O le alii lea o loo loka e le malo i le falepuipui ona o tuuaiga i lona faamalosia lea o lona toalua la te faiaiga (tulou) e aunoa ma le malie i ai o le fafine, atoa ai ma lona taumafai e ave faamalosi o ia i totonu o le taavale, sa ia faailoa i luma o le faamasinoga maualuga i le vaiaso nei, e le moni tu’uaiga ia a le malo.

Ona o lea faamatalaga mai le ua molia, ua toe tolopo ai le fofogaina o sa latou maliliega sa sainia ma le malo, ae ua fautuaina e alii faamasino loia ina ia toe talatalanoa i le ua molia e uiga i lana tali ua tuuina atu, afai lava e tumau o lona uiga o le a faatulaga loa le aso e faia ai lana faamasinoga autu.

O le vaiaso nei na fofogaina ai se maliliega ua sainia e le malo ma le alii ua molia, ina ua talosaga le malo i le faamasinoga e talia le tali ioe a lenei alii moliaga mama e lua lea ua latou toe  suia, ae solofua isi moliaga mamafa o loo totoe ai, ae talu ai o le tali tete’e a le ua molia, ua toe tolopo ai i le aso Lua o le vaiaso fou lenei mataupu.

E talitonu le faamasinoga, e foliga mai e le o malamalama lelei le ua molia i le moliaga lea o lea tali ioe i ai, o le isi lea mafuaaga ua toe tolopo ai e le faamasinoga lenei mataupu.

E tusa ai ma vaega o le maliliega sa tolaulauina i luma o le faamasinoga maualuga, o le  a tali ioe le ua molia i moliaga mama e lua, o lona taumafai lea e ave faamalosi se tagata, faapea ai ma lona tagofia o itutinosa o se tamaitai i le tulaga lua.

E tusa ai o faamaumauga a le faamasinoga, o le mataupu ua tuuaia ai le ua molia na afua mai i se vevesi na tulai mai i le la va ma lona toalua, ina ua fesiligia e le ua molia lona toalua i se la faanunumi ma se isi tagata i le nofoaga o loo faigaluega ai le fafine.

Na avea le alu atu o le ua molia ma fesiligia lona toalua i le nofoaga e faigaluega ai ma itu na tuuina atu ai le fafine i lalo o le vaavaaiga a le malo, ma auina atu ai loa o ia e nonofo ma nisi o lona aiga, peitai na i’u lava ina oo i ai le ua molia i le fale sa nofo ai lona toalua, ma o iina lea o loo tuuaia na alia’e mai ai le faalavelave, ina ua faamalosi e le ua molia lona toalua la te faiaiga e ui sa musu le fafine.

Na faailoa e le fafine i leoleo e faapea, na mafua ona ia le teena le gaioiga a lona toalua sa faia ia te ia, na musu ina ne’i ona faia se isi mea leaga ia te ia, aemaise ai o lea sa faailoa atu e lona aunty o loo alu atu le ua molia ma se samala ma se naifi.

Ina ua maea ona faamalosi e le ua molia lona toalua i totonu o le potu, e pei ona tuuaia ai o ia e le malo, sa ia fai i le fafine la te talatalanoa e uiga i le la mafutaga, e le’i ae toe fai le ula lea i le fafine la te toe faiaiga peitai sa tagi le fafine ma faatoese fai ai e taofi lana mea o loo fai, lea foi na usitai i ai le ua molia ma ia fai loa i lona toalua la te o i le la fale la te talanoa ai e uiga i le la mafutaga.

A’o savavali atu le ua molia ma lona toalua i luma o le faletupe o le ANZ Bank i Fagatogo, sa taumafai ai loa le fafine e alu i le ofisa o leoleo, peitai na toso atu e le ua molia o ia ina ia aua nei alu i le ofisa o leoleo, e le gata i lea, na taumafai foi le ua molia e toso lona toalua i totonu o  le taavale a se tasi o ana uo sa faanoi i ai mo se lifi.

Fai mai le fafine, ao taumafai e ee i luga mo se fesoasoani, na pupuni e le ua molia lona gutu i lona lima.

E $35,000 le tupe o loo taofia ai le ua molia i le toese e faatali ai  le isi ana iloiloga lea ua faatulaga mo le vaiaso fou.