O le alii talavou lea o lo o faa falepuipui mo le 30 tausaga ona o le moliaga o le fasioti tagata na ta’usala ai o ia e le faamasinoga, ua toe faaopoopo atu nei i lana faasalaga lea isi fitu tausaga, ina ua ia ioeina le moliaga o le talepe fale i le tulaga muamua.

A’o lei tuuina atu le faasalaga a le faamasinoga maualuga mo le alii pagota o Mark Faipaua i le vaiaso na tea nei, na faatoese le ua molia i luma o le faamasinoga ma le malo o Amerika Samoa e tusa ai o le solitulafono ua ia faia.

Sa ia faatoese foi i lona aiga atoa ai ma le kamupani o le Toos Shop, ina ia faamagalo se sese ua ia faia, ma ia tautino ai i le faamasinoga o ia ua toe fia foi i lona aiga.

Na faaopoopo atu i le talosaga a Faipaua le talosaga a lana loia fautua o Leslie Cardin, ma ia talosagaina ai le faamasinoga ina ia aua nei toe faaopoopoina se isi faasalaga faa falepuipui mo Faipaua, a ia tuli faatasi se faasalaga fou ma lana faasalaga tuai o lo o tuli i le taimi nei.

Na uluai tuuaia e le malo le alii o Faipaua i le moliaga o le talepe fale i le tulaga muamua ma le gaoi, ma o ia moliaga sa afua mai i le faalavelave lea na ia osofaia ai le faleoloa o le Tools Shop i Tafuna i le masina o Iulai 2009, ulufale i totonu ma gaoi ai ni isi o mea aoga sa i ai e aofia ai ma se tinoitupe.

Na faamanino e le alii faamasino sili ia Michael Kruse i luma o le faamasinoga e faapea, i  se vaega o le ripoti a le Ofisa Nofovaavaaia o lo o taua ai e faapea, e ui o le masina o Iulai 2009 na faatino ai e Faipaua le solitulafono lenei, ae o le masina o Setema o le tausaga lava lea na faatoa ai le ripoti a leoleo ma tuu atu ai loa i le Ofisa o le Loia Sili mo le failaina lea o moliaga faasaga ia Faipaua, peitai e lei faila e le malo moliaga faasaga i le ua molia i le masina lea, ae o le masina lava lea o Setema 2009 na faia ai se inugapia a Faipaua ma ni isi o alii, ma faai’u ai loa i lona faaoo o le oti i se tagata.

Saunoa Kruse, ana vave faila e le malo moliaga faasaga ia Faipaua i le mataupu lea na ia talepeina ai le Toos Shop, e le tulai mai le faalavelave lea na oo ai le maliu i le tagata na aafia.

Na fesili le alii faamasino i le loia a le malo pe aisea na mafua ai ona tuai le failaina o lenei mataupu, peitai na tali le tamaitai loia o Julie Pasquale, (o ia o se tamaitai loia fou e lei leva ona galue i le Ofisa o le Loia Sili,) na te le iloaina le mafuaaga.

Na taua e Julie, o le mataupu lenei sa tauaveina e le alii loia o Cable Poag lea ua ia tuua le teritori ma toe foi atu i fafo.

O le isi mataupu na laga e le alii faamasino sili, o tuuaiga faapea sa sola foi i tua le ua molia ao tuli ai lona faasalaga, peitai na faamanino e Julie e faapea, o se tasi o vaega o le maliliega aufaatasi lea na sainia e le malo ma Faipaua, o lona tali ioe lea i le moliaga o le talepe fale ae ua manatu le malo o le a le moliaina o ia i le solitulafono o le sola ese lea mai le toese.

I le maea ai ona iloiloina e alii faamasino o faafinauga atoa ai ma faamaumauga uma o lenei mataupu, sa faaiuina ai loa e faapea, o le a faasala Faipaua i le toese mo le 7 tausaga, ma o lea faasalaga o le a tuli pe afai ae uma ona tuli le faasalaga e 30 tausaga o lo o tuliina nei.

O afioga i alii faamasino lagolago ia Logoai Siaki ma Faamausili Faasua Pomele na lagolagosua i le alii faamasinoga i le iloiloina o lenei faaiuga.