Ads by Google Ads by Google

TOGIOLA: Ave sau faafetai i fitafita …

ma tuaa sa tautua mo le atunuu

E leai se isi feau na momoli atu e le alii kovana ia i latou sa molimauina le sauniga e faamanatu ai le tautua sa ofoina atu e fitafita, faapea ai tuaa ua lagomau mai atutia, nai lo le ave o sa latou faafetai e faamanatu ai ma faaaloalogia ai la latou tautua sa ofoina mai mo le atunuu.

Na tutulu le alii kovana a’o saunoa i le saunoaga autu o lenei sauniga faapitoa i le taeao ananafi, ao molimauina e sui o le malo, le atunuu, atoa ai ma nisi sa tautua i le malo ae ua malolo litaea mai i le Faletele i Utulei, le malae o le Su’igaula a le Atuvasa.

Na tutulu le afioga i le matua ia Togiola Tulafono ao ia taumafai e toe faatepa le mamalu o le auvalaaulia i le amataga o lenei sauniga mai aso ua mavae, lea e le’i amataina mai e le malo, ae o se sauniga na tuu faatasia e nisi o tina o le atunuu, ina ua latou maitauina tuugamau  o i latou sa tautua i le malo ua amata ona le toe manatu mamafa i ai tagata, vaoa ma ua ola ai fo’i laau i luga o ma’a o tuugamau.

“Ona fai mai lea o tina sa latou maitauina lea tulaga, o se tuugamau lenei o ai? A’o se atalii o ai lea o loo taoto ai i lenei tuugamau?” o nisi ia o saunoaga a le kovana ao ia taumafai e toe faatepa le atunuu i le amataina mai o lenei sauniga, lea ua faaauau e le malo i le taimi nei, ae ua le toe vaaia ni sauniga e faataunuuina e ekalesia ma nuu.

Saunoa Togiola, o le agaga lea na mafua ai ona faataua e tina nei lenei sauniga, o le agaga tonu lena e tatau pea ia Samoa ona faaolaola pea e oo mai i le taimi nei, ona ua i ai le manatu ua taunuu le upu e masani ai nisi, “ua lilo atu lava i le vaai i latou nei ma ua lilo atu ai foi i manatu.”

“Ou te manatu la ina ia tatou suia lea faaupuga e faapea, “e ui ua lilo atu outou i le vaai ae le galo,” o le saunoaga lea a le alii kovana.

Fai mai Togiola, o le toatele o Toa o Samoa ua maliliu sa ofoina atu lenei tautua, e le mafai ona galo la latou tautua, ma o i latou ia na ofo atu o latou soifua mo se saolotoga o tagata uma ma le lalolagi.

Na tutulu faalua le alii kovana ao ia taumafai e faamalaulau le toatele o fitafita o loo maliliu i le sami ma nofoaga eseese o le lalolagi e lei mafai ona toe maua o latou tino, peitai o se tala fiafia mo Amerika Samoa, ona e lei i ai sana fitafita o loo maliu ai i nofoaga ia e lei toe faafoiina mai lona tino e lagomau i lona atunuu.

“E ui tou te le o lagonaina mai i matou, ae o la matou tatalo ia faaoo atu e le Atua ia te outou le matou faafetai e tusa ai o la outou tautua, lea ua mafua ai ona matou maua lenei saolotoga,” o sauniaga faaiu ia a le alii kovana.

O le susuga i le alii faifeau ia Rev. Tofiga Tofiga o le ekalesia EFKAS mai Alao na taitaia le sauniga lotu, atoa ai ma viiga na lagiina lava e le aufaipese a lea ekalesia.

O le vaega a le JROTC mai le Aoga Maualuga a Samoana na momoliina atu tagai ao tutula’i faaaloalo le mamalu o le au valaaulia, ae o le faapapaina o fanau sa gafa lea ma le vaega a le U.S Army Reserve.

O le maea ai o le sauniga lotu atoa ai ma le saunoaga mai le alii kovana, na sosoo ai loa ma le tuuina atu o le teu fugalaau i luga o le sami, mo soifua o i latou sa maliliu ao tautua ai i vaega au eseese a le malo, faapea ai foi ma le faamanatuina o le tautua sa ofoina mai e tuaa ua lagomau mai tiasa, lea sa tauaaoina atu e le alii kovana, ao molimauina e le mamalu o le auvalaaulia.