosi e iloilo ai lea mataupu, ae o isi vaega o lo o aofia ai i le tagi e pei o le gagana sa faaaoga i pepa palota, atoa ai ma isi lava aiaiga tau i le palota, e manaomia ai i laua sa tagi ina ia saili se isi fautuaga ao le’i oo atu i le palota.

O le aso Tofi o le vaiaso fou i le itula e 12:00 i le aoauli o le a faatauto ai le Nofoaiga lona 33 a le Fono Faitulafono, ma o lo o i ai le faanaunauga o le Fofoga Fetalai, e tatau ona oo atu i le aso lea ua maea ona faia se faaiuga e faatatau i lenei mataupu