Ads by Google Ads by Google

Tala o Faamasinoga

ROMEO PERETANIA

O le 13 Oketopa lea ua faatulaga i ai le faamasinoga autu o le alii o Romeo Peretania, lea o loo tuuaia i lona umia faasolitulafono lea o fualaau faasaina, le ituaiga o le aisa.

Ina ua valaau le mataupu a Peretania i le taeao ananafi, na faailoa ai e lana loia o Mike White i le faamasinoga e faapea, e leai se maliliega ua taunuu i ai itu e lua, ae sili loa pe a faatulaga se aso e faia ai le faamasinoga autu a le ua molia, lea foi na talia e le faamasinoga.

O le isi iloiloga sa faatulaga mo Peretania, o le iloiloina lea e le faamasinoga, pe faamata ua soli e le ua molia tuutuuga o lana faanofovaavaaia, ae talu ai o lea ua faatulaga le faamasinoga autu o lenei mataupu ina ua tete’e le ua molia i tuuaiga faasaga ia te ia, ua manatu ai loa le faamasinoga o le a taofi le faataunuuina o le iloiloga faapitoa a le ua molia sei maea lana faamasinoga autu ia Oketopa.

O Peretania na taofia faatasi mai e leoleo ma Faima Fruean i lona aiga i Iliili, ina ua aga’i atu leoleo e faataunuu le poloaiga e sailia ai le fale o Peretania ae maua atu ai ma Fruean.

E tasi le pepa iila sa i ai vaega o le pauta faasaina o le aisa na maua i totonu o le ato tupe a Fruean, ae ina ua fesiligia e leoleo o ia na ia taua ai e faapea, o le pepa iila lea sa ia aumai mai se container sa ia Peretania, lea sa i ai isi pepa iila e 5 o loo i ai foi aisa i totonu.

O Fruean o loo tuuaia i lona umia faasolitulafono o aisa ae o Peretania o loo tuuaia i lona umia faasolitulafono o aisa ma le faamoemoe e tulei ma faatau atu i isi tagata.

TETE’E TOEAINA 93 ONA MOLIAGA

Na teena e le toeaina e 93 tausaga le matua moliaga faasaga ia te ia, ina ua tulai i luma o le faamasinoga maualuga i le vaiaso na te’a nei.

I le teena ai e le ua molia o tuuaiga faasaga ia te ia, ua faatulaga ai loa lana uluai iloiloga e faia lea i le aso 30 Iulai.

O le tali tete’e a le ua molia na faaleo lea e lana loia o Sharron Rancourt, lea fo’i e le’i tete’e i ai le loia a le malo o Mitzie Folau.

E le o mafai e le Samoa News ona faalauiloa le suafa o lenei tama ona o puipuiga lava i le alualutoto o loo aafia, e faamalulu atu ai i le  aufaitau ona o lea tulaga.

O le teineititi o loo aafia e 4 tausaga lona matua, o ia foi o le great granddaughter a le ua molia e pei ona taua i faamaumauga a le faamasinoga.

O loo tuuaia lenei tama matua i moliaga o le faia lea o uiga faasotoma, faia o gaioiga faafeusuaiga i fanau laiti, tagofia o itutinosa, faapea ai ma le faia o gaioiga e ono lamatia ai le saogalemu o fanau laiti.

Ua tatalaina nei i tua le ua molia ina ua totogi e lona aiga le $5,000 na faatulaga e tatala ai o ia i tua, e faatali ai le aso lea ua faatulaga ai le isi ana iloiloga.

LAMALA TUFELE

O le tamaitai faigaluega i le Falemeli lea o loo tuuaia i lona tala faagaoi lea o ni tupe mai totonu o teugatupe a ni tagata se toalua, ua faatulaga lana uluai iloiloga e faia i le aso 30 Iulai, ina ua ia teena tuuaiga faasaga ia te ia i le vaiaso na tea nei.

O le tali tete’e a Lamala Tufele na faaleo lea e lana loia fautua o Sharron Rancourt, ina ua valaauina lana mataupu i luma o le faamasinoga maualuga i le vaiaso na tea nei.

E lua moliaga o le gaoi o loo tuuaia ai Tufele, ma o loo tatalaina i tua i lalo o poloaiga mai le faamasinoga, ina ua ia totogia le $10,000 ma faatulaga e le faamasinoga e tatala ai o ia i tua.

O le galuega a Tufele i le falemeli sa mafai ai ona ia taulimaina nisi o faamaumauga e patino i ni tagata se toalua, o i laua ia sa faila a laua faasea i le faletupe o Hawaii, ina ua tala ese tagata le tai $200 mai a laua teugatupe e aunoa ma se faatanaga.

I faamaumauga a le faamasinoga o loo taua ai e faapea, o le aso 15 Novema 2011 na faaaoga ai e le ua molia le masini ATM i Tafuna e tala mai ai i tua le $200 muamua mai le teugatupe a le isi tagata, ae o le aso 16 Tesema 2011 sa ia faaaogaina ai le ATM i le Laufou Shoppiing e tala mai ai le isi $200 mai le teugatupe a le isi tagata.