Ads by Google Ads by Google

Talosaga malo feterale fa’asala Pase mo le 27 masina

Ua talosagaina e le malo feterale le faamasinoga feterale ina ia faasala Mine S. Pase i le 27 masina i le falepuipui, atoa ai ma lona totogiina o le tupe e $325,408 e kava ai tupe sa ia faaaogaina. O taeao lea ua faamoemoe e faasala ai Pase i luma o le faamasinoga feterale i Uosigitone.

I le talosaga na faila e le malo feterale i le vaiaso na te’a nei, o loo latou taua ai le tele o tausaga o faia e Pase, o lona aiga ma nisi sa latou fai fai mea faatasi o ni gaioiga ina ia latou gaoia ai le tupe e $325,000, o tupe sa tuuina mai e le feterale e faatupe ai le polokalame a le American Samoa Special Services Commission (ASSSC).

Ma o lea gaioiga sa faia e Pase, e le gata ua leiloa ai le faitau afe ma afe o tue a tagata totogi lafoga i Amerika, ae ua aafia ai foi ma se tasi o polokalame sa fesoasoani ai i tagata Amerika Samoa, e aofia ai polokalame mo tupulaga talavou e pei o aoga komipiuta, o aoga faufautua faapea ai ma polokalame e puipuia ai le siosiomaga o le atunuu.

O le masina o Novema na te’a nei na tali ioe ai Pase i le moliaga, o lona taupulepule lea ma isi tagata e gaoi le tusa ma le $325,000 lea na tuuina mai e le AmeriCorps mo le ASSSC.

Ae i le talosaga a le loia a Pase ua ia talosagaina ai le faamasinoga ina ia faasala le ua molia i se faasalaga e maualalo mai i lo le faasalaga ua fautuaina e le malo ma le Ofisa Faanofovaavaaia.

Fai mai foi le loia a Pase, o loo finau le malo ina ia toe totogi e le ua molia le tupe sa ia faaaogaina, ma o loo faanaunau i ai le ua molia na te faia lea tulaga.

I le otootoga o le talosaga sa faila e le malo mo se faasalaga o Pase, o loo faailoa atu i ai le aofai o le tupe sa mafai ona maua e le tagata mai le tupe sa latou faaaogaina.

Fai mai le malo, e tusa ma le $123,236 na maua e le tagata e toatasi mai le $325,408 na gaoia mai i tupe a le feterale, o le tupe foi lea sa maua e le tagata e toatasi, sa totogi atu mo pasese ma mea e faaaoga i malaga a Pase ma nisi o lona aiga.

Na lagolagoina e le malo feterale le fautuaga a le Ofisa Faanofovaavaaia mo se faasalaga mai le 24 masina e oo atu i le 30 masina mo Pase.

faaliliu Ausage Fausia