Ads by Google Ads by Google

Faafotutupu le afioga i le Toafiaoalii Tupuola

O le vaiaso na tea nei na faataunuuina ai le faafotutupu o le afioga i le Toafiaoalii Tupuola ma Suitupe Sopoaga, e pei ona molimauina i se sauniga sa faia i le malae i Malaeti’a i le afioga o Fagasa.

O le afioga Tupuola Laniselota Tupuola, o se alo e fa’asino ia Makerusa Isa’ako Sopo’aga, o se alo o le susuga le Fa’afeagaiga Toea’ina EFKS Rev. Sopo’aga ma le Faletusa sa tautua i le galuega a le Atua i Savaia Lefaga ma Vaovai i Falealili. O lona tina o Fa’auliuli Ma’alona Tauatama mai Olosega Manu’a ma Fagasa.

 O le faletua o Suitupe Pele  - Sopoaga o se alo e fa’asino i le Auaiga o le afioga le Aloali’i Afoa Moega Su’esu’e Lutu ma le Aiga i Utulei ma Fagatogo. E to’aono o la’ua alo, e to’alua aloali’i ae to’afa tama’ita’i.

Mai le soifua tautua o le afioga le To’afiaoali’i ma le faletua, sa mua’i tautua i la’ua ina ua fa’asuafaina i le afioga ‘Tauatama’ i le latou auaiga lava Sa Tupuola i Fagasa, ma e 12 tausaga o la’ua tautua ai i le pa’ia o aiga i lea suafa.

O Tupuola Laniselota sa a’oa’oina o ia e susuga i fa’afeagaiga i le afio’aga o Fagasa i lana lava lea Ekalesia i le amata mai o lona soifuaga. O le susuga le Fa’afeagaiga sa galulue i Fagasa i lea vaitau o Rev. Setio ma le faletua o Foketi, ua toe nei o fanau o lo’o i’inei pea, e fai ma va’ai i na matua fa’aleagaga o le fa’anofonofo.  Na fa’asolo lea i le a’oga tulaga muamua i Le’atele Fagasa Elementary School, ma au mai ai i le Samoana High School.

 O i’ina na soso’o mai ai ma le a’oga i le Kolisi Tu’ufa’atasi a Amerika Samoa, peita’i e le’i mae’a lona ulua’i tausaga, ae maua lana galuega i le Southwest Marine Railways i Satala i le vaega a le Machine Shop i le matata tau Inisinia.

O i’ina sa maua ai le avanoa e malaga ai i Niu Sila mo nisi a’oa’oga fa’asamani i masini ma inisinia fo’i, taliu mai e tolu lava tausaga, ae si’itia loa e faigaluega i le Power House i Satala lava i le tausaga e 1977 ma sau ai lava se’ia o’o i le tausaga e 2000 i le fa’ai’uga o lea tausaga, na litaea ai loa ae ua atoa le 27 tausaga o le tautua.

I le taimi a’o i ai i le Power House se’ia o’o ina fa’aigoaina o le ASPA e fa’atautaia ai e pei ona i ai nei, sa tele avanoa e femalaga’i ai ina ia a’oa’oina fa’apitoa i afi moli e fa’atau mai e le ASPA mo le sapalai o le eletise mo le mamalu lautele o le atunu’u.

O lo’o tautua i la’ua ma le faletua i le Ekalesia Fa’apotopotoga Kerisiano i Amerika Samoa i Fagasa ma o lo’o ua avea i la’ua ma Tiakono o le latou fo’i fa’apotopotoga i Fagasa. Na avea o ia ma totino o le aufaipese e afua mai le tausaga e 1966, ma o lo’o tumau pea le agaga fia vivi’i i le Atua e o’o mai i le aso.

Na tofia e avea ma Faipese i nisi tausaga, avea fo’i ma Ta’ita’ipese i nisi tausaga peita’i, o le avea ma totino o le Aufaipese ina ia vi’ia le Atua e fa’avavau, ua fa’ailoa mai e lana afioga le To’afiaoali’i - “E o’o lava ina amia e le Atua e malolo, o auai pea i le aufaipese EFKAS i Fagasa.” Na i ai fo’i tausaga sa avea ai o ia ma Failautusi i le latou ekalesia i Fagasa lava, ma se tasi o au usufono a le Ekalesia i Fagasa i nisi tausaga i le Fonotelea le EFKAS i Kanana Fou.

O le isi ala o a la’ua auaunaga ua afua mai lea i le faletua Suitupe Pele - Sopo’aga, lea e tausoa i le la’ua avea e ala i le fa’atumauina o le lotoifale ma le tapenaga o le fanau ma le aiga, ae tainane fo’i le faiva o fautua e pei ona fa’atulaga ai so’o se tina e le Atua.

“I so’o se mea lava, a le maopoopo ma saogalemu mai le lotoifale o le aiga, o le amata fa’aletonu lava lea o so’o se taumafaiga a le ulu o le aiga, fa’afetai i le tina, o lo’o mamau pea le to’ovae e tua atu i ai i fautuaga mo le aga’i i luma o so’o se ma’ua tofiga, i le nu’u ma le aiga potopoto, ae maise le Ekalesia ma le galuega fo’i i le Malo sa tautua ai!” O se fa’afetai lea a le afioga le To’afiaoali’i Tupuola Laniselota Sopo’aga, ona o le onosa’i, fa’apalepale ma le fautua lelei a le afioga le Tausiali’i.