Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei ina ua fetaui lava le oso o Kati i totonu o lana taavale, ae maua atu loa ma lana text mai lana vaega, o lea ua tafana la latou taavale e le au alii leaga ia na aai i totonu o le fale’aiga, ma ua latou tali atu fo’i i ai.]

E lei toe faatali Kati i se isi faatonuga ae ua ia faatonuina lana vaega ina ia faaaoga loa le malosi o a’upega e tali atu ai i osofaiga ma faamuamua le saogalemu o i latou ma tagata lautele i luga o le auala. Pe tusa ma le 10 talu ona fai tauga fana a le au alii leaga ma leoleo a Kati, ae lavea loa le isi taavale lea o lo o o atu ai isi alii leoleo e toalua o le vaega a Kati ma tifa ai le taavale ma fetoai ma se tasi o fale tele i totonu o le taulaga i Niu Ioka ae faaauau lava le tuliga a le isi taavale lea o lo o o atu ai isi leoleo e toalua ma le au ula leaga ia. E lei umi ae vaaia le tau fai aga’i ane o taavale leoleo ma taumafai e fai se auala e tu ai le taavale a le au ula lea, e le’i umi ae tafana loa e leoloe pa’u o le taavale a le au ula leaga ma tifa ai loa i tua ma le auala ma lavea ai.

E fetaui lava le taunuu o leoleo i le vaega tonu lea o lo o lavea ai le taavale a le au ula leaga ia ae taunuu loa fo’i ma Kati, ma ia vaaia ai e na o le toalua ana tama faapitoa o lo o i ai i le vaega lea ua muta ai le tuliga. “O fea uma le tou vaega,?” o le fesili atu lea a Kati i le isi alii o lana vaega, peitai na tali ane le alii lea, na te le’i iloaina o latou uma lava na tuliina maia le taavale lea ua lavea nei, e fai lava le talanoaga a Kati ma le isi alii o lana vaega, ae o le taimi lea o lo o taumafai leoleo ma le isi alii o le vaega a Kati e toso mai i fafo le au ula ia na latou tuli mai, o lo o mau i le va o nofoa ina ua lavea le latou taavale.

“Fai uma mea e tatau ona fai, ave le au alii ia i le Ofisa e fai a latou faamaumauga, a maea ona ave loa lea e loka i le falepuipui o lo o i le itu i sasa’e o le taulaga, aua ne’i loka faatasia ma isi alii ia na loka mai ananafi, ina ne’i i ai so latou fesootaiga ona faigofie ai lea ona maua sa latou talanoaga, ae se’i o’u toe fo’i e saili le isi a tatou taavale poo fea o lavea ai,” o le faatonuga lea a Kati i ana leoleo faapitoa e toalua sa latou talanoa, ma savali agai atu loa i le pito o lo o paka mai ai lana taavale. E alu fua Kati ae o lona loto ua popole, ina ne’i tupu se faalavelave i isi alii e toalua o lana vaega lea ua le vaaia i le nofoaga lea, ona avea lea ma tulaga faanoanoa mo ia i lana galuega. Na iloa mamao atu lava e Kati le taavale a lana vaega lea o lo o feasogi mai i le puipui sima o le isi fale tele i le taulaga, ae o lo o tumu ai leoleo o le aai lea. E taunuu atu loa le tama ae faailoa ane loa i ai e le taitai leoleo, o ana tama ua maliliu uma i le taimi na tupu ai le faalavelave.