Ads by Google Ads by Google

Titina le ua toe folafola le fasioti o le fafine

O le alii lea o lo o tuuaia e leoleo i le fasiga o lona toalua e ala i le titina o lona ua, po foliga, ato i lalo ma folafola lona fasiotiina o ia, ua taofia nei e le faamasinoga i le falepuipui e faatasi ai suesuega a leoleo o lo o faaauau, ma iloilo ai pe i ai ni moliaga mamafa e ono faia faasaga ia te ia.

O lo o taua foi i faamaumauga a le faamasinoga e faapea, ina ua faailoa e le fafine i lona toalua o le a ia viliina le Ofisa o Leoleo, sa faailoa i ai e le ua molia e faapea, e le popole i ai aua o le leoleo lava e alu atu ia te ia na te fanaina.

O le a le mafai ona faalauiloa le igoa o le sifi lea ona o puipuiga lava i lalo o le tulafono, ina nei mafai ai ona iloa ma lona toalua o lo o aafia i lenei mataupu.

Ae tusa ai ma faamaumauga a le faamasinoga o lo o taua ai e faapea, o le taimi lava na maua ai le avanoa o le fafine e alu ai i lona aiga pe tusa o le itula e 5:00 i le vaveao o le Lua, 20 Novema 2012, o le taimi foi lea na ia viliina ai loa le Ofisa o Leoleo ma faailoa i ai gaioiga sa faia e lona toalua ia te ia.

Na faamatala e le fafine i leoleo e faapea, a’o alu atu i le taavale ua manava i le afiafi lea, na te’i i le talotalo atu o lona toalua o lo o nofonofo i le Falema’i Tua i Leone ia te ia.

Na tu le taavale ona savali mai lea o lona toalua ma fai atu ia te ia, e oso i le isi nofoa ae avatu le taavale na te aveina.

Fai mai le fafine, na faatonu o ia e lona toalua e alu i fafo ma le taavale, peitai na faateia o ia ina ua mau le ua molia i lona lauulu ma toso o ia i fafo, faatasi ai ma po e tolu na tau i ona foliga.

Fai mai faamaumauga a le faamasinoga, na faaauau ai lava lea ona fai o amioga a le ua molia i lona toalua, e ala i lona fasiina lea o ia, titina le ua, togi i lalo o le palapala atoa ai ma le folafola o lona fasiotiina o ia.

O le isi gaioiga na faia e le ua molia o lona ave lea o lona toalua i le latou fale ma loka ai o ia i le po atoa i totonu o lona potu seia aulia le itula e 5:00 i le vaveao ina ua maua le avanoa o le fafine e sola ese ai, o lea na ia faafesootaiina ai loa le ofisa o leoleo mo se fesoasoani.

Na faailoa e si fafine i leoleo e faapea, na mafua ona ia faia mea uma na faatonu ai o ia e lona toalua, o lona fefe lea ina ne’i i ai se isi mea matuia e faia e le tamaloa ia te ia.

E le’i maua e leoleo le ua molia ina ua latou sailia o ia i le vaveao lea, ma ina ua latou faailoa i le fafine ua latou fiu e su’e  lona toalua, sa fefe le fafine ma ia toe talosaga i leoleo ina ia o pea e saili lona toalua.

Fai mai faamaumauga a le faamasinoga, na iloa lelei e leoleo le fefe o le fafine i lona toalua ona o mea sa ia faia ia te ia.

O lo o taua foi i faamaumauga a le faamasinoga e faapea, ina ua faailoa e le fafine i lona toalua o le a ia viliina leoleo, ae na tali i ai le ua molia, e le popole i ni leoleo, o le taimi foi e o atu ai leoleo e su’e ia, na te fanaina ai ma le leoleo.