Ads by Google Ads by Google

Fetaui Auva’a o le sisigafu’a

O lo ua fa’ailoa mai se tala le au va’a o le Telefoni o le Vainu’u ua manunu’a le to’atolu i se fetauiga na osofa’ia ai lea auva’a i se vaipanoa e tulaga i le Faletatalo i Palisi. Ua fa’ailoa mai o le to’atolu lea na osofa’ia e to’atasi na tui i le naifi, ae o le isi to’alua e lavea le tau’au o le isi, ae lavea le ogavae o le tasi.

Ina ua fesiligia le mafuaga ae pe moni fo’i lea osofa’iga, ae fa’ailoa mai e le susuga Le’iataua Lesa Tu’a, e moni lava e to’atolu sui o lana auva’a lea ua lavevea i lea fo’i fa’alavelave na oso i lea vaipanoa. O le auva’a o Lei’ataua e o mai Faleu, Manono, ma sa tupu lea mea i le po o le aso Faraile ua te’a nei.

“O le sui o le matou auva’a lea na tui i le naifi le ogavae, o ia lea ua matua tuga lava lona manu’a. O le isi ua lavea le tau’au ae o le isi o lona manu’a i lona lima, ma ua mae’a lava ona fa’ao’o i le falema’i ma togafitia uma i latou.” O se tala lea a Leiataua, ma ua ia fa’ailoa fo’i, ua tulaga lelei uma lava manu’anu’a o i latou nei.

O se tasi fo’i matai o le afio’aga Lesa Tominiko, sa ia fa’ailoa mai, “E le o manana’o susuga i ali’i Kapeteni e fa’ao’o fua lenei mataupu i le Ofisa o Leoleo, ua soloia lava fa’a-avafatafata i le va o maliliega a ali’i kapeteni lea fe’ese’esea’iga i le va o tama o auva’a ma ua uma ai fo’i i’ina.”

O le mea taua lava ia i matou fa’atasi ma le isi auva’a, “O le tu’ua mea ua sola i tua, ae tima’i le va’ai i le lumana’i ma le fa’amoemoe ua afua ai ona koleni malosi, ona o se sao lelei mo le sisigafu’a a le tatou Malo, ua atoa i ai le 50 tausaga o si tatou malo tuto’atasi.”

Talu mai lava lea mea mataga na tupu i le va o nei taulele’a, ua le toe sofa’i mai lava se isi mea i le va o nei auva’a, ae le o mausali lava se iloa o Lesa ma Lei’ataua i le mea tonu na tupu ua mafua ai lea fa’aletonu ma a’afia ai tino o nei ali’i e to’atolu o le la’ua auva’a mai Faleu Manono.

Na fa’amatala e i la’ua e tau masalomia e i la’ua na amata mai le koleniga i Tiavi i le taeao lava o lea aso. Sa i ai uma auva’a i lea a’ega o Tiavi ina ia koleni ia lava le malosi mo le fa’amoemoe o le tu’uga o le sisigafu’a. Peita’i, o le taimi o koleniga e i ai vala’au fa’amalosi agaga ina ia mafai ona a’ea le a’ega umi lea ma le maualuga, ae o le taimi la lea sa faia ai nei vala’au, ua feseta’i ai  vala’au a le isi auva’a i le tasi, ma o le afuaga lea o manatu fesasia’i i lo latou va.”

Peita’i, na fa’ailoa mai, ina ua mae’a le taeao sa toe feiloa’i auva’a nei e lua ma latou taumafai fo’i na matai e toe fa’aleleia ni fa’aletonu na tau alia’i i koleniga i Tiavi, ae ailoga o atoatoa ai ona loto fa’amagalo le isi auva’a i le tasi, lea ua fa’aauau mai ai pea i le afiafi po, lea ua a’afia ai nei sui e to’atolu.

Ona ua i ai nei lea fa’alavelave na tupu i a’ao o ali’i leoleo, ua o’o ai nei ina le toe ‘alo i latou mai le su’esu’e loloto i le afuaga o le fa’alavelave ma o le a faia le fa’ai’uga a leoleo a’o le’i o’o mai le tu’uga va’a i le sisigafu’a.

I se fa’amatalaga a le susuga Le’iataua sa ia fa’ailoa ai, “O le masani lava lea a talavou, o le manatu lava o le a faia se mea e le sa’o ma oso fa’atino, ae le mafaufau i le afaina fa’apea e ono toe fo’i mai i le taimi mulimuli, lea la o le a a’afia tagata e to’atele, ma e i’u ina le alo ai i le tu’uga nei sui uma sa a’afia i le fa’afitauli lea.”

Ua fa’ailoa mai e le’i mautinoa lelei le isi auva’a po’o ai lea na fa’ao’oina manu’anu’a i le auva’a lea a Faleu Manono po’o le Telefoni, ae ua fa’ailoa mai, o le auva’a a le “Tolotolo o Tama Uli.” Oi sole, sa o atu fo’i mai o tatou laufanua o totolo atu ae o lea fo’i ua o’o loa i Samoa Tuto’atasi ua toe tulioso a’e fo’i i luga tama ia!