FAATONU AOAO FEFAATAUAIGA A LE LALOLAGI - MATAI SAMOA

Ua fa’ailoa mai e Samoa, ua mae’a fa’anofo le ali’i Fa’atonu Aoao o le WTO Fefa’ataua’iga a le Lalolagi i lona suafa matai “AmomuaaleTuiAtua” i lana asiasiga sa o’o mai ai i Samoa mo le aso lava e tasi. O le afuaga o lea igoa, e pei lava ona fa’aleoina, o lo’o ia te ia se tiute tele na’ua mo Samoa ma ona tagatanu’u, “muamua amo mai lau avega, oloa fa’atau atu a Samoa ia alumia i ni maketi i fafo!”
O Pascal Lamy, lea ua fa’asuafaina nei e le afio’aga o Luatuanu’u, ina ia fa’amau ai fo’i lana ulua’i asiasiga i Samoa, fa’atasi ai ma le fa’amau ai fo’i ma lona agaga i Samoa, ina ia va’ai toto’a i avanoa mo Samoa e ala i fefa’ataua’iga.

I se avanoa sa tu’uina ia Amomua Lamy, na ia saunoa ai e tusa ma lona suafa matai, “E ui ina faigata ona ou fa’aleo, ae ou te masani ai lava i se taimi e le o toe mamao, peita’i, o le fa’aeaga ua tu’uina mai e Samoa ia te a’u, ou te talia ma le agaga fiafia, ma ou te taumafai fo’i ia o’o mai sa’u tautua i lo’u nu’u ua latou aumaia lenei suafa matai ia te a’u.

E fou ia te a’u le agaifanua ma le aganu’u matagofie a Samoa, Ina ua mae’a lea sauniga mamalu, sa i ai se taimi avanoa o Amomua ma le sui Palemia, o ia fo’i le Minisita o Fefa’ataua’iga ma le Atina’e: Fonotoe Pierre Lauofo.

ALUMIA MAIMOAGA ATA TIFAGA ‘HOBBITS’ - NIU SILA

O le taimi nei ua matua alumia lava maimoaga i ata tifaga o lo’o pu’ea fa’apitoa i Niu Sila, ma ua fa’ailoa mai, “Ua matua fiafia tagata uma e maimoa nei ata i fale tifaga tetele i Niu Sila, ae le gata i lea, ua o atu tagata e maimoa, ae ua la’eia e i latou ofu ma teuga a tagata o lo’o i ai i le ata lea “Hobbit:Vaega muamua.”

Ua fa’ailoa mai e tolu vaega o le ata lea o le “Hobbit” ua taumafai ona pu’ea atoa i Niu Sila. O le vaega muamua lea ua mae’a tu’ufa’atasia, ma ua fiafia le Kamupani Fai ata tifaga e amatalia ona fa’aali lea ata pe a mai se latou alumia.

O le faletifaga tele i le laumua o Niu Sila, Wellington’s Embassy Theatre na matua tau fa’aofiofi tagata, ma ua iloga ai le to’atele o nisi fo’i ua lolofi mai le tele o a’ai tetele o Niu Sila ina ia auai i lea lava ulufa’i fa’aaliga o le “Lord Of the Rings.”

O le tala mai, o le to’atele o e na fia maimoa, e tusa ma le tolu aso o lo’o ua mae’a momoe ai i autafa o lea fale tifaga tele, ma sa latou maimoaina fo’i le fa’asolo mai o sui o lo’o auai i le au fai ata tifaga ma a latou teuga o lo’o ua mae’a pu’ea mai i totonu o le vaega muamua lenei o le ata lea.

OSOFA’I E TALIPANA NOFOAGA VAEGA’AU US I JALALABAD

Ua fa’ailoa mai e le BBC ua o’o atu tagata fa’atupe vevesi a Talipana i totonu o le Nofoaga o Vaega’au a le US i Jalalaabad, ma ua fa’apapa pomu sa o atu ma latou ma ua maliliu ai le to’afa o fitafita a Afakanisitana sa tiute i lea lava nofoaga. Ua fa’ailoa mai e leoleo i le BBC, e to’alua lava tagata sivili ua maliliu ai.

Ua fai mai sui o leoleo a Afakanisitana, e to’a iva sui na o mai ma pomu i o latou tino, ma o i latou fo’i ia na fa’apapa lava latou pomu ma toe maliliu ai ma i latou. O se fa’amatalaga mai le Nato ua fa’aalia ai, “E le’i mafai e le osofa’iga lea ona sao atu i totonu o le Nofoaga o le Vaega’au, ae ua iloga mai, o se osofa’iga na fuafua lelei lava.”

O se tala mai a Orla Guerin o le BBC i totonu o Kabul, sa ia fa’ailoa ai, “O le osofa’iga lenei na fuafua tatau lava, e pei fo’i o le isi osofa’iga sa faia muamua i le ma fasiotia ai tagata e to’a 9 i totonu o le nofoaga lea mo Va’alele a le Nato ma Amerika.” I le taimi nei, ua amata lava ona tu’u atu malie e le Nato le tausia o latou nofoaga fa’apitoa nei i fitafita a Afakanisitana lava latou, aua ua toe o se ana ona tu’ua lea e i latou o lea malo e fa’atautaia lona lava malo.

saunia: Leua Aiono Frost