Ads by Google Ads by Google

Tala o Fa’amasinoga

FALEPUIPUI I LE SASAINA O SEISI ALII I LE SUO

O le alii mai Auasi lea na ia sasaina le ulu o le isi alii i se suo, ua poloaina e le Faamasinoga Maualuga ina ia taofia o ia i le falepuipui mo faaiuga o vaiaso soso’o e lima, o se tuutuuga lea o lona faanofovaavaaia mo le lua tausaga.

O le Aso Faraile na te’a nei na amata tuli ai le faasalaga faafalepuipui a Lomitusi Uiagalelei, i le 6:00 i le afiafi o le Aso Faraile ae toe tatala i tua i le 6:00 i le afiafi o le Aso Sa.

Na uluai tuuaia Uiagalelei i le moliaga mamafa o le faaoolima i le tulaga lua faapea ai ma le faatupu vevesi i nofoaga faitele, ae i lalo o se maliliega sa ia sainia ma le malo, na ia tali ioe ai i le moliaga mama o le faaoolima i le tulaga tolu, ae solofua le moliaga o le faatupu vevesi i nofoaga faitele.

E lua tausaga na manatu le faamasinoga e faasala ai Uiagalelei i le toese, peitai ua faamalumalu lea faasalaga, ae faanofovaavaaia mo le 2 tausaga i lalo o tuutuuga a le faamasinoga.

E $500 le salatupe ua poloaina e totogia, atoa ai ma le $490 mo le pili o le falema’i a le alii na manu’a.

Ua faasa e le faamasinoga ia Uiagalelei ona toe nofo i Auasi, a ua poloaina o ia ina ia sui se nuu e nofo ai, ma ia auai i ni aoaoga e fesoasoani ai i le tulaga o le ita.

LAGA TUI

O le alii lea na ia ta sogia le isi alii i se agaese ma manu’a tigaina ai, ua ia ioeina le moliaga o le faaoolima i le tulaga muamua i lalo o se maliliega ma le malo.

Sa ta’utino Lag Tui, e 20 tausaga, i lona fa’ao’olima ia Enele Siapo, i se fa’alavelave na tula’i mai ia Tesema 3, 2011 i Pavaiai.

I faamaumauga a le faamasinoga o lo o taua ai e faapea, o se feeseeseaiga na tulai mai i le va o Tui ma Siapo, na tuli ese ai e Siapo ia Tui mai lona fanua, peitai na alu Tui i le fale ma sau ai ma le sapelu, ma ia faaoo ai loa manu’a ia Siapo.

I le talia ai e le faamasinoga o le tali ioe a Tui, ua solofua ai le moliaga mama o le faatupu vevesi i nofoaga faitele, ma ua faatulaga o le aso 13 o Iulai o le a lau ai lona faasalaga.

O lo o taofia pea Tui i le toese i Tafuna e aunoa ma se tupe sa faatulaga e tatala ai o ia i tua, ona o tulaga faaletonu