Fa’amanatu e le malo le aso mo fitafita tuai
O le aso Gafua o le vaiaso fou, aso 12 Novema o le a faamanatuina ai le aso faapitoa mo Fitafita Tuai o le taua, i se sauniga lotu puupuu e faia lea i le malae o le Veterans Stadium i Tafuna.
O le afioga i le kovana sili ia Togiola Tulafono o le a saunoa i le saunoaga autu o le aso, e pei ona faatulaga mai i le polokalame o lea aso.
O le aso mo Fitafita Tuai e faamanatuina i le aso 11 Novema, ae talu ai o le aso Sa e pau tonu i ai le aso lea, o le mafuaaga lea ua faamanatu ai lenei aso faapitoa i le aso Gafua e sosoo ai, e pei ona tuuina mai i le polokalame a le alii kovana sili, lea foi ua avea ai le aso Gafua o se aso malolo faitauina a le malo.
I lana poloaiga mo le faamanatuina o lenei aso taua na saunoa ai Togiola e faapea, i le 236 tausaga talu ai, sa tuuina mai ai e i latou na faamanatuina lenei aso le feau e faapea, o i latou uma sa tautua i vaega au e tatau ona tutusa uma le faamanatuina o la latou tautua mo le malo tele, atoa ai ma le puipuiga o le filemu o le lalolagi.
Saunoa Togiola e faapea, i le 112 tausaga talu ai, na ofo atu ai soifua o tuaa o Samoa ina ia fai so latou sao mo lenei faamoemoe taua.
I le faamanatuina ai o lenei aso taua, ua talosagina ai e Togiola le atunuu atoa, ina ia faamanatu i le agaga taua lenei aso e aloaia ai le tautua sa ofoina atu e tama fanau a Samoa i vaega au a le malo tele.
Na taua foi e le alii kovana e faapea, e le gata o lenei aso o le a faamanatuina ai le tautua sa ofoina atu e fitafita tuai sa tautua i vaega au a le malo tele, ae faapena foi i a i latou o lo o tautua pea e oo mai i le taimi nei.
O le susuga Rev. Liu Tofili o le feagaiga o le Ekalesia EFKAS mai Fagamalo o le a taitaia le sauniga i se tatalo puupuu, ao lumanai ai le tuuina mai o le feau autu mai le alii kovana sili.
O le Sui Failautusi o le Ofisa o Mataupu Tau Samoa, tofa Nanai K. Afuola, o ia foi o se fitafita tuai mai le vaega a le U.S Marine Corps o le a avea ma fofoga o le aso.
O sui mai vaega o le JROTC a aoga maualuluga faapea ai ma le Army Faaleoleo o le a tofu sao i le faamatagofieina o lea aso taua.