Ads by Google Ads by Google

E Toe Malaga “MV Sili”? - Leai se Kesi i Manu’a

Ona o lo’o i luga pea le “MV Sili” i le nofoaga toso va’a, ua iloga mai e fa’aauau ai pea le fa’aletonu o lo’o fesaga’i ma tagata o lo’o alaala i Manu’a. Leai se kesi ma ua le toe feoa’i ai ta’avale, limiti ai le fa’asoa mai o le eletise i lotoifale o aiga, ma tau le toe maua le tele o sapalai o loa mo’omia e tausia ai aiga!

“Ua atoa lava le masina o tutu le ta’avale latou, se’ia maua se kesi, ua fa’apena ona o tu fo’i le ogaumu kesi, le toe maua se fagu kesi e ola ai, ua amata fo’i ona tape vave mai le eletise ona ua taumafai le ASPA i’inei e sefe mai le suau’u ma le kesi o afi moli, ua pei lava ua ola masani ai Manu’a i nei pagatia!” O se tala lea a se tasi o tina matua i Ta’u, o Mrs. Tunupopo, i sana talanoaga ma le Samoa News i le aso ananafi, e tusa ai o lea tulaga.

Ua fa’ailoa mai e le susuga Carlos Sanchez, le taitaifono o le komiti fa’afoe a le ofisa o lo o mataituina nofoaga toso va’a i Satala (AS Shipyard Services Authority), “Ua iloga mai e tu’u i lalo le MV Sili i le Aso Gafua, ona alu atu lea e alu lana malaga mo Manu’a.  Ua mafua ona umi le taimi na faia ai lenei siakiga o le MV Sili, ona o le fa’atonuga fa’amalosi a le US Coast Guard e sailiilia uma mea e ao ina fa’aleleia o lea va’a i ana siakiga e ta’i lua tausaga ma faia, ina ia pasia mo femalaga’iga. O lenei tausaga, ua matua tele lava mea e ao ina fa’aleleia o le MV Sili, ma ua umi ai lea tapenaga mo faigamalaga i le vasa.”

O le malaga mulimuli lava a le MV Sili o le aso o le fa’au’uga o le Vasega 12 o le A’oga Maualuga a Manu’a.

“Ona ua masani matou ma le tulaga o le talia o mea tiga fa’apenei, e le o’o ai lava se vala’au i le Faigamalo e fa’ailoa atu nei pagatia!” O le tala lea a Tunupopo.

Peita’i, ina ua talanoa atu i le Ofisa o le ASPA, lea e saunia malaga fa’apitoa mo le aveina atu o le Kesi ma Oloa tau Suau’u a le ASPA i Manu’a, sa fa’ailoa mai ai e i latou, “O lo ua i ai nei le fuafuaga o le a malaga le “Fotu o Samoa” i le Aso Tofi mo Manu’atele e auina atu le Kesi ma le Suau’u, ma e mafai lava fo’i ona ‘ave ai ni kesi mo nai aiga i Manu’a a le mamalu lautele.”

Ona o lo ua i ai lea avanoa, ua lagona fo’i le fiafia e nai aiga i le Manu’atele. Peita’i, e tele le isi fa’amoemoe o lo’o fia masi’i mai ai le to’atele o i latou e alaala i Manu’atele.

“O le matou fonotaga fa’aletausaga e usuia i Kanana Fou, o le matou vaitaimi fo’i lenei e amatalia loa le fonotele, o Manu’atele lava e fafaga ma faia fa’afiafiaga, ma ua tatau fo’i ona taulaueleele atu ai le mamalu o afio’aga i’inei mo lena fa’amoemoe tele!” O se fa’amatalaga lea a le tina matua, aua o le latou Fa’afeagaiga Rev. Fa’ata’ape Lavata’i o le peresetene o Lotu Tu’ufa’atasi o le Lalolagi ma o lo’o faia le fonotele o nei lotu Kerisiano i Kanana Fou lea fo’i e tatau ona o mai uma ai lana Ekalesia mai Ta’u mo lea fa’amoemoe.

Lona lua, e fa’apena fo’i le tauaofiaga a le Ekalesia Fa’apotopotoga Kerisiano i Amerika Samoa lea e amata tauaofia i le ulua’i vaiaso o Iulai 2012, e masi’i uma mai ai afio’aga o le Manu’atele, aua e i ai fo’i o latou sao lautogia mo lena fa’amoemoe o le Ekalesia.

O lo’o femalaga’i pea le Va’alele a le Inter Island, ae e le mafai ona uta tele ai nei ituaiga o oloa e papa gofie ma lamatia ai le soifua o tagata femalaga’i pe afai e auina mai i ana malaga uma. Ae ua fa’afetai, aua e le o motusia ai le maua o le suka, fasimoli taele ma isi oloa laiti fa’apena, ae o oloa e mamafa pauna e ao lava ina aumaia i malaga a va’a alalo.