Ads by Google Ads by Google

TOE SAUNIGA ALII NA MALIU LUGA VAA FAGOTA

O le vaiaso nei na faataunuuina ai toe sauniga o le alii o Manolito "Amang" Calvez, lea na maliu mai i luga o se vaa fagota ao faatino ai ona tiute o se alii fagota, ma o le toatele o lona aiga ma uo na lolofi atu e molimauina lea faamoemoe taua o lona soifuaga.

O le sauniga na faia lea i le malumalu o le ekalesia Katolika i Fagaalu, ao lumanai ai le momoliina atu o lona tino maliu i lona atunuu i Filipaina, lea ua faamoemoe e lagomau ai.

O molimau i lona olaga mai lona aiga na taua ai, o ia o se alii tauagafau ona uiga, e fiafia ma loto alofa, e galue faamaoni ma galue malosi, o ia foi o se tasi e loto aiga ma faauo i soo se tasi.

Fai mai foi molimau a lona aiga, o le galuega a lenei alii i luga o le vaa fagota na mafua ai ona ia aumaia lona aiga ma nisi e fesootai i ai i Amerika Samoa ma latou nonofo mau ai.

O le vaa fagota o le MV Carol Linda lea na galue ai lenei alii, na tulai mai ai se faalavelave in a ua manu'a o ia ma i'u ina maliu ai i le aso 9 Me 2012. Fai mai se ripoti, e toalua e toalua ni alii na manunu'a i le faalavelave lenei, ina ua gau le la o le vaa o loo pipii i ai le boom, ma pau mai i lalo ma lavevea ai i latou e aofia ai ma Monalito.

O molimau mai lona aiga sa latou faamatala ai uiga o lenei alii ma le taimi na o latou maua ai le tala.

E le i fa’afiti lea molimau i le si’itaga ua sola Monalito, ae ua mae’a fa’aea ai e ia si ona aiga i Filipaina, ae maise o le tina ma le fanau ua tu’ua ae malaga e malolo. Ona o lo’o i ai pepa nofo mau o le faletua o Amang i le tulaga o lo’o tatali lana fonotaga i le Komiti Fa’afoe mo Femalaga’iga, o lea ua tu’ua vave ai e le tina ma le fanau le tatou nei malo, ae o atu i Filipaina i le ala umi, e uia ai Samoa, Niu Sila ma Ausetalia, ona fa’ato’a malaga ai lea i Filipaina. Ae o lona tino maliu, ua malaga ese atu lea ma le va’alele a le Hawaiian Air i le po o le aso Tofi, ma o lo’o malaga ai le uso matua o Monalito fa’atasi ma isi sui o si ona aiga, e latou te uia lea ala i le ea e to’ai taunu’u ai i Filipaina mo lona toe sauniga i lona aiga ma falelauasi ai.

Sa tautuaina e le TLYuen Funeral Homes lona sa, ma sa saunia fo’i se upu fa’amalosi’au e le susuga Patele ma le Aufaigaluega Katoliko i Faga’alu Rev. Malaki Timu.

I le molimau a Patele sa ia fa’ailoa ai, “Masalo o a’u lava le tagata na muamua i luga o le va’a I’a a le Carol Linda i le taimi na taula mai ai, ae ua iloa patino e le Malo o lo’o aumaia ai le tino maliu o Monalito ma se tasi o le auva’a o lo’o manu’a tigaina ai.”

“Ua mafua lea tulaga, ona o le talosaga a le ali’i Kapeteni, a’o faia lava se isi gaoioiga o su’esu’ega ma mea uma e faia e OSHA, Leoleo ma le USCoast Guard, fa’amolemole e fia faia se lotu o le sui ua fa’ia i le vasa a’o faia ona tiute e tusa ai o taleni sa fa’ao’aina o ia e lona Atua.”

“O le afuaga lea, ona o Monalito Amang, e iloga i le latou auva’a ma le Kapeteni, e fiafia tele e faia ana tatalo, ma e agamalu, e le fa’atupu vevesi, ae galue malosi tele. Na ou va’aia le fa’aletonu, ma ua va’aia ai, o le alofa o le Atua ua amia ai na’o le tasi le ola i lenei fa’alavelave, sa tatau ona to’atele atu nisi e a’afia ma amia o latou ola i le fa’alavelave. Peita’i, na fa’ailoa mai, e to’a 12 i latou o e mananau’a ai i lea mea na tupu, ae le o ni manu’anu’a e o ai i le falema’i pe ono lamatia ai o latou soifua, ua na’o na mitimiti o latou lavevea.”

“I lea taimi na ou va’aia ai nei fa’aletonu, sa tau i lo’u mafaufau le fa’aupuga a le Pelofeta o Paulo na ia fa’apea ai, “O le fa’atuatua tatou te savavali ai, ae le o le tino mai o mea.” O lenei fo’i nu’u tatou te i ai, e le o lo tatou nofoga tumau lea, peita’i ua i le lagi lo tatou nu’u moni, e tatou te le toe popole ai, tausaili se manuia, pe toe tiga ai ma fa’anoanoa!”

“Fa’afetai i le Atua mo le taimi na atofaina mo Monalito Amang e mafuta ai ma i tatou uma o lona aiga Kerisiano ma lona aiga fa’aletino i lalo nei, ae ua ia saunia lona aiga, mo mafutaga tumau i le ola e fa’avavau pe afai tatou te tausi pea i ana poloa’iga, ma tausisi i mea lelei!”