Ads by Google Ads by Google

Teena Faamasinoga tagi faasaga i le Pule o le National Park

O le tagi lea na faaulu e Epifania Suafo’a Taua’i faasaga i le alii pule o le Ofisa o le National Park ia Superintendent Mike Reynolds, ua teena e le Vaega Iloilo o le Faamasinoga Maualuga, ina ua manino i iloiloga sa faia le le lava o ni  mau e lagolagoina ai lenei tagi.

O le tagi na faila i le aso 29 Aokuso 2011, ma o  loo tuuaia ai e Taua’i le susuga Reynolds i lona tuuaia lea o ia i le gaoiina o ni mea totino (artifacts) mai le National Park Service, atoa ai ma le faia o tuuaiga e tau faaleaga ai o ia i ni gaioiga na te lei faia.

O le faaiuga a le faamasinoga o loo faavae mai lea i le maea ai ona iloiloina o nisi o faaiuga sa faia i mataupu faapenei i tausaga ua mavae, atoa ai ma le iloiloina lea e le faamasinoga o tulafono ma taiala e faatatau i le failaina lea o ni tagi faasaga i tagata faigaluega a le feterale.

E tele ni faamasinoga ua maea na siitia mai e alii faamasino e lagolagoina ai la laua faaiuga e 11 itula sa tuuina mai e uiga i lenei mataupu.

O se tasi o mataupu na siitia mai e le faamasinoga, o le mataupu lea i le va o le Pulega o le Eletise ma le Suavai (ASPA) ma le kamupani fai auala a le McConnell Dowell i le 2000, faapea ai foi ma le mataupu i le va o Fuimaono vs Fuia, i se mataupu sa iloiloina e le Faamasinoga o Fanua ma Suafa i le 1993.

Na taua i le faaiuga a le faamasinoga e faapea, i tulafono  ma taiala a le feterale mo le taulimaina o ni mataupu savili faapenei, e tatau i le tagata e ana le tagi ma lana loia ona auina atu se kopi o le samania ina ia lesitala mai i le Ofisa a le Loia Sili a le malo tele, ona faapea foi lea ona toe auina mai se faamaoniga e iloa ai ua maea ona taulimaina lea tusi samania e le isi itu.

E talitonu le faamasinoga, afai e le mafai ona faamalieina vaega e pei ona taua o lona uiga e leai se avanoa e mafai ai ona fofogaina lenei mataupu.

O le alii loia ia Mark Ude na failaina le tagi e fai ai ma sui o Taua’i ae o Reynolds o loo tulai ai Marshal Ashley, Andrew W. McCarthy ma Virgina G. Lago.

I le faaiuga a le faamasinoga sa tuuina mai, o loo talosagaina ai e Reynolds le solofua o tuuaiga faasaga ia te ia, ona e le o i ai se malosi e faamasinoina ai lenei mataupu i luma o le faamasinoga.

Fai mai le faamasinoga, o le faamasinoga feterale faaitumalo e i ai le malosi na te iloiloina ai ituaiga mataupu faapenei,

I se vaega  o le faaiuga a le faamasinoga o  loo taua ai e faapea, o le gaioiga sa faia e Reynolds, sa faatino ai ona tiute o ia o le taitai o le Ofisa a le National Park, ma e le i lava foi mau sa tuuina atu e le itu tagi e lagolagoina ai, o gaioiga sa faia e Reynolds i le aso lea, sa i tua atu o auala e faatino ai lona tiute o le taitai o le Ofisa a le National Park.

Ua faamalieina le faamasinoga, o le gaioiga sa faia e Reynolds i le aso e pei ona taua, sa faavae lea i lalo o taiala ao avea ai o ia o se tagata faigaluega a le feterale.

O le afioga i le faamasino sili lagolago ia Lyle L. Richmond na sainia i lenei faaiuga, i le lagolagosua a le afioga i le alii faamasino lagolago ia Mamea Sala Jr.