Ads by Google Ads by Google

Tatala tua le isi alii au lakapi a Nuuuli

O le aso Faraile na te’a nei na tatala ai i tua mai le toese i Tafuna le isi alii o le au lakapi a Nuuuli, lea na loka i le fasiga o le alii laufali mai Samoa, ina ua finagalo le faamasinoga e taofi lona tuliina o se faasalaga faafalepuipui, ae ua lava le umi lea ua maea ona ia tuliina e fai ma ona faasalaga i lenei mataupu.

O Iopu Siolo e atoa i ai le to’afa o sui o le kalapu lakapi a Nuuuli ua tatala i tua, sei vagana ai le isi alii e toatasi lea o loo taofia pea i le taimi nei e faatali ai le aso e lau ai lona faasalaga, ona e le o lelei ona pepa nofomau.

Toeititi lava atoa le 11 masina talu ona loka Siolo ae tatala loa i tua i le vaiaso na te’a nei, ina ua faanofovaavaaia o ia e le faamasinoga mo le 5 tausaga, i lalo o poloaiga e ao ona ia usita’i i ai.

Na ta’usala e le faamasinoga Siolo i le moliaga mamafa o le faaoolima i le tulaga lua, ona o le faalavelave lea na tulai mai ia Iulai 2011, ina ua latou fasia ma isi alii o le latou au lakapi le alii laufali o Ponifasio Vasa mai Samoa, na aumai e le Iuni Lakapi a Amerika Samoa na te faatautaia le taaloga lakapi e aofia ai ma le taaloga o le talita i le aso lea.

Na ioe Siolo i luma o le faamasinoga maualuga i lalo o se maliliega sa ia sainia ma le malo ma talia e le faamasinoga, sa ia kikiina Vasa ao taatia i luga o le malae, ma mafua ai ona oo manu’a ma le tiga i lona tino.

A’o lei tuuina atu le faasalaga a le faamasinoga maualuga, na faatoese Siolo i le faamasinoga, o le malo ma lona aiga e tusa ai o le solitulafonio sa ia faia. Sa ia faatoese faapitoa foi i le alii laufali ia Vasa ona o le faalavelave na mafua ai ona oo manu’a ia te ia.

Fai mai Siolo, o le umi lea na taofia ai o ia i le falepuipui, ua ia aoaoina mai ai se lesona taua mo lona olaga, ma ua ia lagonaina foi le salamo moni e tusa ai o lana solitulafono, na te le toe faia foi.

Sa ia faatoese foi isi ona toalua ma lana fanau, lea foi sa i ai i totonu o le potu faamasino, ona o le motusia ai o le latou mafutaga ao aumai ai i le toese, ma ua le mafai ai ona faatino ona tiute faa tama i le tausiga lea o i latou.

Na faaiu le faatoesega a Siolo i lona talosagaina lea o le faamasinoga mo se avanoa mo ia, sei toe foi atu ai e tausi lona aiga ma saili se galuega e tausi ai si ona toalua ma si ana fanau.

Na lagolagoina uma e loia le fautuaga a le Ofisa Faanofovaavaaia, ina ia faanofovaavaaia Siolo i lalo o ni poloaiga, e aofia ai lea ma lona o se tupe mo le pili o le falema’i a le alii laufali.

E 5 tausaga na manatu le faamasinoga e faasala ai le ua molia i le toese, peitai ua faamalumalu le faataunuuina o lea faasalaga, ae ua faanofovaavaaia o ia mo le 5 tausaga i lalo o poloaiga e ao ona ia usitai i ai.

O nisi o ia poloaiga e aofia ai lona tuliina o masina e 20 i le toese, peitai o le a taofi le tuliina o masina ia, ae ua lava aso ia ua uma ona ia tuliina e fai ma ana faasalaga i lenei mataupu.

E $2,000 le salatupe ua poloaina e le faamasinoga Siolo na te totogiina, atoa ai ma le $1,000 na te totogiina mo le pili o le falema’i a le alii laufali na manu’a.

Ua poloaina foi o ia e le faamasinoga ina ia auai i ni aoaoga e pulea ai le tulaga o le ita vave, ma ia tuana’i ulua’i masina e 6 talu ona tatala o ia i tua mai le toese ua maua sana galuega tumau e tausi ai lona aiga.

Ua matua faasaina foi o ia ona toe auai i soo se faagaioiga tau lakapi, pe toe auai i ni gaioiga e aafia ai taaloga lakapi, poo le alu foi e matamata i taaloga lakapi.

“Usita’i i poloaiga nei ona e le toe oo lea i le falepuipui,” o le fautuaga mulimuli lea a le alii faamasino sili ia Michael kruse i le ua molia