Ua fa’ailoa mai le ituaiga o va’alele a Amerika, o le fuava’a e fa’atonutonu ae leai se ‘ave va’alele, ua osofa’ia se tasi o nofoaga i le itu i matu i sisifo o Pakisitana, ma ua fa’ailoa mai e to’aiva i latou ua maliliu ai.

O nei va’alele ua faia e le militeri a Amerika ina ia mafai ona latou o’o atu i nofoaga o lo ’o fa’amautu ai le 'au vaega tete’e a Take i le itu i matu o Waziristan, lea e fa’apea o tagata o lea vaega e fa’asagatau mai  le NATO ma Amerika i totonu o Afakanisitana.  O la latou osofa’iga lona lua lea, ma ua fa’ailoa mai i fa’amaumauga a vaega 'au a Amerika e tusa e to’afa sui fitafita tete’e nei ua maliliu ai i le osofa’iga lea i le aso Lulu.

O osofa’iga nei e fa’atonutonu a va’alele nei a Amerika, e osofa’ia lava nofoaga o tagata tete’e ma o i’ina fo’i lea e fafau mai ai osofa’iga a le vaega o fitafita tete’e a Pakisitana. O nofoaga fa’apitoa lea o lo ’o fa’amautu i ai sola’aga a le fitafita a Talipana.

Ua fa’ailoa mai e misele sa fanaina atu i le fale i Isokhel e latalata lava i Mir Ali, peita’i ua lavea ai se tasi o nofoaga taua i lea lava vaifanua. E to’alima i latou na maliliu lava i le taimi o le osofa’iga, peita’i o isi na totoe sa fa’ato’a feoti mulimuli ae ua taumafai i ai ni togafitiga.

ìO le nofoaga lea ua tulaga i le tua'oi ma Afakanisitana ma e iloga mai o le nofoaga lea e pito i sili ona fa’amautu i ai le vaega tete’e lea a Talipana  ma e to’atele fo’i ni isi o fitafita mai fafo e fetaua’i i ai,î o se fa’amatalaga lea mai le sui fa’asalalau a le BBC Aleem Maqbool.

O le osofa’iga lenei ua tupu mai i le taimi ua mae’a ai ona faia le maliliega a Pakisitana ma Amerika, ina ia taofia osofa’iga nei, pe afai e mana’o Amerika e fa’atumau pea le va lelei ma Pakisitana. Ua fa’ailoa mai e Amerika, o le nofoaga ua osofa’ia nei, ua avea ma nofoaga o le tele o vaega o fitafita 'ese'ese e latou te osofa’ia lava vaega a le NATO i Afakanisitana.

Peita’i, ua fai mai Pakisitana, o osofa’iga nei a va’alele fa’atonutonu a Amerika ua avea ma mea e so’ofa’atasi atu ai agaga o tagata Pakisitana i isi vaega 'au leaga nei ua fa’amautu mai i o latou laufanua ia. Ua fa’ailoa mai i le Ofisa i Uosigitone, ua matua tele le fa’aitiitia o nei osofa’iga talu mai lea maliliega a Amerika ma Pakisitana, ae le fa’apea o le a le osofa’ia pe afai ua matau atu, o lo ’o folifoli mai ni isi faiga fa’aterarisi i totonu o nofoaga nei o lo ’o fafau mai osofa’iga leaga tele i Pakisitana lava.

O le tulaga lea i osofa’iga a va’alele fa’atonutonu a Amerika, o le toe tatalaina o ala feso’ota’i i le va o Pakisitana ma Afakanisitana ina ua mafai ona fetufa’i sapalai a le NATO ua avea ma ni isi o mata'upu e atili ai ona faigata ona maua se maliliega mautu i le va o Amerika ma Pakisitana.

Ua finau mai pea Pakisitana, o osofa’iga nei a va’alele ia, ua solituina ai e Amerika lo latou nofo lelei ma le usita’ia o aiaiga o lea maliliega muamua. Peita’i, ua fa’ailoa mai e ni isi o tusitala, e le mafai ona usita’ia a’ia’i lea maliliega e Amerika, pe afai e le o fia feso’ota’i mai ta’ita’i o le Malo o Pakisitana i le malo o Amerika.

saunia: Leua Aiono Frost