Ads by Google Ads by Google

Tala o Fa’amasinoga

Ua toe tolopo i le vaiaso fou le fofogaina o le maliliega lea ua sainia e le malo ma le alii fusu mai Samoa o loo tuuaia i lona faiaiga ma se teineititi laititi, ona e i ai nisi o vaega o le maliliega e manatu le faamasinoga e le manino lelei.

Saunoa le alii faamasinoi sili ia Michael Kruse, o le faafitauli o loo i ai i le maliliega, e le o matua manino lelei mai poo fea vaega o le tulafoino lea ua sauni Aokuso e tali ioe i ai.

O Aokuso na malaga mai i le au fusu a Samoa lea na o mai i le taamilosaga o fusuaga sa faia i le taimi o le Mosooi o le tausaga na te’a nei, ae tulai mai ai loa ma le faalavelave e pei ona tuuaia ai o ia.

Fai mai le malo, sa faiaiga Aokuso ma se teineititi e laititi i lalo o le tulafono. O Aokuso ma le alii faiaoga a le au fusu a Samoa ia Lautapa’a Ofe na taofia e leoleo i le taimi muamua, peitai ina ua faagasolo iloiloga i luma o le faamasinoga, na toe faaui ai e le malo i tua moliaga mamafa faasaga ia Ofe, sei vagana ai le moliaga o le faaoolima i le tulaga tolu na ta’usala ai o ia, i lona pa’i lea i le tino o le tamaitai na aafia.

Na faanofovaavaaia Lautapaa i lalo o poloaiga a le faamasinoga, e faasa ona toe ulufale mai i le teritori mo le tausaga atoa.

O loo taofia pea i le toese le alii o Aokuso e faatali ai le aso 9 o Iulai lea ua toe tolopo i ai lana mataupu.

LUAO ANDREW FAGOTA

O le alii lea na ia gaoia le ituaiga o le iPhone 4 mai totonu o se taxi sa paka i luma o se faleoloa i Pago Pago, ua maea nei ona sainia sa latou maliliega ma le malo, peitai ua toe faaauau le fofogaina o lea maliliega seia aulia le aso 17 Iulai e toe fofogaina ai lana mataupu.

I le maliliega ua maea ona sainia e Fagota ma le malo, ua ia sauni ai e tali ioe i moliaga e lua o le gaoi ma le tete’e a’o taumafai leoleo e pu’e faapagota o ia. Na taua e le malo e faapea, afai loa o le a talia e le faamasinoga le maliliega, ona latou talosaga loa lea e solofua le moliaga pito sili ona mamafa o le talepe fale i le tulaga muamua.

I faamaumauga a le faamasinoga o loo taua ai e faapea, ao paka le taxi a Ioane Ikenasio i luma o se faleoloa i Pago Pago, sa ia iloa mai i totonu o le faleoloa le ua molia o loo fealuai atu i tafatafa o lana taavale, ae ina ua sau i fafo sa ia iloa ai ua gaoia lana telefoni.

Na taumafai leoleo e pu’e Fagota peitai sa alu i le atoa o ia i le fale o le isi aiga ma lafi ai, mulimuli ane na mafai ona maua o ia.

O loo taofia pea Fagota i le toese e faatali ai le aso lea ua toe tolopo i ai lana mataupu.

DEAN NIU

O le alii lea na ia gaoia le pusa pia mai totonu o se faleoloa ma faaoolima i le faatauoloa, ua faatulaga lana uluai iloiloga e faia lea i le masina fou, ina ua teena moliaga faasaga ia te ia i le taeao ananafi.

O loo tuuaia Dean Niu e le malo i moliaga e lua o le talepe fale i le tulaga muamua, gaoi, faaoolima i le tulaga tolu, tagofia o le ava malosi ae le’i atoa le 21 tausaga, faaleaga meatotino faapea ai ma le tete’e i leoleo ao taumafai e pu’e faapagota o ia.

Ina ua ia tulai i luma o le faamasinoga i le aso ananafi, sa  teena ai e Niu moliaga uma faasaga ia te ia.

O nei moliaga na afua mai i le faalavelave lea na tulai mai i le aso 9 Iuni, ina ua faafesootai e se alii faipisinisi Asia le ofisa o leoleo mo se fesoasoani, ina ua maea ona gaoi e Niu se pusa pia mai totonu o lona faleoloa atoa ai ma lona faaoolima ia te ia.

Na taua e le alii faipisinisi na aafia e faapea, na o atu Niu ma nisi o ana uo e tauanau o ia e faatau ni a latou pia i le vaveao pe tusa ua te’a le 1:00, ae fai i ai e le mafai ona ua te’a le 10:00, peitai sa tauanau atu pea Niu ma ana uo ia te ia, o lea na ia tutulia ese ai loa ma lona faleoloa.

Mulimuli ane ina ua tuana’i ni nai minute talu ona o ese Niu ma ana uo, ae ona vaaia loa i luga o lana masini pu’eata le sii atu e Niu o le pusa pia mai totonu o le faleoloa, ma tuu atu i le isi alii o loo tu mai i tua e faaaoga i ai le faitoto’a pito i tua o lana faleoloa.

Sa ia tamo’e atu i ai peitai sa savali mai Niu ma tu’i o ia, ona la tauivi lea mo sina taimi ma leaga ai lona lima, ae sosola Niu ma ana uo ma le pusa pia.

Na agai atu leoleo e saili le ua molia ma latou maua atu ai o ia o loo nofonofo i se bus stop ma inu sana fagupia, ona o atu lea o leoleo ma taumafai e taofi o ia peitai sa tafiti solo ma mafua ai loa ona tau lona tulilima i le gutu o le isi leoleo.

O loo taofia pea Niu i le toese e faatali ai le aso lea ua faatulaga e toe valaau ai lana mataupu.