Fa’amanatu le 40 tausaga o le Asosi Loia AS
O le fonotaga mo loia i le atunu’u lea ua faamoemoe e faia i le aoauli o le aso Toona’i nei, o le a autu lea i ni fetufaaiga e uiga i le mataupu o le avea lea o tagata Amerika Samoa ma sitiseni o le Iunaite Setete, atoa ai ma le talanoaina o nisi o mataupu mo le faamanatuina o le 40 tausaga talu ona faavae le Asosi Loia a Amerika Samoa.
Sa ta’ua e le pereseten eo le ASBA (American Samoa Bar Association, o Sean Morrison, ina ua alia’e mai lenei mataupu, e to’atele nisi sa faaalia o latou atugaluga, ona e foliga mai o le a aafia atu ai ma le aia o le isi tagata e le o mana’o e avea o ia ma sitiseni o le malo tele, ae o lea o le a aofia ai ona o le tulafono pe afai ae pasia.
O lo o i ai le faanaunauga o le alii peresetene, o le a lelei atili le talanoaga o lenei mataupu ona o le a aofia ai nisi o loia ua tele tausaga o galulue i le galuega.
I se pepa o faamatalaga na tuuina mai i le alii peresetene, sa ia taua ai foi se fuafuaga mo le tauaao aloaia atu o se faailoga taualoa i le faletua ia Ipu Lefiti, e tusa ai o lana tautua aua gaioiga e puipuia ai sauaga i totonu o le teritori.
Na taua e Morrison e faapea, o le faailoga o le Arthur A. Morrow Justice Award lea o le a tauaaoina atu ia Lefiti, o le ulua’i faailoga taualoa lea ua tauaao atu i se tagatanuu ua maualuga lona aafia ai, i le sailiga o auala e faailoa ai i latou sa aafia i faiga faasolitulafono, atoa ai ma le faia o ripoti ina ia faailoa ai nei mataupu tuga ma le matuia.
“O le faletua ia Lefiti, o se tasi lea o tagatanuu ua iloa lana tulai mai i totonu o lona aiga ma le teritori, ma ua maitauina foi lona faamalosi i le tuuina atu o aoaoga ma ta’iala i tupulaga talavou, i auala e foia ai le tula’i mai o sauaga i totonu o aiga,” o se vaega lea o le saunoaga a Morrison.
O le faailoga taualoa ua faamoemoe e tauaao atu ia Lefiti, e mafai ona maua e se tasi pe afai o lea tagata ua maitauina le tulaga maoa’e o lana tautua i le taumafai lea e siitia auala e foia ai le faia o solitulafono, faailoa ni gaioiga o loo taumafai e faaufiufi, atoa mai le auai i taimi uma i aoaoga faapea ai ma le ofoina atu o le taimi e fesoasoani ai i aoaoga mo i latou e aafia i sauaga nei.
O Arthur A Morrow, sa avea ma Faamasino Sili i le faamasinoga maualuga a Amerika Samoa mai le 1937 e oo atu i le 1966, ma o ia le faasino sili pito umi lana tautua ao ia nofoia le nofoa.
O le faletua ia Lefiti, na faauu mai i le aoga a Samoana, sa tautua o ia i le tele o faalapotopotoga a le malo, e aofia ai ma faalapotopotoga o loo galulue i le tetee atu lea i sauaga i aiga, faapea ai le tete’e atu i le ava malosi i fanau aoga.