Ads by Google Ads by Google

Finau loia a Pati Lepou e lei auai i le sola’aga

AMATA FA’AMASINOGA O PATI LEPOU

Na molimau le ali’i o Sefo Lemalu i le ulua’i aso o le fa’amasinoga o Pati Lepou, i le taeao ananafi, o Lepou na faia le tonu latou te sosola mai i le  toese i le po o le aso 22 Ianuari 2010, ina ia latou o i le fale o Lepou i Iliili e aumai mea o lo o ia mana’omia.

Na taua e Lemalu, o ia, Lepou, David Maea ma Gasona Mafiti sa latou auai uma i le solaaga i le po lea ma latou agai sa’o atu i le nofoaga o i ai le faletupe o le ANZ i Tafuna.

Fai mai Lemalu, e sosola mai le to’ese, ae ua toe 6 masina o lo o totoe o lona faasalaga faafalepuipui. Sa ia taua foi e faapea, sa loka faatasi i laua ma Lepou i le sela a’o tuli a la faasalaga.

O Lepou o lo o tuuaia i moliaga mamafa e tolu, e aofia ai le faomea i le tulaga muamua, faaoolima i le tulaga muamua, atoa ai ma le sola ese mai le toese. Ae e sosola Lepou ma lana vaega ia Ianuari, ae o lo o tuli foi seisi ona faasalaga, ina ua tausalaina i lo latou osofa’ia ma nisi ali’i, le faleaoga a le South Pacific Academy i Tafuna, ma gaoia ni mea totino mai totonu o le ofisa o le pule aoga.

Na ta’ua e le loia a le malo, o Cecilia Reyna, i lana ulua’i folasaga ananafi, “E toatolu pagota o le a latou faailoa i le faamasinoga, sa auai Lepou i le solaaga, o ia  foi na faia le tonu ina ia latou sosola ese mai le toese,” o le faafinauga lea a le itu a le malo, peitai na tali le loia a Lepou o Mark Ude, e le i auai Lepou i le solaaga e pei ona taua, ma, e i ai foi isi vaega o le suesuega a leoleo e le o manino lelei talu mai le taimi na amata mai ai lenei mataupu.

E lei faamanino e Ude i le vaega iloilo iuga po o a ia mea e lei manino lelei i suesuega a leoleo.

Fai mai le malo, o Lepou e toatasi na faia le  tonu ina ia fasi le leoleopo ma gaoi le ki, ina ia mafai ai ona latou maua se taavale latou te o ai i lona fale i Iliili.

“O le a molimau alii pagota e toatolu e faapea, o Lepou na fai ia Maea e tui le leoleopo  i le naifi faapata falaoa, o ia foi na ee atu ina ia fasioti le leoleopo,” o le faamatalaga lea a le loia mo le malo i lana folasaga.

Na taua foi e le malo e faapea, o Lepou na taina le ulu o le leoleopo i le paia u’amea ma pau ai i lalo, ae na mafua ona taofia ia gaioiga ona sa ia vaaia se taavale o agai atu ia te i latou, o lea na latou tuua ai loa lea nofoaga ae sosola ese.

E talitonu foi le malo, o matuia tele  o manu’a na aafia ai le alii leoleo na faigata ai ona sola ese i le taimi na osofaia ai e le ua molia ma isi pagota o ia.

Ae i le faafinauga a Ude sa ia taua ai e  faapea, o le a manino i molimau a le itu tete’e e lei auai Lepou i le solaaga e pei ona taua, ma e i ai lona talitonuga afai e lei auai o ia i le solaaga,  o lona uiga e leai ni moliaga o le faaoolima ma le faomea e ono tuuaia ai fua o ia.

Na taua e Ude e faapea, e ese lava le itu lea o loo taumafai mai i ai le malo ina ia faamaonia le latou mau faasaga  ia Lepou, peitai o lona tiute o le loia mo le ua molia, ia faailoa molimau e atagia mai ai e leai se solitulafono sa tupu.

E toa 6 tamaitai ma le alii e toatasi o loo i totonu o le vaega iloilo iuga, lea o loo latou iloiloinase faaiuga o lenei mataupu.

O le afioga i le alii faamasino sili ia Michael Kruse o loo faatautaia lenei mataupu, i le lagolagosua a afioga i alii faamasino lagolago ia Suapaia Pereira ma Satele Aliitai Lilio.

O le taeao nei lea ua faamoemoe e toe faaauau ai lenei iloiloga.