Ads by Google Ads by Google

FO’I FIAFIA TURISI AE NONOFO AVE TAXI MA PASI MA TAGA TUTUMU

E fo’i fiafia nai turisi i le afiafi ananafi ua malilie i le matagofie o Amerika Samoa, ae nonofo fiafia ni isi o le au ave taxi ma le au ave pasi ma latou taga ua tutumu i faamanuiaga tau tupe, sa maua i a latou pasese na maua mai i le meli.

Na feoa’i fiafia solo le toatele o turisi na malaga mai i le vaa o le Celebrity X Cruises i laufanua lanulauava o Amerika Samoa i le taeao ananafi, ina ua maua le avanoa latou te molimauina ai foliga matagofie o le taulaga ma nuu i tua i le taimi o a latou tafaoga pupuu.

O le vaa o le Celebrity X Cruises na taunuu mai i le te’a o le 6:00 i le taeao ananafi, ae na toe tuuvaa ese atu ma Amerika Samoa i le itula e 4:30 i le afiafi.

E lei avea le toulu o timuga i le taimi na taunuu ai le vaa i le taeao ananafi, ma itu na taofia ai turisi i le fia oo atu lea i ni isi o nofoaga eseese i le taulaga mo a latou maimoaga.

O ni isi o i latou na lolofi atu i le maketi mo faatauga, o isi i le malae i Fagatogo, o isi i luga o le alatele ae o isi na malaga i pasi ma taxi e asiasi i mataaga eseese i le atunuu.

Na taua e le alii o Mark Willie mai Ausetalia e faapea, o se tasi o vaaiga ua maofa ai lona loto, o le mananaia o tama’i fale ie o lo o faatau ai mea taulima i nofoaga eseese sa malaga i ai, e le gata o lo o tusia ai le igoa o Samoa, ae o ni isi o mea taulima nei o le taimi muamua lea ua ia vaai ai.

O le isi tamaitai na ia faailoa mai o Vickie lona suafa, sa ia taua e faapea, o se tasi o vaaiga manaia sa tau ai lana vaai, o le ata o lo o pipii i laisene o taavale. Fai mai lana tala, e ese le manaia o le ata o le motu o lo o pipii i le laisene, ae ua atili ai ona fiafia lona loto, ona sa maua le avanoa e matamata ai i le nofoaga o lo o i ai le motu lea i Fatu ma Futi, ina ua momoli i ai o ia e le taxi na malaga ai.

O ni isi o turisi sa vaaia le pue ata solo i le taulaga, o isi sa pue a latou ata i faleoloa ma nofoaga o lo o pipii ai le igoa o Amerika Samoa, e pei o luma o le ANZ Amerika Samoa Bank, ae o isi i luma o le Fagatogo Square.

O le toatele o isi tagata na faia a latou puega ata i nofoaga o lo o faatutu ai saini a sui tauva mo le palota ua maea atu nei, ae o isi sa na o le tietie taavale lava ma faasavili i le matagofie o Amerika Samoa.

Fai mai le tala fiafia a le isi alii na maua atu e le Samoa News i le maketi i Fagatogo, “e ese le manaia o la’u tofo i le faalifu ufi Samoa ma le niu, o meaai e le maua i lo’u atunuu.”

E le gata sa foi turisi ma le tala fiafia e faatatau i le matagofie o Amerika Samoa, aemaise ai o le laufofoga fiafia o ona tagata, ae na taape fiafia foi le toatele o le au ave pasi ma taxi ina ua maua nai a latou seleni mai pasese na o latou feaveaia.

Fai mai le tala a le alii ave taxi o Panapa mai Nuuuli, “maimau pe ana faapea e vaa meli lava vaiaso uma, semanu e leai se mea e toe popole ai, ae na o le faatietie lava o papalagi ma sekueli palegi mea uma.”