Ads by Google Ads by Google

FA’ALAUILOA ATA TIFAGA O LE “SILAMANINO” I SAMOA

O se tasi o matati’a na ausia e Samoa i le taimi sa faamanatu ai lana Iupeli Auro i le lua vaiaso talu ai, o le faalauiloaina ai lea o se tasi o ata tifaga e autu i tagata Samoa, ma faaaogaina ai foi lana gagana, lea ua faaautu o le “SILAMANINO.”

O le tamaitai o Eliza Su’a na tuufaatasia lenei ata tifaga, lea o loo avea ai le tamaitai sa avea ma Lalelei o Samoa i tausaga ua te’a ia Verona Parker ma autu i ai gaioiga uma o lenei ata tifaga.

Na taua e Su’a, o le ata lenei na tuufaatasia faapitoa lava mo le faamanatuina o le 50 tausaga o le fu’a a Samoa, ma o se ata foi o loo faailoa atu ai le soifuaga faa Samoa e pei ona i ai le upu “Sila”, atoa ai ma tu ma agaifanua a le atunuu.

Na faafetaia e Su’a le atunuu ona o le latou lagolago aemaise ai o le taitaiga a le Atua ua mafai ai ona taunuu ma le manuia lenei faamoemoe.

“O se mea sili lava, ua ou iloa nei e lo’u tagata fa’atauva’a, e matua tetele loto o i latou na matou tausoaina galuega fa’atino ia to’ai taunu’u i lenei taunu’uga lelei lea galuega. Ua tasi le loto ma le fa’amoemoe, ma ua mafai ai ona tu’ufa’atasia se poloketi e aoga mo tagata uma i le taimi nei, ae a fo’i le lumana’i.”

O lenei ata, o lo ua mae’a maimoaina e le afioga le Kovana Sili o Amerika Samoa, Togiola Tulafono ma le faletua Maryanne Tulafono, le afioga le Palemia Tuilaepa ma Gillian Malielegaoi ma le anoanoa’i o e uma na mafai ona ofi i lea nofoaga sa tatalaina aloa’ia ai fa’atauga o le ata, ma ua fa’ato’a maimoaina ai lona tu’ufa’atasiga o lea fo’i galuega tele i tomai tau fai ata tifaga.

 I se saunoaga fa’amalosi’au a le Palemia sa ia fa’apea ai, “O le isi lea tomai ua ou matua naunau e fa’aa’e i o tatou tagata ua agava’a ai, ina ia matua tauina le taua ia manumalo, ma ia saga sili atu le lelei ma le maoa’e o nisi taumafaiga e mafai ona fofoa mai ai puna’oa mo i latou o lo’o fa’a’au’upegaina mo nei tomai, ae maise le atunu’u ua outou alofagia ma tatou o nonofo ai.”

“Teine o le Vine’ula” - Lipine Pese o le 50 Tausaga o Samoa

O le lipine fou ua tatalaina fo’i e fa’amau fa’ailoga ai le Iupeli Auro o Samoa, na fa’afao i ai a’ao ae maise o si’ufofoga malie o “Teine o le Vineula” mai le afio’aga o Apia. O tama’ita’i lava nei o le taulaga, o i latou nei sa mua’i fa’ailo e avea ma taulaga o Samoa, ma ua le ‘alo ai fo’i so latou fanoga, e fia fa’amauina le Iupeli o Samoa.

O lea lipine ua fa’ailoa mai e 10 pese aulelei ma atoatoa ona tu’ufa’atasia i ai siufofoga malie o tama’ita’i matutua ae maise o tama’ita’i talavou o lea aufaipese. O le sui sili ona matua o le aufaipese lea, ma o ia fo’i o lo’o va’ava’aia toto’a le tapenaga atoa o Atelina Tuiletufuga Hunkin - Mamae.

O pese uma ua tu’ufa’atasia i lenei Lipine o pese fa’amanatu ia i le atunu’u o le latou savaliga uma ua atoa nei le 50 tausaga. E ao lava ina pepese ai augatupulaga o fai a’e ma ia latou manatua e le’i faigofie le tele o ia tausaga i le soifua o latou tua’a.

E to’a 14 totino o le aufaipese a “Teine o le Vineula” ma ua aofia ai:  Togialelei Taloapatina Tuiletufuga- Silva, Atelina Tuiletufuga Hinkin- Mamae, Hinemoa La’avasa, Maria Lesatele, Fuapepe Tuiletufuga, salauimatagi Tuiletufuga- Tavita, Siniva Tavita, Fa’asegi Manuaigaalii, Helena Ainu’u, Haleyquin La’avasa, Aitu Tavita, Jaycina Silva, Tyler Hunkin- Laumua ma Michael- George Taualai Silva. O le ali’i pito i itiiti o lenei aufaipese e na’o le 3 ona tausaga.

O lo ua i ai le fa’anaunauga o lenei galuega, ia i ai le fanau e toe aulia le isi 25 tausaga o le a fa’aopoopo o Samoa ma le isi fo’i 50 tausaga o fa’aopoopo mai o le savaliga uma a Samoa Tuto’atasi, ia so’o ai le fau ma le fau i le fa’amoemoe o pesega fa’amaumau a le “Teine o le Vineula mai Apia.”

saunia: Leua Aiono Frost