Ads by Google Ads by Google

Tala o Fa’amasinoga

LOMITUSI UIAGALELEI

O le alii lea o loo tuuaia e le malo i lona sasaina lea o le ulu o le isi alii i se suo, e mafua mai i le pisapisao o ta’ifau a le alii ua manu’a a’o faia faigalotu o le afiafi, ua faatulaga e le Faamasinoga Maualuga lana faamasinoga iloilo e faia i le aso 30 Iulai.

O le alii o Lomitusi Uiagalelei o loo tuuaia e le malo i le moliaga mamafa o le faaoolima i le tulaga lua, atoa ai ma le faatupu vevesi i nofoaga faitele.

I ni nai vaiaso e lei mamao atu, sa fuafua e fofogaina ai se maliliega ua maea ona sainia e le ua molia ma le malo, peitai sa le’i mafai ona taunuu le tuuina atu o lenei maliliega, ma mafua ai loa ona faatulaga le aso e fofogaina ai le faamasinoga iloilo mo lenei mataupu.

Fai mai le malo, na avea le pisapisao o ta’ifau ao fai faigalotu i le afiafi ma itu na alu atu ai le ua molia ma se suo ma sasa ai le isi ta’ifau, ma avea ai ma itu na sau ai i fafo mai le fale le toalua o le alii ua manu’a ma fai se taugaupu ma le ua molia.

Mulimuli ane agai atu i ai le na manu’a ma tula’i mai ai loa le vevesi ina ua tu’i e le ali’i na manu’a le ua molia, ma faapea ai loa ona faaaoga e le ua molia le suo e sasa ai lona ulu, e pei ona tuuaia ai o ia e le malo.

O loo tumau pea poloaiga o loo tatala ai Uiagalelei i tua mai le toese ao faatalitali ai le aso o lana faamasinoga. O nisi o ia poloaiga e aofia ai le faasa lea ona ia toe soli se tulafono, pe toe taumafai foi e faafesootai le na aafia i lenei mataupu.

IOE CRYSTAL TE’O I ONA MOLIAGA

O le tamaitai lea sa avea ma Supavaisa i le lala o le kamupani a le DGX i le atunuu, ua ia ioeina i luma o le faamasinoga maualuga moliaga e lua e pei ona tuuaia ai o ia e le malo, o lona faaaoga faagaoi lea o tupe sa tuuina atu i lalo o lana vaavaaiga.

O se maliliega na sainia e Crystal Te’o ma le malo ma ua talia foi e le faamasinoga, na fofogaina i le vaiaso nei ma le faamoemoe e faamuta ai lenei mataupu.

I le tali ioe ai o Te’o i moliaga mamafa e lua sa ia ta’utino ai i le faamasinoga e faapea, i le va o le aso 1 Iuni 2009 ma Aperila 6 2011, sa ia faaaogaina ai i se auala faasolitulafono ni tupe mai le kamupani a le DGX sa tuuina atu i lalo o lana vaavaaiga, a’o avea ai o ia ma Supavaisa o le lala o lea kamupani i Pago Pago.

Na ta’utino Te’o e faapea, ao galue i le DGX, e le gata sa ia faaaogaina ni tupe e totogi ai se taavale rental sa ia faaaoga mo ia lava, ae sa ia faaaogaina foi isi tupe e utu ai le taavale rental lea i se tasi o pamukesi, ma o ia gaioiga uma sa ia faia e le tusa ai ma ala o le tulafono.

I se vaega o le maliliega na sainia e Te’o ma le malo, ua malie ai le ua molia o le a ia toe totogiina uma le tupe a le DGX sa ia faaaoga faasolitulafonio e totogi ai lana taavale rental ma toe utu ai fo’i.

Ua manatu loia o le a faatalitali le tuuina atu o ni a laua faafinauga mo se faasalaga mama o Te’o, sei maea ona tapena muamua e le Ofisa Faanofovaavaaia se ripoti e uiga i lenei mataupu, peitai ua malamalama ma iloa e Te’o, tusa lava pe talosaga atu loia i le faamasinoga mo se faasalaga mama mo ia, e pule le faamasinoga pe talia pe teena foi ia fautuaga.

Ua ia malamalama foi, e le mafai ona toe suia lana tali ioe ua tuuina atu pe afai e tuuina mai se faasalaga a le faamasinoga ae le tusa ai ma lona mana’o.

O loo taofia pea i le toese i Tafuna Te’o e faatali ai le aso 3 Aokuso lea ua faatulaga e lau ai lona faasalaga.