Ads by Google Ads by Google

MAUA TINO MALIU O SE ALI’I

O lo o galulue nei vaega o Leoleo Suesue e suesue le mataupu e faatatau i le tino maliu o se alii mai  Matuu lea na maua atu o taatia i luga o se auvai i totonu lava o le afioaga i le taeao ananafi.

Pe tusa o le itula e 7:15 i le taeao ananafi ae logoina loa le Ofisa o Leoleo e ni isi o aiga i le afioaga o Matu’u, i se tagata o lo o maliu ai i lalo o se auvai, i le aga’i lea i totonu o le nuu o Manu’u.

O Leoleo mai le vaega a le Patrol Division faatasi ai ma sui o Leoleo Suesue, le CID na nanati atu ina ua latou maua le telefoni i le nofoaga o lo o taua o lo o tula’i mai ai le faalavelave.

E taunuu le Samoa News i le nofoaga na tulai mai ai le faalavelave, ua maea ona aveese mai le tino maliu o le alii na maua i le taavale a le EMS, ma auina atu i le falema’i i Fagaalu mo suesuega, sei vagana ai ni alii leoleo se toafa na vaaia ai i le nofoaga lea, faatasi ai ma le latou lipine o lo o toso faataliolio i le vaega tonu na tulai mai ai le faalavelave.

E toatolu alii leoleo mai le vaega a le CID sa i ai i le taimi lea, faatasi ai ma se leoleo mai le vaega a le Traffic Division na nofo ai e tiute i le nofoaga na tulai mai ai le faalavelave.

Na faamaonia mai e le Sui Komesina o Leoleo i le Samoa News, le faalavelave e pei ona maliu ai se alii e 41 tausaga le matua, ina ua maua atu lona tino o taatia mai i se auvai i Matuu.

Saunoa le tofa ia Leseiau Laumoli, o lo o faagasolo a latou suesuega e uiga i lenei mataupu, ma ua i ai le faamoemoe o se taimi o i luma o le a tuuina mai ai se faamatalaga e uiga i le mafuaaga o lenei faalavelave.

O le taimi nei, e le o manino pe o le alii ua maliu na mafua mai ina ua faaoolima i ai se tagata, pe na mafua foi ona o se taumafaiga e pule i lona soifua (tulou), poo se mafuaaga tau i le mafaufau ua mafua ai ona tulai mai lenei faalavelave.

O le a faatoa manino le mata o le vai i le mafuaaga o le faalavelave, pe afai ae maea suesuega a leoleo o lo o faagasolo i le taimi nei.

O le tagata muamua lava na fesili i ai le Samoa News, o se tina matua e nofo ai i le nofoaga na tulai mai ai le faalavelave, lea na alu ane ma ni nofoa se lua e nonofo ai alii leoleo.

Na taua e le tina lea ina ua fesiligia o ia, o le alii ua maliu e nofo i luma o le auala tele.

E toalua ni molimau na mafai ona fesiligia e le Samoa News e uiga i lenei faalavelave, ma o le isi o i laua nei o se alii sa eva ma le alii ua maliu i le po o le aso Tofi na te’a nei, a’o lumana’i ai le taimi na tulai mai ai le faalavelave.

O le molimau, o le susuga Tupu Aiono, o se alii o lo o aumau i le aai o Utah i Amerika, ae na malaga mai i le amataga o le masina nei i se faalavelave a lona aiga.

Na taua e Aiono i le Samoa News e faapea, o le alii ua maliu na o atu ma le isi ona tausoga i lo latou fale i le po na sosoo ma le taeao lea na maua ai lona tino maliu, ma faia ai loa sa latou evaga i lona fale e aofia ai sa latou inugapia.

“Pe tusa o le itula e 8:00 ana po (po o le aso Tofi) na taunuu atu ai le alii lea i lo matou fale ma matou eva lea, ae pe tusa o le te’a o le 10:00 na alu ese mai ai ina ua uma ana fagu pia e 4 sa inu,” o le tala lea a le molimau.

Fai mai le molimau, sa lelei lava mea uma i le savali ma le talanoa a le alii ua maliu i le taimi na latou faamavae ai, peitai na faateia o ia ina ua fafagu atu o ia e lona aiga ma faailoa atu le mea ua tupu.

Na faasino e le molimau lona lima i le vaega tonu o le auvai na maua ai le tino maliu o le alii ua maliu, lea na te iloaina o ia i le igoa o ‘Tuky’.

Fai mai le molimau, sa ia i ai i le taimi na toso mai ai e leoleo le tino maliu o le alii lea i luga. Sa fao o ia i lalo i le taimi na maua ai, o ona foliga na faasaga i lalo o le vai i luga tonu o se maa o lo o i luma tonu o le vaega na taatia ai lona ulu (tulou).

Sa ia vaaia foi le ofuvae o le alii sa faia o lo o afa i lalo i ona tuli, ao taumafai leoleo e aumai lona tino i luga.

Fai mai le molimau, na te le iloaina pe na faapefea ona tupu lenei faalavelave.

O le faamatalaga foi lea a le isi molimau na fesiligia e le Samoa News. Fai mai le molimau lona lua e le’i manao e faailoa lona suafa, o le alii ua maliu e le nofo i le latou pito nuu, ae nofo i tafatafa o le faleoloa fou lea o lo o i luma o le auala.

Na faamaonia mai foi e le molimau lea e faapea, o le alii lea na maua ua maliu, na maua atu o lo o fao faasaga i lalo ona foliga, ae o lona ofuvae o lo o gata i ona tuli (tulou)

O le vaega lea na maua i ai le tino maliu o le alii lenei, e foliga mai o le vaega lea e lafoa’i i ai le lapisi a le aiga e ana ia le fanua lea.

O tafatafa o se ma’a tele lava i luga o le auvai, na maua ai le tino maliu o le alii lea, o lo o fao i lalo ma lona muaulu o lo o taoto i luma tonu lava o ni maa se lua.

O le taimi mulimuli na maua ai se tino maliu faapea i le atunuu,  o le faalavelave lea na tulai mai i le amataga o le tausaga nei, ina ua maua le tino maliu o se tama e silia ma le 60 tausaga le matua o maliu i tua o le Ofisa o le Samoa News i Fagatogo.

Na faaauau suesuega a leoleo e uiga i lea faalavelave ma faaiu’uina ai, o le tama lenei e nonofo ma lona aiga i luga o le nofoaga o lo o i ai le tane i luga o Utulei, ma e foliga mai na see o ia a’o aga’i atu i lo latou fale i se taimi o le po, ma mafua ai loa ona taavale atu i lalo lona tino.