Ua faaalia i ni ripoti mai Manu’a le aga’i ina gaogao fata e tuu ai oloa i nisi o faleoloa, ona ua fai si umi e le’i toe alu atu se malaga a le MV Sili, mo le la’uina atu o uta i Manu’a.

Na faaalia e se tina mai Olosega, o faleoloa i le latou nuu ua amata ona gaogao fata e tuu ai oloa ma ua tele lava foi ina le toe maua nisi o oloa o loo manaomia e tagata i aso fai soo, ae na taua e nisi, o lea ua amata ona toe feoai taavale ina ua maua atu le kesi, sei vagana ai nisi o oloa ua amata ona uma.

Ae na taua e le kovana sili i luga o lana polokalame i le faaiuga o le vaiaso na te’a nei, le lata lea ina mae’a galuega mo le toe faaleleia o vaega o le va’a o loo faagasolo i le Vaega Tosova’a i Satala.

Saunoa le matua ia Togiola Tulafono e faapea, o galuega mo le toe faaleleia o vaega o le va’a o loo faagasolo i le taimi nei, na afua mai i se fautuaga a le U.S Coast Guard ina ia mautinoa e saogalemu pea le va’a i le taimi e fa’ataunu’u ai lana tautua mo le motu o Manu’a.

Fai mai Togiola, o nisi foi taimi e manaomia ai le faia o ni galuega toe faaleleia mo le saogalemu o le va’a, ae afua mai ai faitioga faasaga i le malo fai mai ua faagalo Manu’a.

Na taua e nisi o tagata mai Manu’a na valaau mai i le Samoa News, o lea foi ua amata ona toe vaaia le faafitauli o le tau leai o ni oloa i totonu o faleoloa, ma ua i ai foi oloa ua le o toe maua i le taimi nei.

“O le mea lea ua i ai ua amata ona tau le toe feoa’i tagata e faatau i ni faleoloa, ona ua le toe maua oloa o loo manaomia e pei o le suka, alaisa, susu, fasimoli, falaoa mata, atoa ai ma nisi o oloa tuu aisa, ua toe o’o fo’i Manu’a i le faafitauli masani lea e tula’i soo mai pe a leai se va’a e sau iinei,” o le faamatalaga lea a se tina mai Olosega e le’i finagalo e faailoa lona suafa.

Na taua e le molimau, o le malaga a le Fotu o Samoa i le vaiaso na te’a nei na maua atu ai kesi ma le karasini, sa i ai foi ni nai oloa na mafai ona avatu i le vaa lea peita’i e le tele naua. O le malaga a le Fotu o Samoa na togipau e le ASPA, mo le lauina o kesi ma le suau’u, ae sa ave ai nisi o uta a tagata tua, ina ia fesoasoani ia Manu’a.

Na pau le eseesega e pei ona taua e nisi mai Fitiuta, Faleasao ma Ta’u ina ua fesiligia e le Samoa News i le taeao ananafi, o loo maua pea oloa tuu aisa i faleoloa i le taimi nei.

“Na pau lava le popolega lea e i ai o meaai mo fanau e pei o le alaisa, susu atoa ai ma meaai e fiafia lava latou i ai, ae o tagata matutua, o loo pala le talo, fa’i ma ta’amu iinei, o loo malolosi foi tamaloloa e fagogota aua ni i’a mo le afiafi,” o le saunoaga lea a se tasi o tina matua mai Fitiuta ina ua fesiligia e le Samoa News.

O le isi fesoasoani o loo mafai ai e Manu’a ona la’u ni nai oloa i le motu, o le tautua a le va’alele o le Segaula peitai na taua e tagata, e tiga lava ona taugata le totogi, e le lava foi uta e la’u ai ae o le itu taua o loo maua ai sina fesoasoani i le taimi nei

E le’i manuia taumafaiga a le Samoa News i le tau sailiina lea o se faamatalaga mai le Pule o le ASPA ia Andra Samoa, pe o i ai se isi fuafuaga mo se malaga lata mai a le Fotu o Samoa e la’u ai a latou suauu ma kesi i Manu’a, peitai na taua e se tasi o sui o le ASPA i le Samoa News, e le o mautinoa mai i le taimi nei pe lata mai se isi malaga a le Fotu o Samoa latou te totogiina mo Manu’a mo le la’uina o a latou uta.

Na faamalulu le alii kovana i tagata Manu’a ona o le faaletonu i malaga a le va’a, faatasi ai ma lana talosaga ia Manu’a, ia lava pea le onosa’i o loo taumafai le malo e faalelei le va’a  mo le latou saogalemu.