Ads by Google Ads by Google

Tala o Faamasinoga

SASA LONA TOALUA I LE LAUPAPA

O le alii mai Pago Pago lea na tuuaia e le malo i lona sasaina lea o le ulu o si ona faletua i se fasi laupapa, ua molia nei e le malo i le moliaga mamafa o le faaoolima i le tulaga lua, faapea ai ma moliaga mama e lua ia na ulua’i tuuaia ai o ia e le malo, o le faatupu vevesi i nofoaga faitele, atoa ai ma lona save’uina lea o le filemu i totonu o le lotoifale o lona aiga.

O moliaga faasaga i lenei tama talavou na afua mai i se vevesi na tulai mai i le va o ia ma lona toalua, ina ua fai atu le fafine i le ua molia e aua le alu e inu pia.

Na amata le vevesi i se taugaupu i le va o le ulugalii, ma faai’u ai i le oso o le ua molia i lana taavale, ua faaola, ma alu ese atu loa i se saoasaoa uiga ese e pei ona taua i faamaumauga a le malo, peitai na uu e le fafine se atigi fagu ma togi ai le taavale, ma avea ai ma itu na toe tu ai le taavale, oso i fafo le ua molia ma aapa atu i se fagupia e le’i tatalaina ma togi ai lona toalua peitai na misi e le’i lavea.

Fai mai faamaumauga a le malo, o le taimi lea na tago atu ai loa le ua molia i se fasi laupapa o loo taatia ane i tafatafa o le vaega o loo tula’i mai ai le vevesi, ma ia taina ai le ulu o lona to’alua ma ta’e ai, ma auina atu ai loa si fafine i le falemai mo togafitiga i lona manu’a.

E $5,000 le tupe lea ua faatulaga e le faamasinoga e tatala ai le ua molia i tua e faatalitali ai taualumaga o lona faamasinoga.

(The English version of this court brief, “DOMESTIC VIOLENCE CASE”, was published in yesterday’s Samoa News, Thursday, April 26, 2012, and can be found on samoanews.com.)

ASOSALAUPAMA PAAGA

O le masina fou ia Me lea ua toe faatulaga i ai e le faamasinoga maualuga le isi iloiloga o le mataupu a le alii o Asosalaupama Paaga, ma le tuutuuga e tatau ona oo atu i le iloiloga lea, ua feololo se tupe ua totogi e Paaga i le faamasinoga, mai lana salatupe e $2,000 sa poloaina o ia na te toe totogiina, ina ua tuuina atu lona faasalaga e le faamasinoga.

O Paaga na ta’usala e le faamasinoga i lona umia faasolitulafono o ni vaega o mariuana, e afua mai i se faalavelave na tulai mai i le masina o Ianuari 2011, ma tuuina atu ai loa lana faasalaga i le masina o Oketopa 2011 e faanofovaavaaia ai o ia mo le 5 tausaga, i lalo o poloaiga e ao ona ia usita’i i ai, ma o se tasi o ia poloaiga o lona totogiina lea o le salatupe e $2,000.

Na faailoa e le loia a Paaga ia Leslie Cardin i luma o le faamasinoga maualuga i le vaiaso nei e faapea, o loo usitaia uma e Paaga tuutuuga o lana faanofovaavaaia, talu mai le taimi na tuuina mai ai lana faasalaga seia oo mai i le taimi nei, peitai na saunoa le alii faamasino sili ia Michael Kruse e faapea, o lea e lei maea ona totogi e Paaga lana salatupe sa poloaina ai o ia e totogi.

“O le mafuaaga lena na le mafai ai ona tuuina atu Paaga e loka i le falepuipui, ina ia mafai ona ia totogi lana salatupe e $2,000,” o le saunoaga lea a Kruse i le loia a Paaga o Cardin, ma ia poloaina ai loa le toe valaauina o le isi iloiloga mo le mataupu a Paaga i totonu o le 30 aso, ina ia iloa ai le tulaga o le totogiina e le ua molia o lana salatupe.

Na toe faamanatu foi e le alii faamasino sili ia Cardin, e talanoa ia Paaga e faamanino atili ia te ia le taua tele o le totogiina lea o le salatupe.

(The English version of this court brief, “ASOSALAUPAMA PAAGA”, was published in the Samoa News, Monday, April 23, 2012 edition, and can be found on samoanews.com.)