Ads by Google Ads by Google

Tala o Fa’amasinoga

MOLIA SE ALI’I NA SOLA MA SE TAGA APA ‘CHIPS’

O le alii lea na sola ma le taga pepa o lo o i ai apa chips a le fanau a le tamaitai sa avea ma sana uo teine, sa ia taua i leoleo e faapea, na mafua ona ia faia lea tulaga o ana mea ula lava, ae maise ai foi, e tago atu i totonu o apa chips e leai ni mea o i ai, o lea na ia toe tia’ia ai le tagapepa.

Na taua e le fafine na tagi i leoleo e faapea, a’o nofonofo ma nisi o ana uo i luma o le kamupani i le Aso Lulu na te’a nei, sa tei ina ua savali atu le alii o Laniselota Fiti ma u’u le taga pepa o lo o i ai apa chips a lana fanau sa taatia i ona luma, ona oso lea i le pasi.

Na faailoa e le fafine i leoleo, o le alii lea na alu ma lana pepa faatau e ulupoo, peitai ina ua taofi e leoleo le pasi sa vaaia ai e toalua ulupoo o lo o i ai, o lea na faatonu ai e leoleo ulupoo uma ia e toalua ina ia latou o i le ofisa o leoleo.

Ina ua taunuu i le ofisa o leoleo, na agai atu le fafine sa tagi ma faasino le ulupoo na sola ma lana faatau.

Ina ua fesiligia e leoleo le alii o Fiti, sa ia faailoa ai e lua ana fagu valima sa inu i le afiafi lea.

Ua tatala i tua Fiti mai le toese ma le poloaiga a le faamasinoga, ua faasa ona toe taumafai e faafesootai le tamaitai sa tagi i lenei mataupu.

NOFOVA’AVA’AIA TAMA’ITA’I NA FA’AO’OLIMA I SE TINA MATUA MA LANA TAMA

O le au tama’ita’i e to’atolu lea na tu’uaia e le malo i lo latou fa’ao’olima i se tina matua ma sana tama, ua faanofovaavaaia mo le ta’i tausaga, i lalo o poloaiga e ao ona latou usita’i, ina ua ta’usala i latou i le moliaga mama o le fa’atupu vevesi i nofoaga faitele.

O nisi o poloaiga ua tu’uina atu e le fa’amasinoga ia Leaniva Saifoloi, Sarai Lemalu ma Talaleu Fanene, e aofia ai le fa’asa ona o latou toe taumafai e fa’afeso’ota’i i laua na aafia i lenei mataupu, aua nei o latou toe soli se tulafono, ma ia latou totogia se salatupe e tai $150 a le tagata.

Na ulua’i tu’uaia e le malo i latou nei i le fa’ao’olima i le tulaga tolu fa’apea ai ma le fa’atupu vevesi i nofoaga faitele, ae i le mae’a ai o le latou fa’amasinoga, na ta’usala ai i latou i le moliaga o le fa’atupu vevesi i nofoaga faitele.

O le fa’alavelave na mafua mai ina ua o’o atu i latou nei i Nu’uuli (Coconut Point), ae na fa’ailoa atu e le tina matua, e le mafai ona paka le latou ta’avale i luga o le fanua i Coconut Point, peita’i na avea ma itu na fa’asaga atu ai le au ula ia ma fa’ao’olima i le olomatua ma lana tama, e pei ona taua e le malo.

TUU ATU MALO SE OFO MO REV. FILOIALI’I

Ua tauaaoina nei e le ali’i faifeau ia Rev. Ali’ioaiga Filoiali’i ma lana loia se ofa mai le malo, ina ia faamuta ai le mataupu e pei ona tu’uaia ai o ia, ona o le faalavelave lea na manu’a ai se teineititi e 12 tausaga ia Setema 19, 2010, ma i’u ina maliu ai ina ua tuana’i aso e 11.

Na talosagaina e le loia a Rev. Filoialii, o Fiti Sunia, se avanoa e toe tolopo ai lenei mataupu, aua se avanoa la te talanoa ai ma le ua molia e uiga i le ofa lea ua tuuina atu e le malo.

O Rev. Filoiali’i o lo o avea ma Feagaiga taulagi a le EFKAS i Faleniu, o lo o tuuaia i le moliaga mamafa o le ave ta’avale fa’atamala ua mafua ai ona o’o le maliu i se isi tagata, o se faasalaga e mafai ona faasala ai se tasi i le toese, i le silia ma le lima tausaga, po o se salatupe e le silia ma le $5,000, po o faasalaga uma e lua.

I faamaumauga a le faamasinoga o lo o taua ai e faapea, o le teineitiiti ua maliu na savavali ma sana uo i i luga o le auala i Faleniu i le aso 19 o Setema 2010, a’o saoasaoa atu le  ta’avale, a le ua molia, ma lavea ai le teineitiiti, ma fa’anatinati atu ai i le falema’i ma i’u ina maliu ai o ia.

O le vaiaso fou lea ua toe tolopo i ai lenei mataupu.

TAU SAILI SE FA’ALILIUUPU A SE ALI’I FILIPAINA O LO O LOKA I LE TOESE

O le faafitauli numera tasi o lo o feagai ma se alii mai Filipaina, lea o lo o taofia i le toese i Tafuna, ona o tu’uaiga o lona tagofia o itutinosa o se tamaitai, o le tau sailia o se faaliliu upu e fesoasoani i taualumaga o lona faamasinoga.

I le iloiloga a le alii o Victor Liwan Tacloloy i le vaiaso nei, na faailoa ai e lana loia i le faamasinoga, ua maea ona tuuina atu e le malo sa latou ofa mo Victo, peitai ua telegese lenei mataupu, ona o le tuai ona maua o se fa’aliliu upu.

Na talia e le alii faamasino sili lagolago ia Lyle L. Richmond le talosaga a le tamaitai loia o Leslie Cardin ina ia toe tolopo le iloiloga a Victor i le vaiaso nei, ina ia maua ai le avanoa e tau saili mai ai se faaliliu upu.

O l oo taofia pea Victor i le toese, e faatali ai le isi ana iloiloga i le Aso Gafua o le vaiaso fou.

Fai mai le malo, o se inugapia sa i ai le ua molia ma se tamaitai talavou ia Oketopa 2011, na afua mai ai tuuaiga faasaga ia Victor ina ua mae’a le inugapia, ae taumafai ai le ua molia e faia ni uiga mataga i le tamaitai lea, e aofia ai lona taumafai e tagofia ona itutinosa.