Ads by Google Ads by Google

Tala mai le Fono Faitulafono

PASIA I’UGAFONO E FAAMAISE AI MO REV. UINIFARETI SOTOA

Ua pasia e le Fono Faitulafono, i le aso ananafi, se iugafono malilie faatasi a le maota o sui, e momoli atu ai le agaga o le faamaisega i le aiga Sa Sotoa, ona o le tuua ai o le malo e le alii faifeau ia Rev. Uinifareti Rapi Sotoa, ma aloaia ai lana tautua mo le malo, o lona aiga, ekalesia ma le atunuu atoa.

Ua maea ona tauaao lenei i’ugafono i le taimi na faia ai toe sauniga o le susuga i le fa’afeagaiga i le vaiaso ua mavae.

E pei ona masani ai le Fono Faitulafono, soo se tasi lava e tautua matavela i le malo ma le atunuu tainane ai ekalesia, e tuuina tau ai lava iugafono e aloaia ai lana tautua, ma faaaloalogia ai e tupulaga fai mai.

I se vaega o le tino o lenei iugafono o loo taua ai e faapea, o Rev. Uinifareti na soifua mai i le aso 12 Setema 1937 i lona tama o Sotoa mai Ta’u Manua ma lona tina o Faataualofa Soi Lalauega o Satalo Falealii i Samoa. O le aso 8 Iuni na valaauina ai o ia e le Atua ina ia faamalolo ana galuega.

E tele ni agavaa sa mafai ona ausia e lenei auauna, ma faatinoina ai lana tautua i le atunuu, ekalesia ma lona aiga. O se tasi o galuega e manatuaina ai o ia, o lona tusiaina lea o le ata o le Aeto o loo i luga o le tagata o le malo o Amerika Samoa.

O nisi o taleni e lauiloa ai lenei auauna e aofia ai lona silafia o le tautala i gagana Asia e lua, o ia foi o se tagata e lelei lana kuka faapea ai ma le tomai faa foma’i.

MAITAUINA GALUEGA MO LE TOE FONOFONO OMOOMO AUALA

Ua maitauina i le itu i sasa’e o le atunuu i le taeao ananafi, le amata galulue lea o tagata faigaluega a le Matagaluega o Galuega, i le faatutumuina lea o omoomo o le auala i uta pefu.

Na taua e Senatoa Fuata Dr. I’atala i luma o le maota, atonu o se tala fiafia lea mo le atunuu i le taimi nei, peitai o le a toe liua e avea ma tala faanoanoa pe a oo i le taimi e toe malolosi mai ai timuga, aua o le a toe tafea ese le pefu na faatumu ai le omo ae toe foi lava i le tulaga leaga sa i ai.

Na faafetaia e Senatoa Malepeai Setu galuega ua faia mo le toe faaleleia o le auala, peitai i lana talosaga, e lelei pe a amata muamua mai i le auala o loo agai atu i le malae vaalele i Tafuna, ona o iina e muamua taunuu mai i ai tagata mai fafo pe afai e ulufale mai i le atunuu.

E le gata i omoomo o le auala o loo faasea i ai le atunuu, ae oo lava foi i moli o le auala ua maitauina foi le tele o moli ua le o toe ola pe a oo i le po.

O le aso Faraile i le 9:30 i le taeao ua faatulaga e faia ai le iloiloga a le komiti o le Faagaioiga o le malo ma le faatonu o le Ofisa o Galuega, mo le fesiligiaina o nisi fuafuaga a le matagaluega e faaleleia atili ai auala ma moli e pei ona tele i ai faasea a le atunuu.

O le iloiloga o le a taitaia lea e le afioga i le alii Senatoa ia Velega Savali Jr, atoa ai ma lana komiti fou e pei ona tofia e le peresetene i le vaiaso nei.

TALOSAGA FUATA MO SE SUAVAI AOGA AUNU’U

Na talosagaina e le Senatoa mai Aunuu ia Fuata Dr. I’atala le komiti o Aoga a le maota maualuga i le taeao ananafi, mo se avanoa e mafai ai ona fausia se tane vai mo le aoga i Aunuu, ona o le faafitauli o loo maitauina le feagai pea ma le aoga, i le leai lea o suavai taumafa e maua pe afai e leaga le tau ma leai ni vaa e feoa’i.

Saunoa I’atala, o le suavai o loo feinu ai tamaiti aoga i Aunuu e la’u atu i Auasi, ae a oo ina leaga le tau ma taofia feoaiga a va’a, ona leai foi lea o se sapalai o le suavai e oo atu i le aoga, ma faapena ai loa ona tulai mai le faafitauli i le manaomia lea o se suavai.

Na avea le talosaga a le alii Senatoa ma itu na faatulaga ai loa e le afioga i le alii Senatoa ia Velega Savali Jr le iloiloga a le Komiti o le Faagaioiga o le malo lea o loo ia taitaifono ai, sei fesiligia ai le Ofisa o Aoga e uiga i lenei mataupu.

O le itula e 10:30 i le taeao o le aso Faraile nei ua faatulaga e faia ai le iloiloga a le komiti a le Senate, ma sui o le Matagaluega o Aoga a le malo, mo le fesiligiaina o le mataupu e pei ona tulai mai i Aunuu, atoa ai ma le talanoaina o se auala e foia ai lea faafitauli.