O le Aso Gafua o le vaiaso fou lea ua faamoemoe e toe fo’i ai le to’a 72 o tama ma tina matutua na faamuta i le lua vaiaso talu ai le polokalame sa galulue ai, ina ua talia e le malo tele le talosaga a le Faatonu o le Ofisa o Tagata Matutua (TAOA), mo se avanoa e toe faaauau ai ona galulue nai tama ma tina matutua i le polokalama mo le isi tausaga atoa.

Na faamaonia mai e le Faatonu o le TAOA i le Samoa News lea tulaga ina ua fesiligia o ia i le taeao ananafi.

Saunoa le afioga Faafitu Pita Tauanuu e faapea, o le vaiaso na te’a nei na tuuina atu ai sana talosaga i le Ofisa o le malo tele, lea o lo o faatupeina mai le polokalama o lo o galulue ai le silia i le toa 3,000 o tagata matutua, mo se avanoa e toe galulue ai le toa 72 o tama ma tina matutua ua lua vaiaso talu ona faamalolo, ina ua latou ausia taimi faatapulaa mo le polokalama.

“O se tala fiafia lenei mo nai tama ma tina matutua, ina ua talia le talosaga e toe faaauau ai la latou tautua i le polokalame mo le isi tausaga atoa,” o le saunoaga lea a Tauanuu.

E fetaui lava le taunuu mai o lenei tala fiafia mo nai tagata matutua, ae faatulaga loa e le afioga i le alii Senatoa ia Velega Savali Jr le iloiloga a le Komiti o le Faagaioia o le malo i le taeao nei, e fesiligia ai nisi o mataupu o loo fia malamalama ai le atunuu, e aofia ai ma le mataupu i tagata matutua ua faamalolo mai a latou galuega.

O le itula e 9:30 i le taeao nei lea ua faamoemoe e iloiloina ai e le Komiti a le Senate le mataupu a le TAOA, ma ua faamoemoe o le alii faatonu ia Tauanu’u lea ua faamoemoe e molimau i lea iloiloga.

Saunoa Velega o ia o le taitaifono o le komiti, e fia malamalama le komiti i le mafuaaga ua ala ai ona faamuta le tautua a i latou e toa 72 sa galulue i le polokalame, ae fia foi se tupe e manaomia ona totogi ina ia mafai ai ona toe faaauau le tautua a i latou ua vaea.

O le agaga o le alii Senatoa o Velega, afai e manaomia e le TAOA se isi tupe ina ia mafai ai ona faaauau le tautua a i latou ua faamalolo, o le a taumafai le Fono e saili se fesoasoani mo latou nei.

“E le tatau ona tulai mai se tulaga faapea i le polokalame a tagata matutua, aua e le o ni tupe tetele o loo latou maua, peitai afai ua faamuta, o lona uiga ua aafia foi nai o latou aiga,” o le saunoaga lea a Velega.

Saunoa Faafiti, o le polokalame e taua o le Title IV lea o loo galulue ai le silia i le 3,000 tagata matutua i le TAOA, e na o le 48 lava masina le umi e galue ai le tagata i le polokalame ma faamuta, ona tuu lea o le avanoa i isi tagata o loo i luga o le lisi faatalitali latou te faatutumuina avanoa o i latou o le a malolo.

Ina ua faalauiloa e le TAOA le faamalolo o i latou e toa 72 i le lua vaiaso talu ai, na folafola mai ai ma le toe faatutumuina o avanoa nei mai ia i latou o loo i ai i le lisi faatalitali, peitai na saunoa Faafiti, o le a leai ni avanoa e faatutumu aua o lea o le a toe foi i latou na vaea i a latou galuega sa galulue ai.

O nisi o galuega sa galulue ai i latou nei e aofia ai le aoaoina o fanau aoga i le gaosia o mea taulima, lalagaina o fala, ili, taulima ma isi lava ituaiga galuega taulima, aemaise ai foi le aoaoina o fanau aoga i le aganuu a Samoa.

O le taeao nei i le itula e 9:00 ua faamoemoe e feiloai ai le Ofisa o le TAOA ma tagata matutua uma sa faamalolo, e faailoa i ai le tala fiafia e uiga i le toe faaauauina o le polokalame.

Ina ua fesiligia e le Samoa News nisi o tagata matutua i le aso ananafi e uiga i le toe faaauauina o le polokalame, o isi sa le talitonu ae o isi sa na o le sioa ua le mau gagana.

“E mo’i lau tala alii Samoa News,” o le tala lea a le isi tina matua sa vaea mai i le polokalame ina ua fesiligia e le Samoa News i le aso ananafi.

“Faafetai pe afai o se tala lena a le matou faatonu, ou te tau le alu foi la i le fono taeao (nei) aua o lea ua maua le au o le paipa, faafetai ua tali mai le Alii i talosaga,” o le tala fiafia lea a si tina lea.