Ads by Google Ads by Google

Silia 30,000 tagata sosola ona o le mu

AP - E silia i le toa 32,000 le aofai o tagata mai le aai o Waldo i Colorado ua sosola ese mai o latou fale, ona o le malosi tele o le sosolo o le mu lea o loo faatamaia ai le vaomatua o le aai, lea na amata mai i le Colorado Springs ma i’u ina faaleagaina ai fale o le toatele o aiga.

O loo galulue le vaega tinei mu mo le faatamaia o le afi, ae ua mafai foi ona asia e le alii peresetene o le malo tele o Amerika le aai, mo le mataituina o mea ua faaleagaina aemaise ai soifua ua aafia.

Na faaalia e le taitai o le vaega tinei mu a le aai le faasoloatoa o le latou tautua i le aso ma le po, i le taumafai lea e faaumatia le afi, ma o loo maitauina le faaletonu o le tau i le taimi nei i le aai, ma o loo fesoasoani malosi i le faataapeina atu o le afi i isi nofoaga o togavao ma atili sosolo ai le mu, ma ua faamaonia mai i ripoti le i ai o nisi ua maliliu.

I se ripoti mai le falemai i Colorado sa taua ai le oo atu o tagata e toa 20 mo togafitiga ona o manu’a ua aafia ai, ona o aafiaga e mafua mai i le malosi o le asu o le afi.

Na faia foi se saunoaga mai le kovana o le aai ia John Hickenlooper i le tulaga pagatia ua i ai le afi, ma uafoliga mai o se ata tifaga o loo maimoa i ai tagata i le mea o loo tupu, ma ua lagona ai foi le fefe.

‘Faapea nisi e le moni peita o se taimi muamua lea ua ou va’ai ai i se mu uiga ese talu ona ou ola mai.” o tala ia a isi tagata.

Ua iloga mai i aga a tagata feoa’i i alatele e sosola ese mai lea a’ai, le mafiafia o le asu ua ufitia ai so’o se vaipanoa o Colorado Springs. Ua ufitia e nisi o latou gutu ma isu i mitiafu ina ia mafai ona manava i se ea mama mai le asu ma le efuefu i le ea. Ua taofia fo’i feoa’iga i le alatele i le va o setete numera 25, ma e o’o mai lava lea alatele i lea a’ai.

Ua fa’ailoa mai e nisi, “E tusa ma le itula pe sili atu fo’i o taumafai e kava se maila e tasi i luga o le alatele, ona ua matua pisi na’ua feoa’iga i ta’avale, ua leiloa atu se a’ai ma ni moli i le mafiafia o le asu.” O se tala lea a Hillory Davis, 22 tausaga le matua i le vaega o tusitala a le BBC.

I se saunoaga a le ali’i Pule o le Tinei Afi i Colorado Springs, lea fo’i ua leva ona galulue lana vaega i le tineia o lenei mu tele, sa ia fa’ailoa mai ai ile BBC lava, “O le afi lenei e foliga mai o se afa tele ua sasao fa’aafi, ma ua faigata na’ua ona tineia e le aofa’iga o tatou tinei mu o i ai!”

O le a’ai lea, o le tasi lea a’ai tele e lua o Colorado ma e i le itu i matu i saute o le latou alatele e feso’ota’iga ai ma setete tua’oi. O le a’ai lea ua iloga ona e fa’atuina ai le Nofoaga fa’apitoa e a’otauina ai ave va’alele a le Eafosi po’o le Fuava’alele a le Malo Tele.

I le tala mai i le taeao ananafi, ua fa’ailoa mai ua mae’a i ai le afi i le tusa ma le 10 eka o lea nofoaga a le Eafosi ma ua silia ma le 2,100 tagata ua mae’a fa’atula’ia mai totonu o lea nofoaga a le Fuava’alele i le po lava e tasi.

Ua ‘au’au fa’atasi nei le Fuava’alele i ana tagata tinei afi ma le ‘au tinei afi a lea setetee taofia ma tineia le afi ae le’i o’o tele atu i nisi nofoaga i totonu o le latou lotoa. I nisi vaega lava o Colorado ua fa’ailoa mai i High Park ua silia ma le afa ua mae’a ona mu, peita’i e to’alaiti mamao aiga ua mae’a fa’atula’ia mai lea itu o le setete nai lo Colorado Springs.

saunia Leua Aiono Frost