Ads by Google Ads by Google

15 Fa’au’u mai A’oga Su’isu’i ASCC

O le aso Lulu na te’a nei Aperila 25, 2012, na faia ai se sauniga pu’upu’u ma le matagofie i le LDS i Mesepa e taualoa ai le fa’amae’aina e le to’a 15 o tina ua mae’a a’otauina i le matata o le su’isu’i.  O lo latou soifua taumafai, ua fa’aeaina ma ua fa’amau fa’ailogaina fo’i i le taua’aoina i ai o latou Tusi Pasi i lea matata ma sa latou saunia fa’apitoa fo’i se ‘aiga tele ma le matagofie lava, e sami ai lea matati’a ua ausia e i latou uma nei.

O i latou na taua’aoina i ai tusi pasi e aofia ai:

Falenaoti Moea’i, Lagimaina Mapu, Pafuti Teo, Lesina Tamiulu, Valelia Moea’i, Iasinta Seiuli, Sina To’omalatai, Kaloni Iongi, Ulukivailahi Pu’a, Samaina Misenati, Anina Fa’alili, Mata Si’ilata, Carolaine Maleko, Tala Leasuasu ma Linder Agafili.

Ua fa’ailoa mai fo’i e tusa ai o ni saunoaga i le aso fa’apitoa lea, e to’a 18 i latou na amata mai o tau’avea lenei a’oa’oga fa’apitoa, peita’i, ua i ai ni isi ua fa’avaivai i le ala, ona o mea ua le mafai ai e i latou ona fa’aauau lea a’oa’oga taua, peita’i, o i latou uma ua fa’ai’uina ma le manuia, ua i ai lo latou naunauta’iga, ina ia fa’ai’ila atili le taleni ma aga’i atu i le la’asaga lona lua o lea ituaiga o a’oa’oga taua mo tina uma.

E tusa ai ma ni isi sa molimau e tusa ai o la latou tausinioga se’ia to’ai taunu’u mai i le sini lea o le fa’amoemoe, “E le’i faigofie lava le ala, sa i ai mea e fa’avaivai ai, peita’i, sa le malolo le fa’amoemoe, ona ua i ai se tasi ua manatu ina ia maua se isi taleni fou e i matou ua aofia i lenei a’oa’oga.”

I le tina sa a’oa’oina i latou, ua latou fa’afetaia o ia mo lana fa’asoa mai ia i latou, ina ia si’itia se isi la’asaga fou e sa'ilia ai fo’i e i latou se vaega tupe mo latou aiga, ae o se ala fo’i ua fa’asaoina ai tupe mai le so’ona fa’aalu i totonu o le aiga.

“O le fa’afetai e tu’uina i le Atua, aua o Ia sa ia fa’aofi se lagona fa’asoa lelei i le tina sa ia a’oa’oina lenei vasega ua fa’au’u i le aso. O le meaalofa taua ua e aumaia mo i matou o tina sa fia maua lea taleni, fa’afetai aua o le a matou taumafai e fa’aolaola atili ma ia aoga mo matou aiga.”

Ua fa’ailoa e ni isi tina, ua le o’o le a’oa’oga i le su’iga o Aloha ma Ie faitaga, peita’i, o lo ’o loma le vaega lua o lea lava vasega, e o’o atu ai i isi ituaiga o a’oa’oga e maualuga atu, e aofia ai ma le su’iga o suti o tamaloloa ma 'ofuvae e fa’afetauia ai.

“Ona o lenei taimi na fa’atautaia ai le a’oa’oga e na’o le 3 masina, o lea e le mafai ona ofi uma i ai le tomai e mo’omia atoatoa e se su’isu’i sili atu ona agava’a, peita’i e pei lava o mea uma, e amata lava i nai la’a laiti muamua ona fa’ato’a fa’asolo lea ina tamo’e ma a’ea olo maualuluga! E i ai fo’i la’asaga e fa’aleleia atili ai le tomai mo lenei taleni ua outou umia ma e ao ina maumaua’i ma ia naunauta’i e fa’aleleia atili lau taleni!” O se fa’amalosi mai lea a le tina faia’oga, Diana Tarrant.

O le vasega lenei o tina, e aofia ai tama’ita’i e le’i faiaiga, tina ua amatalia aiga, ma tina matutua lava ua fa’aosofia i lagona lelei, e ao ina fa’aleleia atili a latou su’isu’i mai le la’asaga sa sau a’i, o le so’ona alu lava i ai.

O lea tina sa matua fa’ailo le fiafia i ai o le faia’oga, aua o ia o lo ’o mausali ai le fa’amoemoe ia mautu le taleni su’isu’i, le tina lea o Pafuti. Ua atoa le 72 o tausaga o le soifuaga, ae o le fa’alua fo’i lea ona auai i ana a’oa’oga su’isu’i ma ua iloga fo’i ona faula’i ana taga aluga, ieso’oso’o ma i si mea ua mae’a su’ia e o’o lava i ona la’ei ma la’ei o le fanau.

I le ata na pu’eina, ua mafai ona fa’atautau mai tua atu o le vaega atoa sa aofia i lea aso su’isu’iga a le vasega lenei, ua le aumaia uma a latou galuega fa’atino, aua ua la’eia e i latou nisi o latou ofu, fa’apea fo’i latou aiga.

O le fa’afetai sa saunoa i ai le susuga le Epikopo sa ia fa’auluina le suafa o le mafutaga i le a’oa’oga lenei ma sa ia fa’ailoa ai, “O lenei taleni e mo’omia tele mo le tina o se aiga ma o se pae ma le auli mo lona aiga.”

Mai lea lava ituaiga o a’oa’oga, sa faia fo’i le fa’au’uga o le vasega o tina ma tama’ita’i sa tau’avea lea kosi mai le LDS i Leone. O i latou na sa faia le fa’au’uga lea i le aso Tofi i le itula e 10:00 ma taua’aoina ai fo’i o latou tusi pasi.

O le isi vasega mulimuli lava e fa’au’u ma taua’aoina o latou tusi pasi, o le a’oga a le LDS i Malaeimi lea e faia i le aso Gafua a sau nei. O le itula fo’i e 10:00 i le taeao o le a faia ai ma ua sauni fo’i le tama’ita’i faia’oga e amatalia le vaega lua o ana kosi su’isu’i mo le isi tolu masina o lumana’i ma e amatalia lea i le aso Tofi, 3 Me i le SISDAC i Ottoville Center.

Ua i ai le isi vasega mai le Ekalesia Metotosi, vasega mo le Ekalesia Fa’apotopotoga Kerisiano i Amerika Samoa ma ua tumu fo’i lana fa’atulagaga mo le isi tolu masina o lumana’i. Na aofia i le sauniga le tama’ita’i pule o le polokalama fa’ataoto a le Land Grant ASCC, Siaunofo Logologo, ma sa i ai fo’i se avanoa sa ia fa’afetaia ai lea mafutaga a tina ma tama’ita’i i LDS Mesepa, mo le latou naunauta’i ia maua lea fo’i taleni lelei tele mo tina.

O le mana’oga fa’apitoa, “Ia mafai e le tagata lava ia, ona fa’aaoga ma fa’aleleia atili lana taleni ua maua, ia aoga mo ia ma lona aiga, ia maua ai fo’i sosia mo’omia mo lona aiga ma lona olaga taumafai i le lumana’i.”