Ads by Google Ads by Google

Fagogo: Agelu a le Ali’i

Vaega: 66

Malo le soifua manuia i le mamalu o le atunu’u, ae mai fo’i i latou o lo’o fiafia e fai tau i la tatou tala fa’asolo. E i ai le fa’amoemoe, ua ola pea pule, ae gase to’a i le soifua laulelei o le atunu’u. Ae alo, maia o le fa’aopoopoga fo’ilenei o la tatou tala fa’asolo, Agelu a le Ali’i.

Ua suiga malie, le mataupu sa fetufa’ai ai le Matagaluega a le Malo fa’apea ma le pisinisi o lo’o fa’ataina le alatele i totonu o le atunu’u. O taimi uma lava na soalaupule ai le mataupu, sa auai pea Agelu a le Ali’i. Ma o i latou fo’i, sa ta’iala i manatu ma mafaufauga lelei o itu uma e lua, lea ua i’u ai i le manuia fuafuaga uma. E moni lava le upu, a i ai le Atua i so’o se mea, e i ai fo’i lona filemu ma lona fa’amaoni. A mata’u fo’i le tagata i le Atua, e tumau pea lona fa’atuatua, e le maluelue, e pei o le la’au e tu, ae oia.

O le naunau atu o le ali’i pule ina ia fa’asa’osa’o mea uma, o lea sa tali mai i ai ali’i papalagi nei. Ma ua fa’ailoa ai fo’i tulaga o lo’o ta’oto ai galuega a le kamupani lenei i totonu o le atunu’u. O le mea ua tupu, e fiu ali’i papalagi nei e tamu atu i tuapa o ierusalema, ae faga sa’o mai lava fa’amatalaga a le ali’i pule, e le i fa’a’alo’aloa. O le a lava le faigata o nanu a tama papalagi, e le i fo’i ai le nanu a le ali’i pule i lea taimi, o nai upu lava sa ia manatua mai i aso o a’oga, ae sa fa’atasi pea Agelu a le Ali’i ma ia i taimi uma lava.

 O le ala fo’i lea sa matala ai lona loto ma lona mafaufau i upu ma tala e mafai ai ona tautala atu, ma fa’atonutonu ai mea uma, aua fuafuaga lelei mo le atunu’u. Ua malilie fa’atasi nei, ma ua uma fo’i le tonu, o le a sauni atu e fa’atino le galuega e pei ona fuafuaina. O le seleni fo’i sa fa’aagaga mo lenei galuega, o le a fa’asoasoa mai pea e le Malo. Ae a i ai loa se isi tulaga e toe tula’i mai, ona faia loa lea o se isi fa’aiuga e tusa ai ma ia tulaga.

Ua toe taliu le malaga a ali’i papagi i le latou ofisa, a’o le taimi lea ua toe potopoto le aufaigaluega a le Matagaluega. Ma ua fa’ailoa loa le agaga fiafia o le aufaigaluega i le latou pule, e tusa ai ma lona fa’afoefoeina o le mataupu i lea aso.

Na mata’i lelei lava e Agelu a le Ali’i ia le pule i lea taimi, pe i ai ni ona uiga mimita, ma le fia poto, ma fa’apea ifo, o ia ua lelei atoatoa, o ia ua maualuga, o ia ua atamai, ona o lea ua manuia le fonotaga i lea aso. Ae va’ai atu Agelu a le Atua, e leai lava ni uiga fa’apea o le tamaloa. Na iloa lelei lava e Agelu a le Ali’i, le fa’apea ifo o le mafaufauga o le ali’i pule e aunoa ma  se iloa e se tasi, “Lo’u agaga e, ia e fa’amanu atu i a ieova, o mea uma fo’i o i totonu i a te a’u, ia fa’amanu atu i Lona Suafa Paia.”

Na tilotilo ane nei le Agelu ulavale i ona uso e to’alua, ua na o le tilotilo ifo nei i le ali’i pule, i lea taimi. Ma e ui lava e fa’apea sa fai pea lana tatalo ua na o ia ma le Atua i lea taimi, ae sa ia fa’ailoa fo’i i luma o lana aufaigaluega, ina ia tumau pe lo latou fa’atuatua i le Ali’i, o ia o lo’o i ai le ola ma le malosi, ae maise o manatu ma mafaufauga lelei e fa’afoe ai a latou galuega.

Ua fegenogenoa’i nei Agelu a le Ali’i, ma ua maua loa ma le tonu, o le a o latou asia le malae va’alele i Tafuna, po’o a mai fo’i ia le femalaga’iga a le atunu’u o Samoa, i lenei vaitaimi o le Kirisimasi ma le Tausaga Fou.

E faia pea