Ads by Google Ads by Google

Auai AS i le Pacific Arts Fest: Atu Solomona

Ua mautu le tatou au fa’afiafia e masi’i atu mai le tatou malo mo le Fa’aaliga o Tu ma Aga a le Atuvasa, ua mae’a tapena ai le ausiva a le Kolisi Tu’ufa’atasi, mo le fa’aaliga o tu ma aga a Samoa i Solomona, fa’atasi ai lea ma le aumalaga e to’a 20 o i latou e aofia ai le sui o le Komiti Fa’afoe, o Atisi Samoa, o sui o le aufaigaluega ma le Malo fo’i. O le aumalaga atoa e masi’i e to’a 50 i latou.

O le a tu’ua i latou lo tatou atunu’u i le aso 25 Iuni, 2012 ma latou uia ai Samoa i le va’alele ua masi’i atu ai fo’i le aumalaga a Samoa Tuto’atasi mo Solomona. Ua fa’apena fo’i ona fa’ailoa mai o le vaitau sa’o mo lea fa’aaliga ua fa’ataoto lea mo le aso 27 Iuni se’ia pa’ia le aso 12 Iulai, 2012 i Solomona lava.

Ua fa’ailoa mai e matua to’atele lava le aumalaga a Niu Sila ma Ausetalia e fa’aalia a latou tu ma agaifanua i lenei fo’i tausaga.

Ua fa’ailoa mai e le malo o Solomona, le fesoasoani tupe e $100,000. ua taua’aoina ane e le Malo o Ausetalia ma le malo o Niu Sila ina ia fesoasoani e fa’atupe ai le tapenaga o le nofoaga mo le fa’aaliga o Tu ma Agaifanua o malo uma o le Atuvasa a le Pasefika.

Ua tatou iloa, o lea taligamalo na tuana’i sa talimalo ai Amerika Samoa ma o lenei tausaga ia Iulai -Aokuso 2012, o le a talimalo ai Solomona.

$100,000. Meaalofa Ausetalia & Niu Sila - Fa’amae’a tapena Arts Fest:

Ua fa’ailoa mai e se tala tusia i le Nusipea a le Solomon Times ua mae’a taua’aoina se meaalofa tupe e $100,000. mai le malo o Ausetalia ma Niu Sila e fesoasoani i le taligamalo o le Fa’aaliga o Tu ma Aga a le Atuvasa i Solomona.

 Ua fa’ailoa mai o lea meaalofa tupe, ua fa’amae’a lelei ai le tapenaga o lea nofoaga mo fa’aaliga, i ona moli ma mea fa’aleotele leo ma o nei mea o le a fa’aaogaina uma lava e fa’aaliga o tu ma ata a atumotu ta’itasi o le a auai i lenei fa’aaliga tele a le Pasefika.

Ua fa’ailoa mai, ua matua fiafia nei malo tetele e lua i le avanoa ua maua e fesoasoani ai mo Solomona i lana taligamalo, aua ua i ai lo latou iloa, e le misia fo’i e i latou lea avanoa lelei e fa’aalia ai latou tu ma agaifanua i lea fo’i fa’aaliga, ma e silia ma le 300 o latou sui auai i lea fa’aaliga mai malo nei e lua.

E ese mai lenei fesoasoani tupe, ae ua fa’ailoa mai fo’i e to’atele fo’i fesoasoani ua mae’a fa’ao’o ane e Niu Sila ma Ausetalia e ala i tagata faufale, tagata e i ai tomai mo fausaga o nofoaga ma le tosoina o le uila ma le suavai taumafa i nofoaga ma fale ua fa’atulaga mo fa’aaliga, ae maise nofoaga e nonofo ai le au fa’afiafia ma isi fo’i nofoaga mo fefa’atauaiga o nei galuega alofilima o atunu’u uma o le atuvasa.

E aofia mai i le aumalaga a Ausetalia, ua a’ailoa mai e to’a 50 a latou atisi ta’uta’ua lava o le a auai ma a latou folasaga ma galuega taulima e fa’aalia i le fa’aaliga ale atuvasa i Solomona.
Ua fa’ailoa mai o le a auai ane le latou fa’aili ua fa’aigoaina o le Tjupi Band lea ua fa’ailoa mai e i ai a latou musika po’o pese fa’arekei Fa’a- Ausetalia ma o lo’o i ai le latou pese sili ona alumia i Ausetalia e fa’aigoaina o le “Pa’u Lanu sese!”O le a mafai ona maimoaina lenei aufaipese matagofie a Ausetalia i le taimi o le latou fa’aaliga.