Ads by Google Ads by Google

Tala o Famasinoga

MAPU LEOTA

O le taeao nei lea ua faamoemoe e lau ai le faasalaga a le alii o Mapu Leota, ina ua faamaonia e le alii faamasino ia John Ward II le moliaga o le faatupu vevesi i totonu o lona aiga, e mafua mai i se faalavelave na tulai mai i le masina o Mati o le tausaga nei, lea na ia tago tago ai i le itutinosa a le uso o lona to’alua a’o momoe si fafine, o lona toalua ma le la fanau i le potu malolo o le latou fale.

Na tete’e Leota i le tuuaiga faasaga ia te ia, ma mafua ai loa ona faatulaga lana faamasinoga iloilo i le aso Faraile na te’a nei peitai ina ua maea ona faafofoga le faamasinoga i molimau a le malo e aofia ai ma le fafine na aafia, na tuuina mai ai loa le faaiuga e nofosala Leota i le solitulafono sa tuuaia ai o ia.

Na taua i faamaumauga a le faamasinoga e faapea, na te’i le tina na aafia ina ua ia faalogoina se tagata o loo tago atu i lona itutinosa (tulou), o lea na nofo ai loa i luga ma ia vaaia ai Leota o loo tago atu ia te ia.

O loo tumau pea poloaiga a le faamasinoga o loo tatala ai Leota i tua e faatali ai le lauina o lona faasalaga i le taeao nei.

FUALALEMALO SALATIELU

O le tamaitai lea o loo tuuaia i lona togiina o se tamaititi e 11 tausaga i se ma’a ma manu’a ai ona foliga, ua faatulaga le isi ana iloiloga i le aso 6 Aokuso ina ua ia teena moliaga faasaga ia te ia i le vaiaso na te’a nei.

O le ulua’i iloiloga sa faia i le mataupu a Fualalemalo Salatielu i luma o le alii faamasino ia John Ward II, na faamaonia ai e le faamasinoga o loo i ai mau e lagolagoina ai sa soli le tulafiono, ma o le foi ua molia o loo tuuaia i le soliina o le tulafono.

O loo tuuaia le ua molia i le moliaga o le faaoolima i le tulaga lua, faatupu vevesi i totonu o lona aiga, atoa ai ma lona faia o ni gaioiga e lamatia ai le saogalemu o se fanau laititi.

I faamaumauga a le faamasinoga o loo taua ai e faapea, o se taugaupu i le va o le alii na manu’a ma lona uso laititi, ae alu atu ai le ua molia ma tu’i ona foliga ma pau ai i lalo, ona ia kikiina lea o loina tino.

Na tu le tamaititi ma alu i le atoa peitai sa tago le ua molia i le ma’a ma togi ai o ia, ma tau ai i lona isu ma manu’a tigaina ai.

O taualumaga uma o le mataupu a Salatielu o loo faamatalaina atu lea ia te ia e se tamaitai e i ai lona tomai i gagana faagugu (sign language), ona o le ua molia e gugu.

O loo tumau pea poloaiga o loo tatala ai Salatielu i tua e pei o le faasa lea ona ia toe taumafai e faafesootai le tamaititi na aafia, aua nei ona toe soliina se tulafono, aua foi nei taumafai e sola ese ma le atunu, ao faagasolo lana mataupu i luma o le faamasinoga maualuga i le taimi nei.

O le tamaitai loia fautua lagolago ia Leslei Cardin o loo tulai mo Salatielu ae o Cecilia Reyna o loo tulai mo le itu a le malo.

NAOMI MAVAEGA

O le aso 6 Aokuso lea ua faatulaga e toe valaauina ai le mataupu a Naomi Mavaega, ina ua ia teena tuuaiga a le malo faasaga ia te ia i luma o le faamasinoga maualuga i le vaiaso na te’a nei.

O Mavaega o loo tuuaiai moliaga mamafa e lua e aofia ai le gaoi, atoa ai ma lona taumafai e faaaoga se credit card sa ia gaoia mai e fai ai sana faatau i se auala faasolitulafono.

O tuuaiga faasaga ia Mavaega na afua mai i se faalavelave na tupu ia Aokuso 2011, ina ua ia taumafai e fai sana faatau i le Asco Motors e faaaoga ai le credit card sa ia gaoi mai i le ato a se fafine sa la nonofo faatasi i le potu e faatali ai gasegase a le falemai i Fagaalu.

Na taua i faamaumauga a le faamasinoga e faapea, o se aitalafu a le ua molia i le pule o le Aeto Taxi stand i Pago Pago, na mafua ai loa ona ia taumafai e faatau mai ni pa’u taavale e faapaleni ai lana aitalafu e $450.

Na faailoa e Mavaega i le alii lea, o le credit card a lona tina lea o le a faaaoga e totogi ai ana pa’u taavale e faapaleni ai lana aitalafu.

Na pepelo Mavaega i le tagata faigaluega a le Asco Motors o lona aunty e ana le credit card, ae ina ua fesiligia mulimuli o ia, sa toe sui lana tali.

Ina ua fesiligia foi o ia e leoleo, sa ia ioeina ai lona gaoiina o le credit card ae tia’i le tamai ato sa i ai i totonu i se togavao i Tafuna.

Fai mai le malo, ua uma ona toe faafoi i le olomatua lana tamai ato sa gaoi e le ua molia, ma mea aoga uma sa i ai e aofia ai ma le credit card.

O loo taofia pea i le toese i Tafuna Mavaega ina ua le mafai ona ia totogiina le $5,000 sa faatulaga e tatala ai o ia i tua.