Ads by Google Ads by Google

Galea’i: Mana’omia se suiga tulafono uiga Falema’i

Na manino i le saunoaga a le afioga i le alii Senatoa ia Galeai Tuufuli i le taeao ananafi, e manaomia ona toe faia se suiga i le tulafono na faavae mai ai le falemai o le LBJ i Fagaalu, ina ia o gatasi le tulafono ma gaioiga a le falemai o lo o faia, ona o lea e fai mai le tulafono e fai fua talavai a soo se tagata, peitai o lea o lo o totogi e le atunuu tupe i le falemai.

“O lea e fai mai le tulafono e maua fua tautua i le falemai, ae o loo tatou silafia uma e le o tupu lena mea, o lona uiga, tatau ona fai sa tatou faaiuga mautu, aveese lena upu o le ‘maua fua o tautua’, ae sui i ai se upu ina ia talafeagai ma gaioiga a le falemai o loo faia,” o le saunoaga lea a le alii Senatoa ia Galeai.

O uluai saunoaga ia na faafofoga i ai le maota maualuga i le taeao ananafi, ina ua tatala le toe tauaofiaga o le nofoaiga lona 32 a le Fono Faitulafono mo lenei nofoaiga.

Saunoa Galeai, ua leai se vaipanoa o le atunuu e le faafofogaina ai le oi o tagata ona o siitaga a le falemai ua faia nei, peitai o le itu e ao ona manino, o le Komiti Faafoe lea o loo faatautaia galuega a le falemai, na tofia e le faigamalo a Togiola ma Faoa, lea o loo avea nei ma taitai o le malo.

Na toe faatepa foi e Galeai finagalo o le maota i le komisi lea na faia se suesuega e uiga i le falemai i le 2007, ma tuuina atu ai sa latou fautuaga i le Kovana ma le malo, e manaomia se suiga i le tulafono o loo faagaioi ai le falemai, ona o loo tauave pea e le tulafono i le taimi nei le faaupuga lea, e fai fua talavai mo le atunuu.

“O le faaiuga e faia e maota e lua mo se fautuaga tala feagai e tatau ona tuu atu mo le falemai, aua o tatou e fauina tulafono ae o le malo latou te faamalosiina,” o le saunoaga lea a Galeai.

O le aso Tofi nei lea ua faamoemoe e faia ai le uluai fonotaga faapitoa a le komiti o le falemai a le Senate, o sui o le Komisi na tofia e le kovana e vaavaaia le falemai, atoa ai ma le pulega atoa a le falemai, mo le talanoaina o le ripoti a le Komisi e faatatau i le falemai.

O le finagalo o Galea’i, e tatau ona fai muamua se feiloaiga a le komiti a le Senate ma le Komisi, ina ia mautu se fautuaga e uiga i le ripoti ao lei faia se finagalo a le maota atoa.

O le isi foi mataupu lea e finagalo Galeai e tatau ona talanoaina o le mataupu e uiga i le tulafono lea ua pasia e le faamasinoga maualuga a Amerika e uiga i le Obama Card Act.

“Ou te manatu e tatau ona tatou tapenapena ina ia fetaui lava le oo mai o le Obama Care Act i le atunuu ae ua mautu foi sa tatou faaiuga e fai,” o le saunoaga lea a Galeai.

Na lagolagoina e le alii Senatoa ia Lualemaga Faoa le finagalo o Galeai e uiga i le falemai.

Saunoa Lualemaga, o lea ua taoto le finagalo o le Senate e uiga i le pili na faaulu e Togiola, e toe faafoi atu ai le falemai i le malo, e ala i le faataape lea o le Komiti Faafoe, peitai i lona talitonuga, o se mataupu e lavelave tele lenei mataupu.

“Ua tatou ona tatou galulue i se auala e foia ai le faafitauli i le falemai, ua pagatia tele le atunuu,” o le saunoaga lea a Lualemaga.

Na lagolagoina foi e le peresetene o le Senate ia Gaoteote Palaie Tofau le finagalo a alii Senatoa, ina ia galulue le maota e saili ni fofo o faafitauli o loo tulai mai.