Ads by Google Ads by Google

Kalapu a le Pisinisi - ASCC

Ona ua tulata fo’i ina mae’a le taumafaiga a nisi o le fanau sa a’otauina ia maua fa’ailoga i tulaga o Pisinisi i le Kolisi Tu’ufa’atasi, o lea sa a’e ai se finagalo i le latou laulautofi, o le a faia se latou fiafia fa’atasi, a’o le’i tu’ua i latou e nisi o latou sui o le a fa’au’u i le fa’aiuga o lenei tausaga.

“E faia lenei fa’aeaga, aua e faigata le mafutaga ua mafana i totonu o le matou fo’i itu o toma’i mo’omia e fa’atautaia ai pisinisi, fa’aolaola atili pisinisi ma ia fa’atautaia tonu pisinisi ina ia tumau lona lelei mo e ona ma tagata faigaluega fo’i.”

O le latou fa’atasiga, sa auai uma lava faia’oga o mataupu fa’apisinisi i totonu o le Kolisi, Athena Mauga, Vai Lam Yuen ma Dr. Faofua Fa’atoafe. O le ali’i Peresetene Coral Toa ma lana laulau sa vaevaeina le fanau i lanu e tolu, Mumu, Laumoana ma le Lanumeamata ina ia fa’atautaia ai latou ta’aloga i le Matafaga i le Malae o Suigaula a le Atuvasa, i Utulei.

Matagofie le manumalo a’ia’i o le Blue Team, ma sa maua fo’i fa’ailoga mo nei taumafaiga uma.

Na matauina, e totogi a latou malo na vala’aulia, e ta’i $5 ina ia mafai ona tu’ufa’atasia se tinoitupe mo le tafaoga. O latou sala i sui e le la’eia le toniga i taimi atofa, le auai i sailiga tupe patino i le Kalapu mo le fa’atupega o gaoioiga a le Kalapu, o le aotelega o nei mea uma, na tu’ufa’atasia ai le $400.+ lea na fa’atino ai loa le latou BBQ i le aso Faraile na te’a nei.

O sui auai e to’a fitu, na tutula’i mo le latou fa’amavaega, aua o i latou nei ua afua ai le fa’amoemoe, o le a tu’ua le Kalapu aua ua mae’a a’oa’oga i le Kosi fa’apisinisi i lenei afa tausaga. O latou fa’ailoga fa’apitoa o le a taua’aoina i le aso Lulu o le vaiaso nei, lea e faia ai le Sauniga fa’apitoa mo le tufaina o fa’ailoga o le fanau fa’au’u a le ASCC.

Na tofusia uma lava sui totino o le Kalapu ma tusi pasi, o isi, ona o le auai i taimi uma, o isi i lo latou fesoasoani i le Kalapu, ae le o so latou kosi lea o tau’ave i le ASCC, o isi, ona ua iloga lo latou sao i galuega fa’atino a le Kalapu.

“E te selesele i mea uma na e lulu, aua ne’i fa’aititia ai lou taumafai, ae ia fa’ateleina se lagona fiafia ia te oe, e taumafai atili!” O se tima’i lea a le tama’ita’i faia’oga Dr. Fa’atoafe. O se BBQ matagofie ma le lelei saunia na talimalo ai lea Kalapu i a latou sui na vala’aulia fa’apitoa, ae maise o le latou lava Kalapu ia fiafia fa’atasi ai, a’o le’i tu’ua i latou e o latou uso i totonu o a’oa’oga i le masina nei.